ಸಮಾಜ ಸೇವೆಗಾಗಿ ಸಮಯ ಮೀಸಲಿರಲಿ

ಪೆರಡಾಲ: ಸಮಾಜ ಸೇವೆಗಾಗಿ ಒಂದಿಷ್ಟಾದರೂ ಹೊತ್ತು ಮೀಸಲಿರಿಸುವುದು ನಮ್ಮೆಲ್ಲರ ಆದ್ಯ ಕರ್ತವ್ಯ. ಅದಕ್ಕಾಗಿ ಸಮಯವನ್ನು ಹುಡುಕಬೇಕಷ್ಟೇ ಹೊರತು ತಾನಾಗಿ ಬರದು. ಸೇವೆಯಿಂದ ಮಾತ್ರ ಬದುಕು ಧನ್ಯವಾಗುವುದು.

ಸ್ಕೌಟ್ಸ್, ಗೈಡ್ಸ್ ಚಳವಳಿ ಅಂತಹ ಸೇವಗೆ ಸಮಯ ಹುಡುಕುವುದಕ್ಕೆ ತರಬೇತಿಯನ್ನು ನೀಡುತ್ತದೆ ಎಂದು ಬದಿಯಡ್ಕ ಗ್ರಾಮ ಪಂಚಾಯತ್‌ನ ಉಪಾಧ್ಯಕ್ಷ ಕೆ ಎನ್ ಕೃಷ್ಣ ಭಟ್ ನುಡಿದರು. ಪೆರಡಾಲ ಸರಕಾರಿ ಪ್ರೌಢ ಶಾಲೆಯಲ್ಲಿ ನಡೆದ ನಾಲ್ಕು ದಿನಗಳ ಭಾರತ್ ಸ್ಕೌಟ್ಸ್ ಮತ್ತು ಗೈಡ್ಸ್ ಕುಂಬಳೆ ಸ್ಥಳೀಯ ಸಂಸ್ಥೆಯ ಪಟಾಲಂ ನಾಯಕರ ತರಬೇತಿ ಶಿಬಿರದ ಸಮಾರೋಪ ಸಮಾರಂಭವನ್ನು ಉದ್ಘಾಟಿಸುತ್ತಾ ಅವರು ಮಾತನಾಡಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಪ್ರೌಢಶಾಲಾ ಮುಖ್ಯೋಪಾಧ್ಯಾಯಿನಿ ವಾರಿಜ, ಮಾಜಿ ರಾಷ್ಟ್ರಪತಿ ಸ್ಕೌಟ್ಸ್‌ನ ಡಾ. ನಾರಾಯಣ ಪ್ರದೀಪ್, ಬಾಲಸುಬ್ರಹ್ಮಣ್ಯ ಅಗಲ್ಪಾಡಿ, ಡಾ. ಯಶಸ್ ಸೈಪಂಗಲ್ಲು, ಡಾ. ನಿಶಾದ್ ಪಿ ಎಂ ಎ, ಕೃಷ್ಣ ಕಿಶೋರ್ ಪೆರ್ಲ, ಜ್ಞಾನದೇವ ಶೆಣೈ ಬದಿಯಡ್ಕ ಮೊದಲಾದವರೇ ಪ್ರಾಯೋಜಿಸಿ ಊಟ-ಉಪಹಾರಗಳನ್ನು ವಿತರಿಸಿರುವುದನ್ನು ಪ್ರತ್ಯೇಕ ಶ್ಲಾಘಿಸಿದರು.

ಮಾಜಿ ಸ್ಕೌಟ್ ವೇಣುಗೋಪಾಲನ್ ನಂಬಿಯಾರ್ ಪ್ರಾಯೋಜಿಸಿದ ಸ್ಮರಣಿಕೆಯನ್ನು ಬದಿಯಡ್ಕ ಗ್ರಾಮ ಪಂಚಾಯತ್‌ನ ಸದಸ್ಯ ಮಂಜುನಾಥ ವಿತರಿಸಿದರು. ಶಿಬಿರಾರ್ಥಿಗಳಿಗೆ ಪ್ರಮಾಣ ಪತ್ರವನ್ನು ಕೆ. ಎನ್. ಕೃಷ್ಣ ಭಟ್ ವಿತರಿಸಿದರು. ಶಾಲಾ ಅಧ್ಯಾಪಕ ಸಂಘದ ಸಂಚಾಲಕ ಚಂದ್ರಹಾಸನ್ ನಂಬಿಯಾರ್, ಶಿಬಿರ ನಾಯಕರಾದ ಸೂರ್ಯನಾರಾಯಣ ಎಚ್. ಕಾರ್ತಿಕ ವಿ. ಎಂ. ಶುಭ ಹಾರೈಸಿದರು.

ಶಾಲೆಯ ಹಿರಿಯ ಅಧ್ಯಾಪಕಿ ಶಾಂತಮಣಿ ಸ್ವಾಗತಿಸಿ ಭಾರತ್ ಸ್ಕೌಟ್ಸ್ ಮತ್ತು ಗೈಡ್ಸ್, ಕುಂಬಳೆಯ ಸ್ಥಳೀಯ ಸಂಸ್ಥೆಯ ಕಾರ್ಯದರ್ಶಿ ವಿಜಯ ಕುಮಾರ್ ಕಾಟುಕುಕ್ಕೆ ವಂದಿಸಿದರು.