‘ಸಂಸ್ಕಾರ ವಾಹಿನಿ’ ಬೇಸಿಗೆ ಶಿಬಿರ ಆರಂಭ

ಸುಳ್ಯ: ಸಮೀಪದ ಹಳೆಗೇಟು, ವಿದ್ಯಾನಗರದ ಶ್ರೀ ಕೇಶವಕೃಪಾ ವೇದ ಮತ್ತು ಕಲಾ ಪ್ರತಿಷ್ಠಾನದ ವತಿಯಿಂದ ’ಸಂಸ್ಕಾರ ವಾಹಿನಿ’ ಮಕ್ಕಳ ಬೇಸಿಗೆ ಶಿಬಿರ ಆರಂಭಗೊಂಡೊದೆ.

ಶ್ರೀ ಕೇಶವಕೃಪಾ ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮವನ್ನು ಶಿಬಿರದ ಶಿಬಿರಾರ್ಥಿಗಳಾದ ಶ್ರೀಕೃಷ್ಣ ಪುತ್ತೂರು, ಕೀರ್ತನ ಬೀರಮಂಗಲ, ಅನಘಾ ಸುಳ್ಯ ಹಾಗೂ ಕನ್ನಿಕಾ ಡಿ. ಅಂಬೆಕಲ್ಲು ಜ್ಯೋತಿಯನ್ನು ಬೆಳಗಿಸಿ ಉದ್ಘಾಟಿಸಿದರು. ಜ್ಯೋತಿಷಿ ಶಿವಸುಬ್ರಹ್ಮಣ್ಯ ಭಟ್ ಕರುವಜೆ ಅಧ್ಯಕ್ಷತೆ ವಹಿಸಿದ್ದರು. ಸ್ಕ್ಯಾಡ್ಸ್ ಮಂಗಳೂರು ಇದರ ನಿರ್ದೇಶಕ ಜಯರಾಮ ರೈ ಜಾಲ್ಸೂರು, ಆರ್‌ಎಸ್‌ಎಸ್‌ನ ಪುತ್ತೂರು ಜಿಲ್ಲಾ ವ್ಯವಸ್ಥಾ ಪ್ರಮುಖರಾದ ಶ್ರೀನಿವಾಸ ಉಬರಡ್ಕ ಇವರು ಮುಖ್ಯ ಅತಿಥಿಯಾಗಿದ್ದರು.

ಶಿಬಿರ ಸಂಚಾಲಕ ಪ್ರಕಾಶ್ ಮೂಡಿತ್ತಾಯ ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಸಂಸ್ಕಾರವಾಹಿನಿ ಶಿಬಿರದ ಸಂಚಾಲಕಿ ನಮ್ರತಾ ನಟರಾಜ ಶರ್ಮಾ ವಂದಿಸಿದರು. ಶ್ರೀದೇವಿ ನಾಗರಾಜ ಭಟ್ ನಿರೂಪಿಸಿದರು. ಪ್ರತಿಷ್ಠಾನದ ಅಧ್ಯಕ್ಷ ಪುರೋಹಿತ ನಾಗರಾಜ ಭಟ್ ಶಿಬಿರಾರ್ಥಿಗಳಿಗೆ ಪಠ್ಯ ಪುಸ್ತಕಗಳನ್ನು ವಿತರಿಸಿದರು.

ಒಂದು ವಾರಗಳ ತನಕ ನಡೆಯುವ ಶಿಬಿರದಲ್ಲಿ ಜಿಲ್ಲೆಯ ವಿವಿಧ ಭಾಗಗಳಿಂದ ಸುಮಾರು ೫೦ ಜನ ಶಿಬಿರಾರ್ಥಿಗಳು ಭಾಗವಹಿಸಲಿದ್ದಾರೆ. ಇವರಿಗೆ ಉಚಿತವಾಗಿ ಊಟ, ವಸತಿ, ಪಠ್ಯಪುಸ್ತಕಗಳೊಂದಿಗೆ ಗುಣಮಟ್ಟದ ಶಿಕ್ಷಣ, ಸೃಜನಾತ್ಮಕ ಕಲೆಗಳಾದ ಜಾದೂ, ಮಿಮಿಕ್ರಿ, ಮುಖವಾಡ ತಯಾರಿ, ಪೇಪರ್ ಕಟ್ಟಿಂಗ್, ಕ್ರಾಫ್ಟ್ ಅಲ್ಲದೇ ಕಥೆಗಳು, ಆದರ್ಶ ಪುರುಷರ ಜೀವನ ಚರಿತ್ರೆ ಮುಂತಾದ ವಿಷಯಗಳಲ್ಲಿ ರಾಜ್ಯದ ವಿವಿಧ ಸಂಪನ್ಮೂಲ ವ್ಯಕ್ತಿಗಳು, ಪ್ರತಿಭಾನ್ವಿತ ವೇದ ವಿದ್ವಾಂಸರ ಸಹಕಾರದೊಂದಿಗೆ ಶಿಕ್ಷಣವನ್ನು ನೀಡಲಾಗುತ್ತದೆ ಎಂದು ಪ್ರತಿಷ್ಠಾನದ ಅಧ್ಯಕ್ಷ ಪುರೋಹಿತ ನಾಗರಾಜ ಭಟ್ ಹೇಳಿದರು.