ಸಮಾಜದ ಪರಿವರ್ತನೆ ಸರಕಾರಗಳಿಂದ ಸಾಧ್ಯವಿಲ್ಲ

ಬದಿಯಡ್ಕ : ಅನಾಥರ ಪಾಲಿಗೆ ಬೆಳಕಾಗಿ ಅಂಧಕಾರವನ್ನು ನೀಗಿಸುವಲ್ಲಿ ಸಾಯಿರಾಂ ಗೋಪಾಲಕೃಷ್ಣ ಭಟ್ ಸಲ್ಲಿಸುತ್ತಿರುವ ಸೇವೆಯನ್ನು ತಾನೆಲ್ಲಿಯೂ ಈ ತನಕ ನೋಡಿಲ್ಲ.ಬಡವರ ಕಣ್ಣೀರೊರೆಸುವಲ್ಲಿ ತನ್ನ ಜೀವನವನ್ನು ಇತರರಿಗೆ ಮಾದರಿಯಾಗಿಸಿದ ಭಟ್ ಅವರ ಮಾರ್ಗದರ್ಶನ ಇಡೀ ರಾಷ್ಟ್ರಕ್ಕೆ ಸಲ್ಲಬೇಕೆಂದು ಕನ್ನಡ ಅಭಿವೃದ್ದಿ ಪ್ರಾಧಿಕಾರದ ಅಧ್ಯಕ್ಷ ಡಾ.ಎಲ್ ಹನುಮಂತಯ್ಯ ಅಭಿಪ್ರಾಯ ವ್ಯಕ್ತಪಡಿಸಿದರು.

ಜಿಲ್ಲೆಯ ವಿವಿಧ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳಲು ಇತ್ತೀಚೆಗೆ ಆಗಮಿಸಿದ್ದ ಅವರು ಕಿಳಿಂಗಾರು ಸಾಯಿರಾಂ ಗೋಪಾಲಕೃಷ್ಣ ಭಟ್ ರವರನ್ನು ಸಂದರ್ಶಿಸಿ ಬಳಿಕ ನಡೆದ ಉಚಿತವಾಗಿ ಕೊಡಮಾಡುವ 230 ಹಾಗೂ 231 ನೇ ಮನೆಗಳ ಕೀಲಿಕೈ ಹಾಗೂ ಸಾಯಿರಾಂ ಗೋಪಾಲಕೃಷ್ಣ ಭಟ್‌ರ ಪುತ್ರ ಕೆ.ಎನ್ ಕೃಷ್ಣ ಭಟ್ ಕೊಡಮಾಡುವ 6 ಹೊಲಿಗೆ ಯಂತ್ರಗಳನ್ನು ವಿತರಿಸಿ ಅವರು ಮಾತನಾಡುತ್ತಿದ್ದರು.

ಜೀವಮಾನದ ಪುಣ್ಯ ಕೆಲಸದಲ್ಲಿ ಬಡಬಗ್ಗರ,ದೀನರ ಸೇವೆ ಅತ್ಯಂತ ಶ್ರೇಷ್ಠವಾಗಿರುವುದಾಗಿದ್ದು,ರಾಷ್ಟ್ರದ ಪ್ರತಿಯೊಬ್ಬರಲ್ಲೂ ಈ ಮನೋಭಾವ ಮೂಡಿದಾಗ ದೇಶ ಶ್ರೀಮಂತಗೊಳ್ಳುತ್ತದೆ. ಸಮಾಜದ ಪರಿವರ್ತನೆ ಸರಕಾರಗಳಿಂದ ಸಾಧ್ಯವಿಲ್ಲ. ಸನ್ಮನಸ್ಸಿನ ಪ್ರಜೆಗಳ ಕೊಡುಗೆ ಪರಿವರ್ತನೆಗೆ ಕಾರಣವಾಗಿ ಆರ್ತರ ಬದುಕಿನ ಬೆಳಕಾಗುತ್ತದೆಯೆಂದು ಅವರು ತಿಳಿಸಿದರು.

ಮುಖ್ಯ ಅತಿಥಿಗಳಾಗಿ ಉಪಸ್ಥಿತರಿದ್ದ ಮಂಜೇಶ್ವರ ಬ್ಲಾಕ್ ಪಂಚಾಯತ್ ಉಪಾಧ್ಯಕ್ಷ ಹರ್ಷಾದ್ ವರ್ಕಾಡಿ ಮಾತನಾಡಿ ಪ್ರಾರ್ಥಿಸುವ ಕೈಗಳಿಗಿಂತ ಸಹಾಯ ನೀಡುವ ಕೈ ಯಾವತ್ತೂ ಶ್ರೇಷ್ಠ.ಸಾಯಿರಾಂ ಭಟ್ ಸೇವೆ,ಸಹಕಾರದ ಮೂಲಕ ಜಿಲ್ಲೆಯ ಆಸ್ತಿಯಾಗಿ ಹೆಮ್ಮೆಯೆನಿಸಿದ್ದಾರೆಂದು ತಿಳಿಸಿದರು.

ಕರ್ನಾಟಕ ಜಾನಪದ ಪರಿಷತ್ ಕೇರಳ ಗಡಿನಾಡ ಘಟಕಾಧ್ಯಕ್ಷ,ಜಿಲ್ಲಾ ಕಾಂಗ್ರೆಸ್ಸ್ ಸಮಿತಿಯ ಕಾರ್ಯದರ್ಶಿ ಕೇಶವ ಪ್ರಸಾದ ನಾಣಿತ್ತಿಲು ಅಧ್ಯಕ್ಷತೆ ವಹಿಸಿದ್ದರು.ಕುಂಬಳೆ ಮಂಡಲ ಕಾಂಗ್ರೆಸ್ಸ್ ಉಪಾಧ್ಯಕ್ಷ ಲಕ್ಷ್ಮಣ ಪ್ರಭು ಕುಂಬಳೆ,ಜಾನಪದ ಪರಿಷತ್ ಗಡಿನಾಡ ಘಟಕದ ಸದಸ್ಯ ಬಿ.ಬಾಲಕೃಷ್ಣ ಅಗ್ಗಿತ್ತಾಯ,ವಸಂತಕುಮಾರ್ ಸಿ.ಎಚ್,ಬದಿಯಡ್ಕ ಠಾಣಾಧಿಕಾರಿ ಸಂತೋಷ್ ಕುಮಾರ್ ಮೊದಲಾದವರು ಉಪಸ್ಥಿತರಿದ್ದರು.ಕೆ.ಎನ್ ಕೃಷ್ಣ ಭಟ್ ಸ್ವಾಗತಿಸಿ,ವಂದಿಸಿದರು.ಸಾಯಿರಾಂ ಗೋಪಾಲಕೃಷ್ಣ ಭಟ್ ಬಡವರಿಗಾಗಿ ಈಗಾಗಲೇ ೨೨೯ ಮನೆಗಳನ್ನು ಉಚಿತವಾಗಿ ನಿರ್ಮಿಸಿಕೊಟ್ಟಿದ್ದು,ಇದೀಗ ಕೂಡ್ಲು ಶ್ರೀನಿವಾಸ ಭಟ್ ಹಾಗೂ ಕಡೆಕಂಜಿ ಹರೀಶ್ ಎಂಬವರಿಗೆ ಮನೆಗಳನ್ನು ನಿರ್ಮಿಸಿ ನೀಡಲಾಗಿದೆ.

ಸಾಯಿರಾಂ ಭಟ್ ರವರ ಪುತ್ರ,ಬದಿಯಡ್ಕ ಗ್ರಾಮ ಪಂಚಾಯತ್ ಉಪಾಧ್ಯಕ್ಷ ಕೆ.ಎನ್ ಕೃಷ್ಣ ಭಟ್ 212 ಹೊಲಿಗೆ ಯಂತ್ರಗಳನ್ನು ಬಡ ಹೆಣ್ಮಕ್ಕಳಿಗೆ ನೀಡಿ ಸಹಾಯ ಹಸ್ತ ನೀಡುತ್ತಿದ್ದು,ಜೊತೆಗೆ ಉಚಿತವಾಗಿ 9 ಕೊಳವೆ ಬಾವಿಗಳನ್ನೂ ನಿರ್ಮಿಸಿಕೊಟ್ಟಿದ್ದಾರೆ.ಗೀತಾ ಕುದ್ರೆಪ್ಪಾಡಿ,ಜಯಂತಿ ಬಜಕ್ಕೂಡ್ಲು,ಗಿರಿಜಾ ಬಣ್ಪುತ್ತಡ್ಕ,ಕುಸುಮಾ ಕಿಳಿಂಗಾರು,ಲೀಲಾವತಿ ಕುಂಟಾಲುಮೂಲೆ,ಪ್ರೇಮಾ ಪೆರಿಯಡ್ಕ ರವರಿಗೆ ಹೊಲಿಗೆ ಯಂತ್ರ ಖರೀದಿಸಲು ಚೆಕ್ ವಿತರಿಸಲಾಯಿತು.