ಚುನಾವಣಾ ಆಯೋಗದ ಕಾರ್ಯವನ್ನು ಶ್ಲಾಘಿಸಿದ ಪ್ರಣವ್ ಮುಖರ್ಜಿ: ಪ್ರತಿಪಕ್ಷಗಳಿಗೆ ಮುಖಭಂಗ

ನವದೆಹಲಿ: ಚುನಾವಣಾ ಆಯೋಗದ ವಿರುದ್ಧ ಕಾಂಗ್ರೆಸ್ ಮತ್ತು ಇತರ ಪ್ರತಿಪಕ್ಷಗಳು ತೀವ್ರ ಸ್ವರೂಪದ ಆರೋಪವನ್ನು ನಡೆಸುತ್ತಿರುವ ಈ ಸಂದರ್ಭದಲ್ಲಿ ಮಾಜಿ ರಾಷ್ಟ್ರಪತಿ ಪ್ರಣವ್ ಮುಖರ್ಜಿಯವರು ಚುನಾವಣಾ ಆಯೋಗದ ಕಾರ್ಯವನ್ನು ಶ್ಲಾಘಿಸಿ ನೀಡಿರುವ ಹೇಳಿಕೆ ಭಾರೀ ಮಹತ್ವವನ್ನು ಪಡೆದುಕೊಂಡಿದೆ.

 NDTVಯ ಸಂಪಾದಕೀಯ ನಿರ್ದೇಶಕರಾದ ಸೋನಿಯಾ ಸಿಂಗ್ ಅವರ “Defining India Through Their Eyes” ಪುಸ್ತಕವನ್ನು ಬಿಡುಗಡೆಗೊಳಿಸಿ ಮಾತನಾಡಿದ ಅವರು, “ಸಂಸ್ಥೆಗಳು ಉತ್ತಮವಾಗಿಯೇ ಕಾರ್ಯನಿರ್ವಹಿಸಿವೆ, ಈ ಸಂಸ್ಥೆಗಳನ್ನು ಹಲವಾರು ವರ್ಷಗಳಿಂದ ಕಟ್ಟಿ ಬೆಳೆಸಲಾಗಿದೆ, ಕೆಟ್ಟ ಕೆಲಸಗಾರ ಮಾತ್ರ ತನ್ನ ಸಾಧನಗಳೊಂದಿಗೆ ಘರ್ಷಣೆಗೆ ಇಳಿಯಬಲ್ಲ. ಉತ್ತಮ ಕೆಲಸಗಾರನಿಗೆ ಈ ಸಂಸ್ಥೆಗಳನ್ನು ಹೇಗೆ ಬಳಸಿಕೊಳ್ಳಬೇಕು ಎಂಬ ಬಗ್ಗೆ ತಿಳಿದಿರುತ್ತದೆ ಎಂಬುದಾಗಿ ನಾನು ನಂಬಿದ್ದೇನೆ” ಎಂದಿದ್ದಾರೆ.

“ನೀವು ಸಂಸ್ಥೆಗಳನ್ನು ಬಲಗೊಳಿಸಲು ಬಯಸುವುದಾದರೆ, ಈ ಸಂಸ್ಥೆಗಳು ದೇಶದಲ್ಲಿ ಉತ್ತಮ ಕಾರ್ಯ ಮಾಡುತ್ತಿದೆ ಎಂಬುದನ್ನು ಗಮನದಲ್ಲಿ ಇಟ್ಟುಕೊಳ್ಳಬೇಕು. ಸುಕುಮಾರ್ ಸೇನೆ ಅವರಿಂದ ಹಿಡಿದು ಈಗಿನ ಚುನಾವಣಾ ಆಯುಕ್ತರವರೆಗೂ ಚುನಾವಣಾ ಆಯೋಗ ಅತ್ಯುತ್ತಮವಾಗಿ ಕೆಲ ಮಾಡಿದೆ, ಇದರಿಂದಾಗಿ ಪ್ರಜಾಫ್ರಭುತ್ವ ಯಶಸ್ವಿಯಾಗಿದೆ. ಇವರೆಲ್ಲರೂ ಕಾರ್ಯಾಂಗದಿಂದ ನೇಮಕಗೊಂಡವರಾಗಿದ್ದಾರೆ ಮತ್ತು ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸಿದ್ದಾರೆ. ಅವರನ್ನು ಟೀಕಿಸಲು ನಿಮಗೆ ಸಾಧ್ಯವಿಲ್ಲ. ಚುನಾವಣಾ ಆಯೋಗ ಅತ್ಯುತ್ತಮ ರೀತಿಯಲ್ಲಿ ಕೆಲಸ ನಿರ್ವಹಿಸಿದೆ ” ಎಂದಿದ್ದಾರೆ.

ಸೋಲಿನ ಭೀತಿಯಲ್ಲಿ ಇರುವ ಪ್ರತಿಪಕ್ಷಗಳು ತಮ್ಮ ವೈಫಲ್ಯವನ್ನು ಮರೆಮಾಚಲು ಮತಯಂತ್ರಗಳ ಮೇಲೆ ದೋಷಾರೋಪವನ್ನು ಮಾಡುತ್ತಿವೆ. ಪ್ರಣವ್ ಮುಖರ್ಜಿಯವರು ಹೇಳಿಕೆ ಅವುಗಳಿಗೆ ತೀವ್ರ ಮುಜುಗರವನ್ನುಂಟು ಮಾಡಲಿದೆ.