ಅನಿವಾಸಿ ಭಾರತೀಯರಿಗೆ ಪ್ರಾತಿನಿಧಿಕ ಮತದಾನದ ಅವಕಾಶ ಕಲ್ಪಿಸಲು ಮಸೂದೆ ಮಂಡನೆಗೆ ಕೇಂದ್ರ ಚಿಂತನೆ

ನವದೆಹಲಿ: ವಿದೇಶಗಳಲ್ಲಿ ನೆಲೆಸಿರುವ ಭಾರತೀಯರಿಗೂ ಮತದಾನ ಮಾಡುವ ಅವಕಾಶವನ್ನು ಕಲ್ಪಿಸಿಕೊಡುವ ನಿಟ್ಟಿನಲ್ಲಿ ಚಿಂತನೆ ಆರಂಭಿಸಿರುವ ನರೇಂದ್ರ ಮೋದಿ ಸರ್ಕಾರ, ಸಂಸತ್ತಿನಲ್ಲಿ ಈ ಬಗೆಗಿನ ಮಸೂದೆಯನ್ನು ಪರಿಚಯಿಸಲಿದೆ.

ಅನಿವಾಸಿ ಭಾರತಿಯರು ಭಾರತದಲ್ಲಿ ಪ್ರಾಕ್ಸಿ ವೋಟಿಂಗ್ (ಪ್ರಾತಿನಿಧಿಕ ಮತದಾನ) ಮತ ಚಲಾಯಿಸುವ ಅವಕಾಶವನ್ನು  ಈ ಪ್ರಸ್ತಾಪಿತ ಮಸೂದೆ ನೀಡಲಿದೆ ಎನ್ನಲಾಗಿದೆ.

ಇದೂವರೆಗೆ ನಿಯಮಗಳ ಅನ್ವಯ, ಭಾರತದ ಯಾವುದೇ ಕ್ಷೇತ್ರದಲ್ಲಿ ನೋಂದಾಯಿತರಾಗಿದ್ದ ಅನಿವಾಸಿ ಭಾರತೀಯರು ಚುನಾವಣೆ ವೇಳೆ ಕ್ಷೇತ್ರಕ್ಕೆ ಬಂದು ಮತಚಲಾಯಿಸಬಹುದಾಗಿತ್ತು. ಆದರೆ, ಇದಕ್ಕಾಗಿ ಅವರು ಲಕ್ಷಾಂತರ ಹಣವನ್ನು ವೆಚ್ಚ ಮಾಡಿ ಭಾರತಕ್ಕೆ ಬರಬೇಕಿತ್ತು. ಆದರೆ, ಪ್ರಾತಿನಿಧಿಕ ಮತದಾನದ ಅವಕಾಶ ಸಿಕ್ಕರೆ ವಿದೇಶದಲ್ಲಿರುವ ಅನಿವಾಸಿ ಭಾರತೀಯರ ಪರವಾಗಿ ಅವರಿಂದ ಆರಿಸಲ್ಪಟ್ಟ ಯಾವುದೇ ವ್ಯಕ್ತಿ, ಅವರ ನೋಂದಾಯಿತರಾಗಿರುವ ಕ್ಷೇತ್ರದಲ್ಲಿ ಹೋಗಿ ಮತ ಚಲಾಯಿಸಬಹುದಾಗಿದೆ.

ವಿದೇಶಾಂಗ ಸಚಿವಾಲಯದ ಮಾಹಿತಿಯ ಪ್ರಕಾರ ವಿದೇಶಗಳಲ್ಲಿ ಸುಮಾರು 3.1 ಕೋಟಿ ಭಾರತೀಯರು ವಾಸಿಸುತ್ತಿದ್ದಾರೆ. ಚುನಾವಣೆಯ ಸಂದರ್ಭದಲ್ಲಿ ಭಾರತಕ್ಕೆ ಆಗಮಿಸಿ ಮತವನ್ನು ಚಲಾಯಿಸುವುದು ಇವರೆಲ್ಲರಿಗೂ ಸಾಧ್ಯವಾಗುವುದಿಲ್ಲ. ಹೀಗಾಗಿ ಪ್ರಾತಿನಿಧಿಕ ಮತದಾನದ ಅವಕಾಶ ನೀಡುವುದರಿಂದ ಪ್ರತಿನಿಧಿಗಳ ಮೂಲಕ ಇವರಿಗೆ ಮತದಾನದ ವ್ಯವಸ್ಥೆ ಕಲ್ಪಿಸಲು ಮೋದಿ ಸರ್ಕಾರ ಮುಂದಾಗಿದೆ.

ಚುನಾವಣಾ ಆಯೋಗದ ಸಮಿತಿಯು 2015 ರಿಂದಲೇ ಚುನಾವಣಾ ಕಾನೂನಿಗೆ ತಿದ್ದುಪಡಿಯನ್ನು ತಂದು ಅನಿವಾಸಿ ಭಾರತೀಯರಿಗೆ ಮತದಾನದ ಅವಕಾಶವನ್ನು ಕಲ್ಪಿಸುವ ಪ್ರಯತ್ನ ಮಾಡುತ್ತಿದೆ.