ಸುಷ್ಮಾ ನೆರವಿನಿಂದ ಭಾರತಕ್ಕೆ ವಾಪಾಸ್ಸಾದ ಒಮನ್­ಗೆ ಕಳ್ಳಸಾಗಾಣೆಯಾಗಿದ್ದ ಮಹಿಳೆ

ಹೈದರಾಬಾದ್ : ಉದ್ಯೋಗದ ಆಮಿಷದಲ್ಲಿ ಒಮನ್ ದೇಶಕ್ಕೆ ಕಳ್ಳಸಾಗಾಣೆಯಾಗಿದ್ದ ಹೈದರಾಬಾದ್ ಮೂಲದ ಮಹಿಳೆಯೊಬ್ಬರು ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರ ನೆರವಿನಿಂದಾಗಿ ಐದು ತಿಂಗಳುಗಳ ಬಳಿಕ ಭಾರತಕ್ಕೆ ವಾಪಾಸ್ಸಾಗಿದ್ದಾರೆ.

ಕುಲ್ಸಮ್ ಭಾನು ಅವರು ಒಮನ್­ಗೆ ಕಳ್ಳಸಾಗಾಣೆಯಾಗಿದ್ದ ಮಹಿಳೆಯಾಗಿದ್ದು, ಮೇ 8ರಂದು ಹೈದರಾಬಾದಿಗೆ ವಾಪಾಸ್ಸಾಗಿದ್ದಾರೆ. ತನ್ನನ್ನು ಸುರಕ್ಷಿತವಾಗಿ ಕರೆ ತಂದಿರುವುದಕ್ಕೆ ಅವರು ಸುಷ್ಮಾ ಸ್ವರಾಜ್ ಅವರಿಗೆ ಧನ್ಯವಾಗಳನ್ನು ತಿಳಿಸಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಕುಲ್ಸಮ್ ಭಾನು ಅವರು, ” ನನ್ನ ಮಗಳು ಘಟನೆಯ ಬಗ್ಗೆ  ಸುಷ್ಮಾ ಸ್ವರಾಜ್ ಅವರಿಗೆ ದೂರ ನೀಡಿದ್ದಳು. ಆ ಬಳಿಕ ಭಾರತೀಯ ರಾಯಭಾರ ಅಧಿಕಾರಿಗಳು ನನ್ನ ಮೇಲೆ ವಿಧಿಸಲಾಗಿದ್ದ ಸುಮಾರು ಐದು ಸಾವಿರ ರಿಯಾಲ್ ಮೊತ್ತ ದಂಡವನ್ನು ಪಾವತಿಸಿ ನನ್ನನ್ನು ಭಾರತಕ್ಕೆ ಕರೆತಂದಿದ್ದಾರೆ. ಒಮನ್­ನಲ್ಲಿನ ಭಾರತೀಯ ರಾಯಬಾರ ಕಛೇರಿ ಹಾಗೂ ಸುಷ್ಮಾ ಸ್ವರಾಜ್ ಅವರ ನೆರವಿನಿಂದಾಗಿ ಮೇ 8 ರಂದು ಹೈದರಾಬಾದಿಗೆ ನಾನು ತಲುಪಿದೆ. ಅವರಿಗೆ ನನ್ನ ಧನ್ಯವಾದಗಳು” ಎಂದು ಹೇಳಿದ್ದಾರೆ.

“ನಾನು ಕೆಲಸ ಹುಡುಕುತ್ತಿದ್ದ ಸಂದರ್ಭದಲ್ಲಿ ಅಬ್ರಾರ್ ಎಂಬ ಮಧ್ಯವರ್ತಿಯೊಬ್ಬನ ಪರಿಚಯವಾಯಿತು, ಆತ ಮಸ್ಕತ್­ನಲ್ಲಿ ತಿಂಗಳಿಗೆ 30 ಸಾವಿರ ರೂಪಾಯಿ ಸಂಬಳ ಇರುವ ಪಾರ್ಲರ್­ನಲ್ಲಿ ಬ್ಯೂಟಿಷಿಯನ್ ಕೆಲಸ ಕೊಡಿಸುವುದಾಗಿ ನಂಬಿಸಿದ. ನಂತರ ಡಿಸೆಂಬರ್ 17, 2018ರಂದು ನನ್ನನ್ನು ಮಸ್ಕತ್­ಗೆ ಕರೆದುಕೊಂಡು ಹೋದ. ಅಲ್ಲಿ ಮನೆ ಕೆಲಸಕ್ಕೆ ಸೇರಿಸಿದ್ದಾನೆ. ಆ ಕೆಲಸ ಮಾಡಲು ನಿರಾಕರಿಸಿದಾಗ ಮಧ್ಯವರ್ತಿ ನನ್ನ ಮೇಲೆ ಹಲ್ಲೆ ನಡೆಸಿ ಊಟ ನೀರು ಕೊಡದೆ ಕೊಠಡಿಯೊಂದರಲ್ಲಿ ಕೂಡಿಹಾಕಿದ” ಎಂದು ಆಕೆ ತನ್ನ ಅಳಲನ್ನು ತೋಡಿಕೊಂಡಿದ್ದಾರೆ.

ನಂತರ ಭಾರತೀಯ ರಾಯಭಾರಿ ಅಧಿಕಾರಿಗಳು ಇವರನ್ನು ಭೇಟಿಯಾಗಿದ್ದಾರೆ. ಸುಮಾರು 4 ತಿಂಗಳುಗಳ ಕಾಲ ಅವರು ರಾಯಭಾರ ಕಛೇರಿಯಲ್ಲೇ ಇದ್ದರು. ಬಳಿಕ ಇವರನ್ನು ಹೈದರಾಬಾದಿಗೆ ಕರೆತರಲಾಗಿದೆ.