ರಾಷ್ಟ್ರೀಯ ಹೆದ್ದಾರಿ 75 ರಲ್ಲಿ ಅಪಘಾತ : ಓರ್ವ ಮೃತ

ಬಂಟ್ವಾಳ :  ಬಿ.ಸಿ.ರೋಡ್-ಪಾಣೆಮಂಗಳೂರು ರಾಷ್ಟ್ರೀಯ ಹೆದ್ದಾರಿಯ ನೇತ್ರಾವತಿ ಸೇತುವೆಯಲ್ಲಿ ಶನಿವಾರ ಮಧ್ಯಾಹ್ನ ಟವೆರಾ ಹಾಗೂ ಟ್ಯಾಂಕರ್ ಲಾರಿ ಡಿಕ್ಕಿಯಾಗಿ ಓರ್ವ ಮೃತಪಟ್ಟಿದ್ದು, ಮೂವರು ಗಂಭೀರ ಗಾಯಗೊಂಡಿದ್ದಾರೆ. ಭಟ್ಕಳ ಮೂಲದ ರಿಯಾಜ್ (26) ಮೃತ ವ್ಯಕ್ತಿ. ಗಾಯಾಳುಗಳಾದ ಪಾಣೆಮಂಗಳೂರು, ಹಿತ್ತಿಲು ಗುಡ್ಡೆ ನಿವಾಸಿ ಅಬ್ದುಲ್ ಲತೀಫ್ ಮಕ್ಕಳಾದ ಖಾದರ್ (13), ರಿಜ್ವಾನ್ (14) ಮತ್ತು ನಝೀರ್ ಎಂಬವರ ಮಗ ರಾಝಿಕ್ (13) ರನ್ನು ಮಂಗಳೂರು ಖಾಸಗಿ ಆಸ್ಪತ್ರೆಗೆ ಸಾಗಿಸಲಾಗಿದೆ.

ಟ್ಯಾಂಕರ್ ಚಾಲಕ ಗಂಗಾಧರ್ ನೀಡಿದ ದೂರಿನಂತೆ ಟವೆರಾ ಚಾಲಕ ಮಹಮ್ಮದ್ ಮುಸ್ತಫ ಎಂಬವರ ವಿರುದ್ಧ ನಗರ ಠಾಣಾ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಟವೆರಾದಲ್ಲಿ ಜಖಂಗೊಂಡಿದ್ದ ಪ್ರಯಾಣಿಕರನ್ನು ಹೊರ ತೆಗೆಯಲು ಪೊಲೀಸರು ಹಾಗೂ ಸ್ಥಳೀಯರು ಸಾಹಸ ಪಟ್ಟರು. ಸ್ಕ್ರೇನ್ ಮೂಲಕ ಹೊರ ತೆಗೆಯಲಾದ ಟವೆರಾ ಭಾಗಶಃ ನುಜ್ಜು ಗುಜ್ಜಾಗಿದೆ. ಅಬ್ದುಲ್ ಲತೀಫ್ ಮಗಳ ಗಂಡನಾದ ರಿಯಾಜ್, ಪಾಣೆಮಂಗಳೂರು ಮಾವ ಮನೆಗೆ ತನ್ನ ಸಂಬಂಧಿಕರೊಂದಿಗೆ ಬಂದಿದ್ದರು. ಟವೆರಾ ವಾಹನದಲ್ಲಿ ಶುಕ್ರವಾರ ರಾತ್ರಿ ಅಜಿಲಮೊಗರು ಉರೂಸ್‌ಗೆ ತೆರಳಿದ್ದರು. ಶನಿವಾರ ಮಧ್ಯಾಹ್ನ ಮನೆಮಂದಿ ಮಲಗಿದ್ದ ವೇಳೆ ಟವೆರಾದಲ್ಲಿ ಮೂವರು ಬಾಲಕರನ್ನು ಕುಳ್ಳಿರಿಸಿ ಬಿ.ಸಿ.ರೊಡಿನ ಕರೆತರಲಾಗಿದ್ದು, ದಾರಿ ಮಧ್ಯೆ ಅಪಘಾತಕ್ಕೀಡಾಗಿದೆ.

ಸೇತುವೆಯಲ್ಲಿ ವಾಹನವೊಂದನ್ನು ಓವರ್‌ಟೇಕ್ ಮಾಡುವ ಭರದಲ್ಲಿ ವೇಗವಾಗಿ ಚಲಾಯಿಸಿದ ಟವೆರಾ, ಮಂಗಳೂರಿನಿಂದ ಚಲಾಯಿಸಿದ್ದ ಟ್ಯಾಂಕರ್ ಲಾರಿಗೆ ಡಿಕ್ಕಿಯಾಗಿದೆ. ಹೊಡೆತದ ತೀವ್ರತೆಗೆ ಟವೆರಾ ಟ್ಯಾಂಕರ್‌ದ ಚಕ್ರದಡಿ ನುಳಿಸಿಕೊಂಡಿದೆ. ಟವೆರಾದಲ್ಲಿದ್ದ ಓರ್ವ ಪ್ರಯಾಣಿಕ ರಿಯಾಜ್ ಸ್ಥಳದಲ್ಲೇ ಮೃತಪಟ್ಟಿದ್ದು, ಮೂವರು ಬಾಲಕರನ್ನು ತಕ್ಷಣ ಮಂಗಳೂರು ಖಾಸಗಿ ಆಸ್ಪತ್ರೆಗೆ ಸಾಗಿಸಲಾಯಿತು. ಗಂಭೀರ ಗಾಯಗೊಂಡಿರುವ ಬಾಲಕರನ್ನು ತುರ್ತು ನಿಗಾ ಘಟಕದಲ್ಲಿಡಲಾಗಿದೆ ಎಂದು ನಗರ ಠಾಣಾ ಪೊಲೀಸರು ತಿಳಿಸಿದ್ದಾರೆ. ಘಟನೆಯಿಂದಾಗಿ ಸೇತುವೆಯಲ್ಲಿ ಕೆಲವು ತಾಸು ವಾಹನ ಸಂಚಾರ ಸ್ಥಗಿತಗೊಂಡಿದ್ದು, ಸ್ಥಳಕ್ಕೆ ಆಗಮಿಸಿದ ನಗರ ಠಾಣಾಧಿಕಾರಿ ಎಂ.ಎಂ.ನಂದಕುಮಾರ್ ಮತ್ತವರ ಸಿಬ್ಬಂದಿಗಳು ಪರಿಸ್ಥಿತಿಯನ್ನು ನಿಯಂತ್ರಿಸಿದರು.