ಕಾಡಿನಿಂದ ಕೂಡಿದ ಗ್ರಂಥಾಲಯ ರಸ್ತೆಗೆ ಗ್ರಾಪಂ ಸದಸ್ಯರಿಂದಲೇ ಮುಕ್ತಿ

ಸುಬ್ರಹ್ಮಣ್ಯ : ಗುತ್ತಿಗಾರು ಗ್ರಾಮ ಪಂಚಾಯತ್ ನೂತನ ಸದಸ್ಯರಿಂದ ಅಧಿಕಾರ ವಹಿಸಿಕೊಳ್ಳುವ ಮುನ್ನವೇ ವಿನೂತನ ಕಾರ್ಯಕ್ರಮದ ಮೂಲಕ ಗಮನ ಸೆಳೆದರು. ಗ್ರಾಮ ಪಂಚಾಯತ್ ರಸ್ತೆಯನ್ನು ಸ್ವಚ್ಚ ಮಾಡಿದರೆ, ಕಾಡಿನಿಂದ ಬಹುತೇಕ ಮುಚ್ಚಿದ್ದ ಗ್ರಂಥಾಲಯ ಕಟ್ಟಡದ ಸುತ್ತಲೂ ಸ್ವಚ್ಚ ಮಾಡಿದರು.ಈ ಕಾರ್ಯಕ್ಕೆ ಗುತ್ತಿಗಾರು ಬಿಜೆಪಿ ಕಾರ್ಯಕರ್ತರು ಹಾಗೂ ಗುತ್ತಿಗಾರು ಯುವಕ ಮಂಡಲದ ಸದಸ್ಯರು ಸಹಕಾರ ನೀಡಿದರು.

ಗುತ್ತಿಗಾರು ಗ್ರಾಮ ಪಂಚಾಯತ್  ಈಗಿನ ಅಧಿಕಾರಾವಧಿ ಕೊನೆಗೊಂಡಿದೆ.ನೂತನ ಸದಸ್ಯರ ಅಧಿಕಾರ ಸ್ವೀಕಾರ ಹಾಗೂ ಪಂಚಾಯತ್ ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆ ಇನ್ನಷ್ಟೇ ನಡೆಯಬೇಕಿದೆ. ಈ ನಡುವೆ ಗ್ರಾಮ ಪಂಚಾಯತ್ ಸ್ವಚ್ಚ , ಭ್ರಷ್ಟಾಚಾರ ರಹಿತ ಆಡಳಿತದ ಭರವಸೆ ನೀಡಿ , ಇದೀಗ ಆರಂಭದಲ್ಲಿ ಗ್ರಾಮ ಪಂಚಾಯತ್ ರಸ್ತೆ ಸ್ವಚ್ಚತಾ ಕಾರ್ಯ ನಡೆಸಿದರು.ಇದರ ಜೊತೆಗೆ ಇಲ್ಲೇ ಇದ್ದ ಗ್ರಂಥಾಲಯ ಕಟ್ಟಡದ ಸುತ್ತಲೂ ಕಾಡು ಬೆಳೆದಿತ್ತ, ಜನರು ಓದಲು ಬಿಡಿ ಅತ್ತ ಸುಳಿಯಲೂ ಹೆದರಬೇಕಾದ ಸ್ಥಿತಿ ಇತ್ತು.ಇದನ್ನು ಮನಗಂಡು ಕಟ್ಟಡದ ಸುತ್ತಲೂ ಇರುವ ಕಾಡನ್ನು ತೆರವುಗೊಳಿಸಿ ಸ್ವಚ್ಚ ಮಾಡಿದರು. ಪಂಚಾಯತ್ ವಠಾರದಲ್ಲಿದ್ದ ಕಲ್ಲು, ಮಣ್ಣುಗಳನ್ನೂ ತೆರವುಗೊಳಿಸಿದರು.ಪಂಚಾಯತ್ ರಸ್ತೆಯಲ್ಲಿ ಚರಂಡಿ ವ್ಯವಸ್ಥೆ ಸರಿ ಇಲ್ಲದೆ ಇದ್ದು, ಇಡೀ ರಸ್ತೆಯ ಇಕ್ಕೆಲೆಗಳಲ್ಲಿ ಕಾಡುಗಳು ತುಂಬಿಕೊಂಡಿತ್ತು.ಪಂಚಾಯತ್ ಆವರಣವೂ ಸ್ವಚ್ಚವಾಗಿರಲಿಲ್ಲ. ಹೀಗಾಗಿ ಸದಸ್ಯರೇ ಆರಂಭದಲ್ಲಿ ಸ್ವಚ್ಚತೆಗೆ ಗಮನ ಹರಿಸಬೇಕು ಆ ಬಳಿಕ ಸಮುದಾಯಕ್ಕೆ ಈ ಬಗ್ಗೆ ಅರಿವು ಮೂಡಿಸುವ ಕೆಲಸ ನಡೆಸಿದ್ದಾರೆ.ಮುಂದೆ ಇಡೀ ಗುತ್ತಿಗಾರು ಪೇಟೆಯೂ ಕೂಡಾ ಸ್ವಚ್ಚತೆಗೆ ಸಹಕರಿಸಬೇಕು ಎಂಬುದು ಸದಸ್ಯರ ಕಾಳಜಿಯಾಗಿದೆ.

ಭಾನುವಾರ ಇಡೀ ದಿನದ ನಡೆದ ಈ ಕಾರ್ಯದಲ್ಲಿ ಪಂಚಾಯತ್ ನೂತನ ಸದಸ್ಯರು ಉತ್ಸಾಹದಿಮದ ಭಾಗವಹಿಸಿದರೆ, ಗುತ್ತಿಗಾರು ಗ್ರಾಮದ ಬಿಜೆಪಿ ಕಾರ್ಯಕರ್ತರೂ ಇವರ ಜೊತೆ ಕೈಜೋಡಿಸಿದರೆ , ಸಾಮಾಜಿಕ ಕಾಳಜಿಯ ದೃಷ್ಟಿಯಿಂದ ಗುತ್ತಿಗಾರು ಯುವಕ ಮಂಡಲದ ಸದಸ್ಯರೂ ಸ್ವಚ್ಚತಾ ಕಾರ್ಯದಲ್ಲಿ ತೊಡಗಿಸಿಕೊಂಡರು.

ಈ ಸಂದರ್ಭದಲ್ಲಿ ಗುತ್ತಿಗಾರು ಗ್ರಾಪಂ ಸದಸ್ಯರುಗಳಾದ ವೆಂಕಟ್ ವಳಲಂಬೆ, ಅಚ್ಚುತ ಗುತ್ತಿಗಾರು, ಜಯಪ್ರಕಾಶ್ ಮೊಗ್ರ,ವಿಜಯ ಕುಮಾರ್ ಚಾರ್ಮತ,ರಾಕೇಶ್, ಬಿ.ಕೆ.ಶ್ರೀಧರ್,ಸವಿತಾ ಕುಳ್ಳಂಪಾಡಿ,ಶ್ರೀದೇವಿ ಕೊಂಬೊಟ್ಟು, ಮಿತ್ರಕುಮಾರಿ , ಸೇರಿದಂತೆ ಸದಸ್ಯರು, ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷ ವೆಂಕಟ್ ದಂಬೆಕೋಡಿ,ತಾಪಂ ಸದಸ್ಯ ಮುಳಿಯ ಕೇಶವ ಭಟ್, ಬಿಜೆಪಿ ಕಾರ್ಯಕರ್ತರಾದ ಚಂದ್ರಶೇಖರ ಬಾಳುಗೋಡು,ಸತೀಶ್, ಸದಾಶಿವ ಕುದ್ವ, ಜಯರಾಮ ಪೈಕ,ಯುವಕ ಮಂಡಲದ ಅಧ್ಯಕ್ಷ ಮಹೇಶ್ ಪುಚ್ಚಪ್ಪಾಡಿ, ಕೋಶಾಧಿಕಾರಿ ಲೋಕೇಶ್ವರ ಡಿ.ಆರ್ , ಸದಸ್ಯರುಗಳಾದ ಪೂರ್ಣಚಂದ್ರ ಪೈಕ, ಅಜಿತ್ ಬಾಕಿಲ,ಸತೀಶ್ ಕಾಜಿಮಡ್ಕ ಮೊದಲಾದವರು ಉಪಸ್ಥಿತರಿದ್ದರು.