ಶಾರದಾ ವಿದ್ಯಾನಿಕೇತನ ಪಬ್ಲಿಕ್ ಸ್ಕೂಲ್, ತಲಪಾಡಿಯಲ್ಲಿ ಹೊನಲು ಬೆಳಕಿನ ಕ್ರೀಡೋತ್ಸವ

ಮಂಗಳೂರು : ಶಾರದಾ ಶಿಕ್ಷಣ ಸಂಸ್ಥೆಗಳ ಅಂಗ ಸಂಸ್ಥೆಯಾದ ಶಾರದಾ ವಿದ್ಯಾನಿಕೇತನ ವಸತಿ ಶಾಲೆಯಲ್ಲಿ ವೈಭವದ ಕ್ರೀಡೋತ್ಸವವನ್ನು ಡಿಸೆಂಬರ್ 10ರಂದು ತಲಪಾಡಿಯ ದೇವಿನಗರದಲ್ಲಿರುವ ಸಂಸ್ಥೆಯ ಆವರಣದಲ್ಲಿ ಸಂಜೆ 6 ರಿಂದ ನಿರಂತರ 8.30 ಗಂಟೆಗಳ ಕಾಲ ಶಾರದಾ ವಿದ್ಯಾ ಸಂಸ್ಥೆಗಳ ವಿದ್ಯಾರ್ಥಿಗಳು ಸಾಹಸ, ಸಾಂಸ್ಕೃತಿಕ ಕಲಾ ಪ್ರಕಾರಗಳೊಂದಿಗೆ ಮೈಮನ ಸೂರೆಗೊಳಿಸಲಿದ್ದಾರೆ. ಈ ಹೊನಲು ಬೆಳಕಿನ ಚಿತ್ತಾರದೊಂದಿಗೆ ವಿವಿಧ ಬಗೆಯ ಸಾಂಸ್ಕೃತಿಕ, ಸಾಹಸ ವೈವಿಧ್ಯಗಳನ್ನು ನಿರಂತರ ಉಣಬಡಿಸುವುದರೊಂದಿಗೆ ದೇಶದ ವಿವಿಧ ಕಲೆಗಳ ಬಗ್ಗೆ ಪರಿಚಯಿಸಲಿದ್ದಾರೆ.

ಈ ಕ್ರೀಡೋತ್ಸವದಲ್ಲಿ ಅತಿಥಿಗಳಾಗಿ ದ.ಕ ಸಂಸದರಾದ ಶ್ರೀ ನಳಿನ್ ಕುಮಾರ್ ಕಟೀಲ್, ಕರ್ನಾಟಕ ಸರಕಾರದ ಆಹಾರ ಮತ್ತು ಸರಬರಾಜು ಸಚಿವರಾದ ಶ್ರೀ ಯು.ಟಿ.ಖಾದರ್, ಕರ್ನಾಟಕ ವಿಧಾನ ಪರಿಷತ್ತಿನ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್, ಶ್ರೀ ಐವನ್ ಡಿ’ಸೋಜಾ, ಶ್ರೀ ಕೋಟ ಶ್ರೀನಿವಾಸ ಪೂಜಾರಿ, ಶ್ರೀ ಜೆ.ಆರ್.ಲೋಬೊ, ಮಾಜಿ ಶಾಸಕರಾದ ಶ್ರೀ ಮಧುಸೂಧನ್, ಮಂಗಳೂರು ಮಹಾಪೌರರಾದ ಶ್ರೀ ಹರಿನಾಥ ಜೋಗಿ, ಪೋಲಿಸ್ ಉಪ-ಕಮಿಷನರ್ ಶ್ರೀ ಸಂಜೀವ ಎಮ್ ಪಾಟೀಲ್, ಮಾಜಿ ಮಹಾಪೌರರಾದ ಶ್ರೀ ಶಶಿಧರ್ ಹೆಗ್ಡೆ, ಮೂಡಾ ಮಾಜಿ ಅಧ್ಯಕ್ಷರಾದ ಶ್ರೀ ಇಬ್ರಾಹಿಂ ಕೋಡಿಜಾಲ್, ತಲಪಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷರಾದ ಶ್ರೀ ಸುರೇಶ್ ಆಳ್ವ, ಶ್ರೀ ಆರ್. ವಾಸುದೇವ ಭಟ್ ಮೊದಲಾದವರು ಉಪಸ್ಥಿತರಿರಲಿದ್ದಾರೆ.

ದಕ್ಷಿಣ ಭಾರತದಲ್ಲಿಯೇ ಅತೀ ವಿಶೇಷವಾದ ಈ ರೀತಿಯ ಕ್ರೀಡೋತ್ಸವವನ್ನು ಮಂಗಳೂರಿನಲ್ಲಿ ಸಂಘಟಿಸುತ್ತಿರುವ ಏಕೈಕ ವಿದ್ಯಾ ಸಂಸ್ಥೆ ಶಾರದಾ ವಿದ್ಯಾ ಸಂಸ್ಥೆಯಾಗಿದೆ ಎಂಬುದಾಗಿ ಶಾರದಾ ವಿದ್ಯಾ ಸಂಸ್ಥೆಗಳ ಅಧ್ಯಕ್ಷರಾದ ಮಾನ್ಯ ಪ್ರೊ.ಎಂ.ಬಿ.ಪುರಾಣಿಕರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿರುತ್ತಾರೆ.