ಬಾಯಾರಿನ ದಳಿಕುಕ್ಕಿನ ನಾಗಬನದಲ್ಲಿ ಔಷಧೀಯ ಗಿಡಗಳನ್ನು ನೆಟ್ಟು ವಿಶಿಷ್ಟವಾಗಿ ಆಚರಿಸಲ್ಪಟ್ಟ ವನಮಹೋತ್ಸವ

ಕಾಸರಗೋಡು : ಕಾಸರಗೋಡು ಜಿಲ್ಲೆಯ ಬಾಯಾರು ಗ್ರಾಮದ ದಳಿಕುಕ್ಕು ಎಂಬಲ್ಲಿನ ಉತ್ಸಾಹೀ ತರುಣರು ನೂತನವಾಗಿ ಪುನಃ ಪ್ರತಿಷ್ಠಾಪನೆಗೊಂಡ ನಾಗ ಸನ್ನಿಧಿಯಲ್ಲಿ ಔಷಧೀಯ ಹಾಗೂ ಇನ್ನಿತರ ಗಿಡಗಳನ್ನು ನೆಡುವ ವಿಶಿಷ್ಟವಾದ ಕಾರ್ಯಕ್ರಮವನ್ನು ದಿನಾಂಕ 30-06-2017 ರ ಶುಕ್ರವಾರದಂದು ಆಯೋಜಿಸಿದರು.

ಈ ಹಿಂದೆ ಅಲ್ಲಿ ಇದ್ದ ನಾಗವನದ ಕಾಡನ್ನು ನಾಗದೇವರ ಹೊಸ ಕಟ್ಟೆಯ ನಿರ್ಮಾಣದ ಸಮಯದಲ್ಲಿ ಕಡಿದ ಹಿನ್ನೆಲೆಯಲ್ಲಿ ನಾಗವನದ ಪರಿಸರವನ್ನು ಪುನಃ ಹಸಿರಾಗಿಸುವ ಉದ್ದೇಶದಿಂದ ಈ ಕಾರ್ಯಕ್ರಮ ಆಯೋಜಿಸಲಾಗಿತ್ತು ಈ ಸಂದರ್ಭದಲ್ಲಿ ಅಶ್ವತ್ಥ, ಬಿಲ್ವಪತ್ರೆ, ಕಹಿಬೇವು, ರುದ್ರಾಕ್ಷಿ, ಹೊನ್ನೆ, ತುಳಸಿ, ನಾಗಸಂಪಿಗೆ, ಹೊನ್ನೆ, ನೆಲ್ಲಿ, ಲಕ್ಷ್ಮಣ ಫಲ, ಲಿಂಗ ಪುಷ್ಪ, ಲಕ್ಷ್ಮೀ ಗಿಡ ಮೊದಲಾದ ವಿಶಿಷ್ಠವಾದ ಗಿಡಗಳನ್ನು ನೆಡಲಾಯಿತು.

ಇತ್ತೀಚೆಗೆ ನಾಗವನಗಳ ಪುನಃ ಪ್ರತಿಷ್ಠೆ ಮಾಡುವ ಸಂದರ್ಭಗಳಲ್ಲಿ ಪ್ರಸ್ತುತ ಇರುವ ನಾಗವನದ ಕಾಡನ್ನು ಕಡಿದು ಸಿಮೆಂಟಿನ ಕಟ್ಟೆಗಳನ್ನು ನಿರ್ಮಾಣ ಮಾಡಿ ಅದ್ದೂರಿಯಿಂದ ಪುನಃ ಪ್ರತಿಷ್ಠೆ ನಡೆಸಲಾಗುತ್ತದೆ. ಆದರೆ ಕಾಡನ್ನು ಕಡಿಯುವ ಮೂಲಕ ನಿರ್ಮಿಸಿದ ನಾಗನ ಕಟ್ಟೆಗಳು ತನ್ನ ಮೂಲ ಉದ್ದೇಶವಾದ ಪ್ರಕೃತಿ ರಕ್ಷಣೆ ಮಾಡುವಲ್ಲಿ ವಿಫಲವಾಗುತ್ತಿವೆ. ಆದರೆ ಈ ನಿಟ್ಟಿನಲ್ಲಿ ಪ್ರಕೃತಿಗೆ ಪೂರಕವಾಗಿ ನಾಗವನವನ್ನು ನವೀಕರಿಸಲು ಸಾಧ್ಯ ಎಂಬುದಕ್ಕೆ ಬಾಯಾರು ಎಂಬ ಗ್ರಾಮದ ದಳಿಕುಕ್ಕು ಎಂಬಲ್ಲಿನ ನಾಗವನವೇ ಇದಕ್ಕೆ ಸಾಕ್ಷಿ.

ಈ ಪರಿಸರದಲ್ಲಿ ಸುಮಾರು ವರ್ಷಗಳಿಂದ ಆರಾಧಿಸಿಕೊಂಡು ಬರುತ್ತಿದ್ದ ನಾಗವನದ ಜೀರ್ಣೋದ್ಧಾರ ಮಾಡುವ ಸಂದರ್ಭದಲ್ಲಿ ನಾಗ ದೇವರಿಗೆ ಹೊಸ ಕಟ್ಟೆ ನಿರ್ಮಾಣ ಮಾಡುವ ತೀರ್ಮಾನವನ್ನು ಕೈಗೊಂಡಾಗ ಕಾಡು ನಾಶ ಆಗುವ ಬಗ್ಗೆ ಎಲ್ಲರಿಗೂ ಆತಂಕ ಇತ್ತು. ಆದರೆ ಮುಂದಿನ ದಿನಗಳಲ್ಲಿ ಕಾಡನ್ನು ಬೆಳೆಸುವ ಸಂಕಲ್ಪದೊಂದಿಗೆ ಅಲ್ಲಿನ ಯುವಕರು ಅನಿವಾರ್ಯವಾಗಿ ಅಲ್ಲಿದ್ದ ದಟ್ಟ ಪೊದೆಗಳನ್ನು ಕಡಿದು ಹೊಸ ನಾಗನ ಕಟ್ಟೆಯ ನಿರ್ಮಾಣಕ್ಕೆ ಮುಂದಾದರು. ಕಟ್ಟೆ ನಿರ್ಮಾಣದ ಸಂದರ್ಭದಲ್ಲಿಯೂ ಕೂಡ ಸಿಮೆಂಟಿನ ಬದಲಿಗೆ ಪಾಕೃತಿಕವಾದ ಸುಣ್ಣ ಬೆಲ್ಲದ ಗಾರೆ ಬಳಸಲಾಗಿತ್ತು. ಈಗ ಸಸಿ ನೆಡುವ ಮೂಲಕ ಇಲ್ಲಿನ ನಾಗನ ಸನ್ನಿಧಿ ನಿಜವಾಗಿ “ನಾಗವನ” ಎಂಬ ಶಬ್ದವನ್ನು ಸಾರ್ಥಕಪಡಿಸಿಕೊಂಡಿದೆ.ನಾಗಾರಾಧನೆಯ ಜೊತೆಗೆ ಪ್ರಕೃತಿಯ ರಕ್ಷಣೆಯನ್ನೂ ಮಾಡುವ ನಾಗವನದ ಉದ್ದೇಶ ಈಡೇರಿದಂತಾಗಿದೆ.