ಧಾರವಾಡ ಸಾಹಿತ್ಯ ಸಂಭ್ರಮದ ವೈಶಿಷ್ಟ್ಯ

ಧಾರವಾಡ: ಸಾಹಿತ್ಯ ಸಂಭ್ರಮದ 5 ನೇ ಆವೃತ್ತಿ -2017 ರ ಜ.20, 21 ಮತ್ತು 22 ರಂದು ಇಲ್ಲಿನ ಕರ್ನಾಟಕ ವಿಶ್ವವಿದ್ಯಾಲಯದ ಸುವರ್ಣ ಮಹೋತ್ಸವ ಭವನದಲ್ಲಿ ನಡೆಯಲಿದೆ.

ಕವಿ ಕೆ.ಎಸ್.ನಿಸಾರ್ ಅಹ್ಮದ್ ಸಂಭ್ರಮವನ್ನು ಉದ್ಘಾಟಿಸಲಿದ್ದಾರೆ. ವಿಮರ್ಶಕ ಜಿ.ಎಚ್.ನಾಯಕ್ ಆಶಯ ಭಾಷಣ ಮಾಡಲಿದ್ದು, ಗುರುಲಿಂಗ ಕಾಪಸೆ ಸಮಾರೋಪ ಭಾಷಣ ಮಾಡಲಿದ್ದಾರೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಪ್ರಸಿದ್ಧ ಪುರಾಣ ಶಾಸ್ತ್ರಜ್ಞ ಮುಂಬಯಿಯ ದೇವದತ್ತ ಪಟ್ನಾಯಕ ಅವರು ಈ ಬಾರಿಯ ಸಂಭ್ರಮದ ಸಂವಾದದಲ್ಲಿ ಭಾಗವಹಿಸಲಿದ್ದಾರೆ. ಸುಮತೀಂದ್ರ ನಾಡಿಗ, ಸುಂದರ ಸಾರುಕ್ಕೈ, ಲಕ್ಷ್ಮೀಶ ತೋಳ್ಪಾಡಿ, ವೈದೇಹಿ, ನಾ.ಡಿಸೋಜ, ಮಲ್ಲಿಕಾ ಘಂಟಿ, ನಟರಾಜ ಹುಳಿಯರ, ಯೋಗರಾಜ ಭಟ್, ಚಂದ್ರಶೇಖರ ಪಾಟೀಲ್, ವೀಣಾ ಬನ್ನಂಜೆ ಇತರರು ವಿವಿಧ ಗೋಷ್ಠಿಗಳಲ್ಲಿ ಪಾಲ್ಗೊಳ್ಳುತ್ತಾರೆ. ಚಿತ್ರನಟ ರಮೇಶ ಅರವಿಂದ ಅವರೂ ಸಂವಾದಕ್ಕೆ ಬರಲು ಒಪ್ಪಿದ್ದು, 200ಕ್ಕೂ ಹೆಚ್ಚು ಜನ ಸಾಹಿತಿಗಳು ಆಮಂತ್ರಿತರಾಗಿ ಬರಲಿದ್ದಾರೆ.

ಯಾವುದೇ ಪಂಥ-ಸಿದ್ಧಾಂತಕ್ಕೆ ಈ ವರ್ಷದ ಸಾಹಿತ್ಯ ಸಂಭ್ರಮ ಸೀಮಿತವಾಗಿಲ್ಲ. ಎಲ್ಲ ರೀತಿಯ ವಿಚಾರಗಳ ಅಭಿವ್ಯಕ್ತಿಗೂ ಅವಕಾಶವಿದೆ. ವಿವಿಧ ಸಿದ್ಧಾಂತಗಳ ನಡುವೆ ಸಂವಾದ ನಡೆಯಬೇಕೆಂಬುದು ಈ ಸಂಭ್ರಮದ ಉದ್ದೇಶ ಎನ್ನಲಾಗಿದೆ.

ರಾಷ್ಟ್ರೀಯ ಜಲನೀತಿ ಮತ್ತು ಎಡ ಬಲಗಳ ನಡುವೆ ರಾಷ್ಟ್ರೀಯ ಜ್ವಲಂತ ಸಮಸ್ಯೆಗಳ ಬಗೆಗೆ ಎರಡು ಗೋಷ್ಠಿಗಳು ಇರಲಿವೆ. ಭಕ್ತಿ ಪರಂಪರೆ ಮತ್ತು ಕನ್ನಡ ಕಾವ್ಯ, ವಚನ ಸಾಹಿತ್ಯ ಮತ್ತು ಜಾತಿನಿರಸನ, ಸಾಹಿತ್ಯ ಮತ್ತು ತತ್ವಜ್ಞಾನ ಮೊದಲಾದ ಚರ್ಚಾಗೋಷ್ಠಿಗಳು ನಡೆಯಲಿವೆ.

ಸಾಹಿತಿಗಳು ಬರೆದ ಪತ್ರಗಳ ಓದಿನ ಒಂದು ಗೋಷ್ಠಿಯೂ ಇದೆ. ಚಿತ್ರಕಲೆ ಕುರಿತ ಪ್ರಾತ್ಯಕ್ಷಿಕೆ ಇದೆ. ಜಿ.ಪಿ.ರಾಜರತ್ನಂ ಮತ್ತು ವಿ.ಜಿ.ಭಟ್ಟರ ಕವಿತೆಗಳ ಓದು, ಆಯ್ದ ಕನ್ನಡ ಕವಿತೆಗಳನ್ನು ಆಧರಿಸಿದ ವಿಡಿಯೊ, ಗೊಂದಲಿಗರ ಹಾಡಿನ ಪ್ರಾತ್ಯಕ್ಷಿಕೆ, ಸಾಹಿತ್ಯಿಕ ಪ್ರಸಂಗಗಳ ನಿರೂಪಣೆಯೂ ಇರಲಿವೆ ಎಂದು ಸಂಘಟಕರು ಪ್ರಕಟಣೆ ಮೂಲಕ ತಿಳಿಸಿದ್ದಾರೆ.

ಈ ಬಾರಿ ವಿಶೇಷವಾಗಿ ಪ್ರಸಿದ್ಧ ಸಾಹಿತಿಗಳು ಬರೆದ ಪತ್ರಗಳ ಪ್ರದರ್ಶನವಿದೆ. ಸಂಭ್ರಮದ ನೇರಪ್ರಸಾರವನ್ನು www.vividlipi.com ಮೂಲಕ ಜಗತ್ತಿನ ಯಾವುದೇ ಭಾಗದಲ್ಲಿರುವ ಸಾಹಿತ್ಯಾಸಕ್ತರು ವೀಕ್ಷಿಸಬಹುದು.