ಅಣೆಕಟ್ಟಿಗೆ $ 40 ಮಿಲಿಯನ್ ಸಂಗ್ರಹಿಸಿ $ 63 ಮಿಲಿಯನ್ ಜಾಹೀರಾತಿಗೆ ವ್ಯಯಿಸಿದ ಪಾಕಿಸ್ಥಾನ

ನವದೆಹಲಿ: ಇತ್ತೀಚಿಗಷ್ಟೇ ಸಂಭವಿಸಿದ ಭಾರೀ ಪ್ರವಾಹ ಮತ್ತು ಆರ್ಥಿಕ ಮುಗ್ಗಟ್ಟಿನಿಂದ ತತ್ತರಿಸಿ ಹೋಗಿರುವ ಪಾಕಿಸ್ಥಾನಕ್ಕೆ ದುರಾಡಳಿತವೇ ಮುಳುವಾಗಿರುವುದಂತು ಸತ್ಯ.

ವರದಿಗಳ ಪ್ರಕಾರ, ಸಿಂಧೂ ನದಿಯಲ್ಲಿ ‘ಮೆಗಾ ಅಣೆಕಟ್ಟು’ ನಿರ್ಮಾಣಕ್ಕೆ ಅದು ವಿವಿಧ ಜನರಿಂದ $ 40 ಮಿಲಿಯನ್ ಸಂಗ್ರಹಿಸಿತ್ತು. ಆದರೆ ಅದರ ಜಾಹೀರಾತು ನೀಡಲು ಅದು ಮಾಡಿದ ವೆಚ್ಚ ಬರೋಬ್ಬರಿ $ 63 ಮಿಲಿಯನ್.

ವೈಸ್ ನ್ಯೂಸ್ ವರದಿಯ ಪ್ರಕಾರ, ಸಿಂಧೂ ನದಿಯ ಉದ್ದೇಶಿತ ಡೈಮರ್-ಭಾಶಾ ಅಣೆಕಟ್ಟು ಇದುವರೆಗೆ ಪೂರ್ಣಗೊಂಡಿಲ್ಲ, ಇದು ಹಗರಣದಲ್ಲಿ ಸಿಲುಕಿರುವ ಮೆಗಾ ಅಣೆಕಟ್ಟು ಎಂಬ ಹಣೆಪಟ್ಟಿ ಕಟ್ಟಿಕೊಂಡಿದೆ.

ಪಾಕಿಸ್ತಾನ ಸಂಸದೀಯ ವ್ಯವಹಾರಗಳ ಸಮಿತಿ (ಪಿಎಸಿ) ಪ್ರಕಾರ, ಅಣೆಕಟ್ಟು ನಿರ್ಮಾಣಕ್ಕಾಗಿ ಸಾರ್ವಜನಿಕರಿಂದ $40 ಮಿಲಿಯನ್ ಸಂಗ್ರಹಿಸಲಾಗಿದೆ, ಆದರೆ ಅದರ ಜಾಹೀರಾತಿಗಾಗಿ $63 ಮಿಲಿಯನ್ ಖರ್ಚು ಮಾಡಲಾಗಿದೆ ಎಂದು ವೈಸ್ ನ್ಯೂಸ್ ವರದಿ ಮಾಡಿದೆ.

ಡೈಮರ್-ಭಾಶಾ ಅಣೆಕಟ್ಟು ಕಾಮಗಾರಿಯನ್ನು ಮೂಲತಃ 1980 ರ ದಶಕದಲ್ಲಿ ಪೂರ್ಣಗೊಳ್ಳಲು ಉದ್ದೇಶಿಸಲಾಗಿತ್ತು, ಆದರೆ ಪರಿಸರದ ಪ್ರಭಾವ ಮತ್ತು ಹೆಚ್ಚುತ್ತಿರುವ ವೆಚ್ಚದಂತಹ ಹಲವಾರು ಅಂಶಗಳು ಯೋಜನೆಯನ್ನು ವಿಳಂಬಗೊಳಿಸಿದವು. ಅಣೆಕಟ್ಟು ನಿರ್ಮಾಣವಾದರೆ ಅದು 4,500 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆಯ ಸಾಮರ್ಥ್ಯವನ್ನು ಹೊಂದಿರುತ್ತದೆ.