ನಕ್ಸಲ್ ಕೂಬಿಂಗ್ ಹೆಸರಿನಲ್ಲಿ ವಿಧವೆಗೆ ದೌರ್ಜನ್ಯವೆಸಗಿದ ಎಎನ್‌ಎಫ್ ಪಡೆ

ಬೆಳ್ತಂಗಡಿ : ಕುದುರೆಮುಖ ರಾಷ್ಟ್ರೀಯ ಉದ್ಯಾನವನ ವ್ಯಾಪ್ತಿಯಲ್ಲಿ ಮತ್ತೆ ನಕ್ಸಲ್ ನಿಗ್ರಹ ದಳದ ದೌರ್ಜನ್ಯ ಪ್ರಾರಂಭವಾಗಿದೆ. ವಿಧವೆ ಮಹಿಳೆಯೊಬ್ಬರಿಗೆ ಎಎನ್‌ಎಫ್ ಸಿಬ್ಬಂದಿಗಳು ಅವಾಚ್ಯ ಶಬ್ದಗಳಿಂದ ಬೈಯ್ದು ಜೀವ ಬೆದರಿಕೆಯೊಡ್ಡಿರುವ ಘಟನೆ ನಾರಾವಿ ಗ್ರಾಮದಿಂದ ವರದಿಯಾಗಿದೆ. ಈ ಬಗ್ಗೆ ದೌರ್ಜನ್ಯಕ್ಕೊಳಗಾದ ಮಹಿಳೆ ವೇಣೂರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಕುದುರೆಮುಖ ರಾಷ್ಟ್ರೀಯ ಉದ್ಯಾನವನ ವ್ಯಾಪ್ತಿಯ ಕುತ್ಲೂರು, ನಾರಾವಿ ಭಾಗಗಳಲ್ಲಿ ಈ ಹಿಂದೆ ಎಎನ್‌ಎಫ್ ಪಡೆಯ ಸಿಬ್ಬಂದಿಗಳು ಅಲ್ಲಿನ ನಿವಾಸಿಗಳಿಗೆ ದೌರ್ಜನ್ಯ, ಕಿರುಕುಳ ನೀಡುತ್ತಿದ್ದರು. ಈ ಬಗ್ಗೆ ಎಎನ್‌ಎಫ್ ಪಡೆ ವ್ಯಾಪಕ ಟೀಕೆಗೆ ಗುರಿಯಾಗಿತ್ತು. ಎಎನ್‌ಎಫ್‌ನ ದೌರ್ಜನ್ಯಕ್ಕೆ ಹಲವು ನಾಗರಿಕರು ಕೈಕಾಲು ಮುರಿಯಲ್ಪಟ್ಟಿತ್ತು. ಈ ಬಗ್ಗೆ ಪ್ರತಿಭಟನೆಗಳು ಕೂಡಾ ನಡೆದಿತ್ತು. ವಿಠ್ಠಲ್ ಮಲೆಕುಡಿಯ ಪ್ರಕರಣದ ಬಳಿಕ ಎಎನ್‌ಎಫ್‌ನ ದೌರ್ಜನ್ಯಕ್ಕೆ ಕಡಿವಾಣ ಬಿದ್ದಿತ್ತು. ಇದೀಗ ಮತ್ತೆ ಅದೇ ರೀತಿಯ ಕಿರುಕುಳ ದೌರ್ಜನ್ಯ ಆರಂಭವಾಗಿದೆ. ಇದಕ್ಕೆ ಪೂರಕವೆಂಬಂತೆ ಜನವರಿ 14 ರಂದು ನಾರಾವಿ ಪ್ರದೇಶಕ್ಕೆ ಕೋಬಿಂಗ್‌ಗಾಗಿ ಬಂದ ಎಎನ್‌ಎಫ್ ತಂಡ ಇಲ್ಲಿನ ಮೂಡಾಡಿ ನಿವಾಸಿ ಸುಜಾತ ಹೆಗ್ಡೆ ಎಂಬವರಿಗೆ ಅವಾಚ್ಯ ಶಬ್ದಗಳಿಂದ ಬೈದು ಕೊಲೆಬೆದರಿಕೆ ಒಡ್ಡಿರುವ ಬಗ್ಗೆ ನೊಂದ ಮಹಿಳೆ ವೇಣೂರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಜನವರಿ 14 ರಂದು ಮಧ್ಯಾಹ್ನ 12-30ರ ಸುಮಾರಿಗೆ ಸುಜಾತ ಹೆಗ್ಡೆಯವರ ಮನೆ ಸಮೀಪದ ಗುಡ್ಡದಲ್ಲಿ ನಾಯಿ ಬೊಗಳುವುದನ್ನು ಕೇಳಿ ಸಹೋದರಿ ಪ್ರಜಾತ ಹೆಗ್ಡೆ ಜತೆ ಗುಡ್ಡಕ್ಕೆ ತೆರಳಿದಾಗ ಅಲ್ಲಿದ್ದ ಎಎನ್‌ಎಫ್ ತಂಡದ ಸಿಬ್ಬಂದಿಗಳು ತೀರಾ ಅವಾಚ್ಯವಾಗಿ ಬೈಯ್ದು ನಿಂದಿಸಿದ್ದಲ್ಲದೆ ನಮ್ಮ ಚಲನವಲನಗಳನ್ನು ತಿಳಿದು ಸಂಘಟನೆಗಳಿಗೆ, ಮಾಧ್ಯಮಗಳಿಗೆ ಮಾಹಿತಿ ನೀಡುತ್ತೀರಿ. ನಮ್ಮ ಇಲಾಖೆ ಸೇರಿದಂತೆ ಅರಣ್ಯ ಇಲಾಖೆಯ ವಿರುದ್ಧ ಜನರನ್ನು ಸಂಘಟಿಸುತ್ತಿದ್ದೀರಿ. ಆ ಮೂಲಕ ನಮ್ಮನ್ನು ಎದುರು ಹಾಕಿಕೊಳ್ಳುತ್ತಾ ನಮ್ಮ ಕೆಲಸಕ್ಕೆ ಅಡ್ಡಿ ಪಡಿಸುತ್ತಿದ್ದೀರಿ. ಇನ್ನು ಮುಂದೆ ಈ ರೀತಿಯಾಗಿ ನಡೆದುಕೊಂಡರೆ ವಿಠಲನಿಗೆ ಆದ ಗತಿ ನಿಮಗೂ ಆಗಲಿದೆ.

ನಿಮ್ಮನ್ನು ನಕ್ಸಲ್ ಏಜೆಂಟರೆಂದು ಕೇಸು ದಾಖಲಿಸಬೇಕಾಗುತ್ತದೆ ಎಂದು ಬೆದರಿಕೆಯೊಡ್ಡಿದ್ದಾರೆ. ಇದರಿಂದ ಹೆದರಿದ ಸುಜಾತ ಹೆಗ್ಡೆಯವರು ತನ್ನ ಸಹೋದರಿ ಜೊತೆ ಮನೆಗೆ ಬಂದಾಗ ಅವರನ್ನು ಹಿಂಬಾಲಿಸಿಕೊಂಡು ಬಂದ ಎಎನ್‌ಎಫ್ ಸಿಬ್ಬಂದಿಗಳು ನಮ್ಮನ್ನು ಎದುರು ಹಾಕಿಕೊಂಡರೆ ನಿಮ್ಮ ಸಾವು ನಮ್ಮ ಬಂದೂಕಿನಲ್ಲಿರುತ್ತದೆ ಎಂದು ಕೊಲೆ ಬೆದರಿಕೆ ಒಡ್ಡಿದ್ದಾರೆ ಎಂದು ದೂರಿರುವ ಸುಜಾತ ಹೆಗ್ಡೆಯವರು ಈ ಬಗ್ಗೆ ಸೂಕ್ತ ಕಾನೂನು ಕ್ರಮಕ್ಕಾಗಿ ಪೊಲೀಸರಿಗೆ ದೂರು ನೀಡಿದ್ದಾರೆ. ದೂರಿನ ಪ್ರತಿಯನ್ನು ಪಶ್ಚಿಮವಲಯ ಐಜಿಪಿ, ಜಿಲ್ಲಾ ಎಸ್ಪಿ, ಬಂಟ್ವಾಳ ಎ.ಎಸ್.ಪಿ. ಮತ್ತು ಬೆಳ್ತಂಗಡಿ ಶಾಸಕ ಕೆ. ವಸಂತ ಬಂಗೇರಾರಿಗೆ ನೀಡಿದ್ದಾರೆ.