17 ದೇಶ ಸುತ್ತಿದ ಟೀ ಮಾರುವ ವ್ಯಕ್ತಿ!

ಚಹಾ ಮಾರುತ್ತಿದ್ದ ನರೇಂದ್ರ ಮೋದಿ ಈಗ ದೇಶದ ಪ್ರಧಾನಿಯಾಗಿರುವ ವಿಷಯ ಎಲ್ಲರಿಗೂ ಗೊತ್ತಿರುವುದೇ. ಇದೀಗ ಇಲ್ಲೊಬ್ಬ ಚಹಾ ಮಾರಾಟಗಾರ ತನ್ನ ಸ್ಥಿತಿಗತಿಗಳ ನಡುವೆಯೂ ಪತ್ನಿಯೊಂದಿಗೆ ಬರೋಬ್ಬರಿ 17  ದೇಶಗಳನ್ನು ಸುತ್ತಿ ಭಾರೀ ಸುದ್ದಿ ಮಾಡಿದ್ದಾರೆ.

ಕೇರಳದ ಕೊಚ್ಚಿಯ ವಿಜಯನ್ ತಮ್ಮ ಪತ್ನಿ ಮೋಹನ ಅವರೊಂದಿಗೆ 17 ದೇಶಗಳನ್ನು ಸುತ್ತಾಡಿದ್ದಾರೆ. ಚಹಾ ಮಾರುತ್ತಲೇ ಜೀವನ ನಿರ್ವಹಣೆ ಮಾಡುತ್ತಾ ವಿದೇಶಗಳನ್ನು ಸುತ್ತುವ ತಮ್ಮ ಕನಸನ್ನು ಜೀವಂತವಾಗಿರಿಸಿಕೊಂಡವರು ಇವರು.

ದಿನಕ್ಕೆ 2 ಸಾವಿರದಿಂದ 3 ಸಾವಿರದವರೆಗೆ ಸಂಪಾದನೆ ಮಾಡುವ ಇವರು ಪ್ರತಿ ಸಲ ವಿದೇಶಕ್ಕೆ ಹೋದಾಗಲೂ ತನಗೆ ಸ್ಫೂರ್ತಿ ತುಂಬುವ ಪತ್ನಿಯನ್ನು ಜೊತೆಗೇ ಕರೆದುಕೊಂಡು ಹೋಗುತ್ತಾರೆ. ಇವರ ಈ ವಿದೇಶ ಸುತ್ತುವ ಹವ್ಯಾಸವನ್ನು ಕೆಲವರು ಕ್ರೇಝ್ ಎಂದು ಜರೆದರೂ ಅದಕ್ಕೆ ವಿಜಯನ್ ತಲೆಕೆಡಿಸಿಕೊಂಡಿಲ್ಲ.

ಈಗಾಗಲೇ ಇವರು ಭಾರತದಾದ್ಯಂತ ಪ್ರವಾಸ ಮುಗಿಸಿದ್ದು, ಯುಕೆ, ಫ್ರಾನ್ಸ್, ಈಜಿಪ್ಟ್, ಆಸ್ಟ್ರಿಯಾ ಮುಂತಾದೆಡೆ ಹೋಗಿ ಬಂದಿದ್ದಾರೆ.

ತನ್ನ ತಂದೆ ನನಗೆ ಚಿಕ್ಕವನಿದ್ದಾಗ ಎಲ್ಲೆಡೆ ಕರೆದುಕೊಂಡು ಹೋಗುತ್ತಿದ್ದರು. ಅವರ ಕಾಲಾನಂತರ ಸಂಸಾರದ ಜೀವನ ನಿರ್ವಹಣೆಯ ಜವಾಬ್ದಾರಿ ನನ್ನದಾಯಿತು. ಆದರೆ ನನ್ನ ಆಸೆಗಳು ಹಾಗೇ ಜೀವಂತವಾಗಿದ್ದವು. ಸಮಯಾಂತರದಲ್ಲಿ ಚಿಕ್ಕ ಟೀ ಸ್ಟಾಲ್ ಇಂದ ಜೀವನ ನಿರ್ವಹಣೆ ಸರಳವಾಯಿತು. ಉಳಿತಾಯದ ಹಣದಲ್ಲಿ ನನ್ನ ಪ್ರವಾಸ ನನ್ನ ಪತ್ನಿಯೊಂದಿಗೆ ಮುಂದುವರಿಯಿತು. ಬ್ಯಾಂಕ್ ಇಂದ ಸಾಲ ತೆಗೆದು ಒಮ್ಮೆ ಪ್ರವಾಸ ಮಾಡಿ, ನಂತರ ಮೂರು ವರ್ಷಗಳ ಕಾಲ ಕಷ್ಟ ಪಟ್ಟು ಕೆಲಸ ಮಾಡಿ ಅದನ್ನು ತೀರಿಸಿ, ನಂತರ ಮತ್ತೆ ಪ್ರವಾಸ ಮುಂದುವರೆಯುತ್ತದೆ. ಹೀಗೇ 45 ವರ್ಷಗಳಿಂದಲೂ ನಡೆಯುತ್ತಾ ಬಂದಿದೆ. ಚಿಕ್ಕಂದಿನಿಂದಲೂ ನನಗೆ ದೇಶ, ವಿದೇಶ ಸುತ್ತುವ ಆಸೆ ಇತ್ತು. ನನ್ನ ಆತ್ಮಸ್ಥೈರ್ಯ ಇಂದಿಗೂ ನನ್ನ ಆಸೆಗಳನ್ನು ಈಡೇರಿಸುವಂತೆ ಮಾಡಿದೆ. ಹಣ ಮಾಡುವುದೇ ನಮ್ಮ ಏಕೈಕ ಗುರಿಯಾದರೆ ಜೀವನದಲ್ಲಿ ಏನನ್ನೂ ಮಾಡಲು ಸಾಧ್ಯವಿಲ್ಲ  ಎನ್ನುತ್ತಾರೆ ವಿಜಯನ್.

ಎಲ್ಲವನ್ನು ಮಾಡಲು ನಮಗೆ ಒಂದೇ ಒಂದು ಜೀವನವಿರುವುದು. ಯಾವುದಕ್ಕೂ ಹೆಚ್ಚುವರಿ ಸಮಯವನ್ನು ಹೊಂದಿಸಿಕೊಳ್ಳಲು ಸಾಧ್ಯವಿಲ್ಲ. ಕಠಿಣ ಪರಿಶ್ರಮಗಳಿಂದ ಕನಸುಗಳ ಬೆನ್ನಟ್ಟಿದಲ್ಲಿ ಅವು ನನಸಾಗುತ್ತವೆ ಎಂದು ಹೇಳುತ್ತಾರೆ.