ದೇಶದ ಏಕೈಕ ಸುರಂಗ ತಂತ್ರಜ್ಞೆ ಆನಿ ಸಿನ್ಹಾ ರಾಯ್

ಬೆಂಗಳೂರಿನಲ್ಲಿ ನೆಲೆಸಿರುವ 35 ವರ್ಷದ ಆನಿ ಸಿನ್ಹಾ ರಾಯ್ ಭಾರತದ ಮೊದಲ ಮತ್ತು ಏಕೈಕ ಟನಲ್ ಇಂಜಿನಿಯರ್. ಕಬ್ಬನ್ ರೋಡ್-ವಿಧಾನಸೌಧ ನಡುವಣ ‘ನಮ್ಮ ಮೆಟ್ರೋ’ದ 4.8 ಕಿ.ಮೀ ಉದ್ದದ  ಈಸ್ಟ್-ವೆಸ್ಟ್ ಅಂಡರ್ ಗ್ರೌಂಡ್ ಸ್ಟ್ರೆಚ್ ನಿರ್ಮಾಣದಲ್ಲಿ ಇವರ ಪಾತ್ರ ಸಾಕಷ್ಟಿದೆ.

ಉತ್ತರ ಕೋಲ್ಕತ್ತಾ ಮಧ್ಯವರ್ಗದ ಕುಟುಂಬದಿಂದ ಬಂದಿರುವ ಇವರು, ನಾಗಪುರ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಪದವಿ ಪಡೆದುಕೊಂಡಿದ್ದಾರೆ. ಬಳಿಕ ಹೆಚ್ಚಿನ ಶಿಕ್ಷಣವನ್ನು ಪಡೆಯುವ ಆಶಯ ಇವರಿಗಿತ್ತಾದರೂ ತಂದೆಯ ಅಕಾಲಿಕ ಮರಣದಿಂದ ಅದು ಸಾಧ್ಯವಾಗಲಿಲ್ಲ. ಕುಟುಂಬ ನಿರ್ವಹಣೆಗಾಗಿ ಕೆಲಸಕ್ಕೆ ಸೇರುವುದು ಅನಿವಾರ್ಯವಾಗಿತ್ತು.

2007ರಲ್ಲಿ ದೆಹಲಿ ಮೆಟ್ರೋದ ಸ್ನೆಬೋ ಅವರಿಂದ ಜಾಬ್ ಆಫರ್ ಪಡೆದುಕೊಂಡರು, 2009ರಲ್ಲಿ ಚೆನ್ನೈ ಮೆಟ್ರೋದಲ್ಲಿ ಕಾರ್ಯ ನಿರ್ವಹಿಸಲಾರಂಭಿಸಿದರು. 2014ರಲ್ಲಿ ದೋಹಾಗೆ ತೆರಲಿ ಅಲ್ಲಿ 6 ತಿಂಗಳ ಕೆಲಸ ಮಾಡಿದರು. 2015ರ ಮೇನಲ್ಲಿ ಬೆಂಗಳೂರು ಮೆಟ್ರೋ ರೈಲ್ ಕಾರ್ಪೋರೇಶನ್‌ಗೆ ಅಸಿಸ್ಟೆಂಟ್ ಇಂಜಿನಿಯರ್ ಆಗಿ ಸೇರಿಕೊಂಡರು.

’ಅಲ್ಲಿ 100 ಪುರುಷರಿದ್ದರು, ಅದರಲ್ಲಿ ಕೆಲವರು ಇಂಜಿನಿಯರ್‌ಗಳು, ಉಳಿದವರು ಕಾರ್ಮಿಕರು. ಇಲ್ಲಿ ನಾನು ಹೆಚ್ಚು ಕಾಲ ಉಳಿಯಲಾರೆ ಎಂದೇ ಅಂದುಕೊಂಡಿದ್ದೆ. ಅಲ್ಲಿ ಶೌಚಾಲಯ ಇರಲಿಲ್ಲ, ಕುಳಿತುಕೊಳ್ಳಲು ಸ್ಥಳವೂ ಇರಲಿಲ್ಲ, ಸುತ್ತಲೂ ಅವಶೇಷಗಳೇ ಇದ್ದವು’ ಎಂದು ದೆಹಲಿ ಮೆಟ್ರೋಗೆ ಸೇರಿದ ತನ್ನ ಮೊದಲ ದಿನದ ಕೆಲಸದ ಅನುಭವವನ್ನು ಆನಿ ಹಂಚಿಕೊಂಡಿದ್ದಾರೆ.

ಈಗ ಅವರು ದಿನದ 8 ಗಂಟೆಗಳ ಕಾಲ ಸುರಂಗದೊಳಕ್ಕೆ ಕಳೆಯುತ್ತಾರೆ. ಬೆಂಗಳೂರಿನಲ್ಲಿ ಸುರಂಗ ಕೊರೆಯುವ ಮೆಶಿನ್ ಮೂಲಕ ಅವರೊಬ್ಬರೇ ಕೊರೆಯೋ ಕೆಲಸ ಮಾಡಿದ್ದಾರೆ.

ಅನ್ನಿ ಪುರುಷ ಪ್ರಧಾನ ಉದ್ಯೋಗದಲ್ಲಿರುವ ಹೆಮ್ಮೆಯ ಹೆಣ್ಣುಮಗಳು, ಆಕೆ ಬಹುಕಾಲದಿಂದಲೂ ಈ ಉದ್ಯೋಗದಲ್ಲಿನ ಸಾಂಪ್ರದಾಯಿಕ ಪದ್ಧತಿಯನ್ನು ಮುರಿಯುತ್ತಲೇ ಹೆಣ್ಣು ಎಂಬ ಗರ್ವದಿಂದ ಮುನ್ನುಗ್ಗುತ್ತಿದ್ದಾರೆ. ದೋಹಾಗೆ ತೆರಳಬೇಕಾಗಿದ್ದ ಸಂದರ್ಭದಲ್ಲೂ ಅವರ ವೀಸಾ ಅರ್ಜಿ 3 ಬಾರಿ ತಿರಸ್ಕೃತಗೊಂಡಿತ್ತು. ಯಾಕೆಂದರೆ ಖತಾರ್ ಸರ್ಕಾರ ಅವಿವಾಹಿತ ಮಹಿಳೆಯರಿಗೆ ಅಲ್ಲಿಗೆ ತೆರಳಿ ಕೆಲಸ ಮಾಡಲು ಅವಕಾಶ ನೀಡುವುದಿಲ್ಲ. ಆದರೆ 4ನೇ ಬಾರಿಗೆ ಹೋರಾಡಿ ವೀಸಾ ವಿಷಯದಲ್ಲಿ ಜಯ ಸಾಧಿಸಿದ್ದರು ಆನಿ.

ಸಾಂಪ್ರದಾಯಿಕತೆಯನ್ನು ಮುರಿಯಿರಿ, ಇಂತಹ ಉದ್ಯೋಗಗಳಲ್ಲಿ ಹೆಚ್ಚು ಹೆಚ್ಚು ತೊಡಗಿಕೊಳ್ಳಿ ಎಂದು ಆನಿ ಈ ದೇಶದ ಹೆಣ್ಣುಮಕ್ಕಳಿಗೆ ಅಮೂಲ್ಯ ಸಲಹೆಯನ್ನು ನೀಡುತ್ತಾರೆ.