ಒರಿಸ್ಸಾ ಮಾಜಿ ಸಿಎಂ ಗಿರಿಧರ್ ಗಮಾಂಗ್ ಕಾಂಗ್ರೆಸ್‌ಗೆ ರಾಜೀನಾಮೆ

ಒರಿಸ್ಸಾ: ಒರಿಸ್ಸಾದ ಮಾಜಿ ಮುಖ್ಯಮಂತ್ರಿ ಮತ್ತು 9 ಬಾರಿ ಲೋಕಸಭಾ ಸಂಸದರಾಗಿರುವ ಗಿರಿಧರ್ ಗಮಾಂಗ್ ಶನಿವಾರ ಕಾಂಗ್ರೆಸ್ ಪಕ್ಷಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆ. ಬಿಜೆಪಿ ಅವರು ಸೇರಲಿದ್ದಾರೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.

1999ರಲ್ಲಿ ಅಟಲ್ ಬಿಹಾರಿ ವಾಜಪೇಯಿ ಅವರ ಸರ್ಕಾರ ಒಂದು ಮತದ ಮೂಲಕ ಪತನಗೊಳ್ಳಲು ಗಮಾಂಗ್ ಅವರು ಪ್ರಮುಖ ಕಾರಣರಾಗಿದ್ದರು. ಆ ವೇಳೆ ಮುಖ್ಯಮಂತ್ರಿಯಾಗಿದ್ದರೂ ಸಂಸದ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದ ಇವರು ವಾಜಪೇಯಿ ಸರ್ಕಾರದ ವಿರುದ್ಧ ಮತ ಚಲಾವಣೆ ಮಾಡಿದ್ದರು.

ಇಂದು ಪತ್ರಿಕಾಗೋಷ್ಟಿಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ಕೇಂದ್ರ ಮತ್ತು ರಾಜ್ಯ ಕಾಂಗ್ರೆಸ್ ನಾಯಕತ್ವದ ವಿರುದ್ಧ ಹರಿಹಾಯ್ದರು. ಅಲ್ಲದೇ 1999ರಿಂದ ಎಲ್ಲರೂ ನನ್ನನ್ನು ವಾಜಪೇಯಿ ಸರ್ಕಾರವನ್ನು ಪತನಗೊಳಿಸಿದ ಅಪರಾಧಿ ಎಂದು ಟೀಕೆ ಮಾಡುತ್ತಲೇ ಇದ್ದಾರೆ, ಆದರೆ ಕಾಂಗ್ರೆಸ್ ನಾಯಕರು ನನ್ನ ಸಮರ್ಥನೆಗೆ ಒಂದೇ ಒಂದು ದಿನವೂ ಬಂದಿಲ್ಲ ಎಂದು ಆರೋಪಿಸಿದರು.

ನನ್ನ ನಿಷ್ಠೆ ಪಕ್ಷಕ್ಕೆ ಹೊರೆಯಾಗಿ ಪರಿಣಮಿಸಿದೆ ಎಂದು ನನಗೆ ಅನಿಸುತ್ತಿದೆ, 1999ರ ವಿಶ್ವಾಸ ಮತದ ವೇಳೆ ಪಕ್ಷದ ಅದೇಶವನ್ನು ನಾನು ಪಾಲನೆ ಮಾಡಿದ್ದೇ ಅಷ್ಟೇ. ಸರ್ಕಾರ ಪತನಕ್ಕೆ ನಾನು ಕಾರಣವಲ್ಲ ಎಂದಿದ್ದಾರೆ.

ಕಾಂಗ್ರೆಸ್ ಮುಖಂಡನಾಗಿರುವ ಅವರ ಪುತ್ರ ಸಿಸಿರ್ ಗಮಾಂಗ್ ಕೂಡ, ತಾನು ಹಾಗೂ ತಂದೆ ಬಿಜೆಪಿ ಸೇರಲಿದ್ದೇವೆ ಎಂಬ ಬಗ್ಗೆ ಸುಳಿವು ನೀಡಿದ್ದಾರೆ.