ಸಾಮಾಜಿಕ ಮತ್ತು ಶೈಕ್ಷಣಿಕ ಸಮೀಕ್ಷೆ: ಸ್ಪಷ್ಟ ಮಾಹಿತಿ ನೀಡಲು ಮನವಿ

ಸುಳ್ಯ: ಕರ್ನಾಟಕ ಸರ್ಕಾರ ಹಮ್ಮಿಕೊಂಡಿರುವ ಸಮಾಜದ ಪ್ರತಿಯೊಬ್ಬರ ಸಾಮಾಜಿಕ ಮತ್ತು ಶೈಕ್ಷಣಿಕ ಸಮೀಕ್ಷೆಯಲ್ಲಿ ಗೌಡ ಜನ ಬಾಂದವರು ಸ್ಪಷ್ಟ ಮಾಹಿತಿಯನ್ನು ನೀಡಬೇಕು ಎಂದು ಸುಳ್ಯ ತಾಲೂಕು ಗೌಡ ಯುವ ಸೇವಾ ಸಂಘದ ಪದಾಧಿಕಾರಿಗಳು ವಿನಂತಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಗೌಡ ಯುವ ಸೇವಾ ಸಂಘದ ಅಧ್ಯಕ್ಷ ದಿನೇಶ್ ಮಡಪ್ಪಾಡಿ, ಮುಖ್ಯವಾಗಿ 6ನೇ ಕಲಂ ಜಾತಿಯನ್ನು ಗೌಡ ಎಂದು ನಮೂದಿಸುವ ಸಂಕೇತ ಸಂಖ್ಯೆ 0380 ಮತ್ತು 10ನೇ ಕಲಂ ಮಾತೃಭಾಷೆ ಎನ್ನುವಲ್ಲಿ ಅರೆಭಾಷೆಯನ್ನು ಮಾತೃಭಾಷೆಯನ್ನಾಗಿ ಮಾತನಾಡುವವರು ಅರೆಭಾಷೆ ಸಂಕೇತಸಂಖ್ಯೆ 13 ಹಾಗೂ ತುಳು ಭಾಷೆಯನ್ನು ಮಾತೃಭಾಷೆಯಲ್ಲಿ ಮಾತಾನಾಡುವವರು ಸಂಕೇತ ಸಂಖ್ಯೆ 11ನ್ನು ಬಳಸಬೇಕು ಮತ್ತು 27ನೇ ಕಲಂ ಕುಲಕಸುಬು ಎನ್ನುವಲ್ಲಿ ’ಕೃಷಿ’ ಸಂಕೇತ ಸಂಖ್ಯೆ 1ನ್ನು ಕಡ್ಡಾಯವಾಗಿ ನಮೂದಿಸಬೇಕು ಹಾಗೂ ಜಾತಿಗೆ ಪರ್ಯಾಯವಾದ ಹೆಸರುಗಳ ಕಲಂ ನಂಬ್ರ ೮ರಲ್ಲಿ ಒಕ್ಕಲಿಗ ಎಂದು ಸಂಕೇತ ಸಂಖ್ಯೆ 1334ನ್ನು ಬರೆಯಬಹುದು. ಈ ಸಮಿಕ್ಷೆಗೆ ಬರುವ ಎನಿಮೇಟರ್‌ಗೆ ಪ್ರತಿಯೊಬ್ಬರು ಸಹಕರಿಸಿ ನಿಖರವಾದ ಮಾಹಿತಿಯನ್ನು ನೀಡಿ ಸಹಕರಿಸಬೇಕೆಂದು ಅವರು ಹೇಳಿದರು.

ಎ. 14: ಬಿಸು ಆಚರಣೆ ಮಾಹಿತಿ ಮತ್ತು ಅಭಿನಂದನೆ.
ಗೌಡ ಯುವ ಸೇವಾ ಸಂಘದ ವತಿಯಿಂದ ಬಿಸು ಆಚರಣೆ ಮಾಹಿತಿ ಕಾರ್ಯಕ್ರಮ ಮತ್ತು ಅಭಿನಂದನಾ ಕಾರ್ಯಕ್ರಮ ಎ. 14ರಂದು ಎಂ.ಜಿ.ಎಂ ಪ್ರೌಢಶಾಲಾ ಸಭಾಂಗಣದಲ್ಲಿ ನಡೆಯಲಿದೆ. ಬಿಸು ಹಬ್ಬದ ಆಚರಣೆ ಬಗ್ಗೆ ಮಾಹಿತಿಯನ್ನು ಉಪನ್ಯಾಸಕಿ ಶ್ರೀಮತಿ ಹರಿಣಾಕ್ಷಿ ಸೀತಾರಾಮ ಕೇವಳ ಇವರು ನೀಡಲಿದ್ದಾರೆ. ಬಳಿಕ ನಡೆಯುವ ಅಭಿನಂದನಾ ಸಮಾರಂಭದಲ್ಲಿ ಅರೆಭಾಷೆ ಸಂಸ್ಕೃತಿ ಮತ್ತು ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷರಾಗಿ ನೇಮಕಗೊಂಡ ಕೊಲ್ಯದ ಗಿರೀಶ್ ಮತ್ತು ಈ ಭಾಗದಿಂದ ನೇಮಕಗೊಂಡ ಸದಸ್ಯರುಗಳನ್ನು ಸುಳ್ಯ ಗೌಡ ಯುವ ಸೇವಾ ಸಂಘದ ವತಿಯಿಂದ ಅಭಿನಂದಿಸಲಾಗುವುದು.

ದ.ಕ ಮತ್ತು ಕೊಡಗು ಗೌಡ ಸಮಾಜ ಸೇವಾ ಸಂಘದ ಅಧ್ಯಕ್ಷ ನಿತ್ಯಾನಂದ ಮುಂಡೋಡಿ ಅಭಿನಂದಿಸಲಿದ್ದಾರೆ ಎಂದು ಗೌಡ ಯುವ ಸೇವಾ ಸಂಘದ ಅಧ್ಯಕ್ಷ ದಿನೇಶ್ ಮಡಪ್ಪಾಡಿ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಪಿ.ಎಸ್.ಗಂಗಾಧರ, ವಸಂತ ಕಿರಿಭಾಗ ಉಪಸ್ಥಿತರಿದ್ದರು.