’ವೇಣೂರು ಕ್ಷೇತ್ರ ಮಹಾತ್ಮೆ’ ಯಕ್ಷಗಾನ ಕೃತಿ ಬಿಡುಗಡೆ

ಬೆಳ್ತಂಗಡಿ: ಕಲೆಗಳನ್ನು, ಕಲಾವಿದರನ್ನು ಪ್ರೋತ್ಸಾಹಿಸುವುದು ಅಜಿಲ ಸೀಮೆಯ ಪರಂಪರೆಯೇ ಆಗಿದೆ. ಯಕ್ಷಗಾನದ ಮೂಲಕ ಕ್ಷೇತ್ರಗಳ ಪರಿಚಯವನ್ನು ಜನರ ಮುಂದಿಡುವುದು ಒಂದು ಸಾಧನೆ ಆಗಿದೆ ಎಂದು ಅಳದಂಗಡಿ ಅರಮನೆಯ ತಿಮ್ಮಣ್ಣರಸರಾದ ಡಾ. ಪದ್ಮಪ್ರಸಾದ್ ಹೇಳಿದರು.

ಅವರು ಆದಿತ್ಯವಾರ ವೇಣೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಸಭಾಭವನದಲ್ಲಿ ಹಾಸ್ಯಗಾರ ವೇಣೂರು ದಿ. ಸುಂದರ ಆಚಾರ್ಯ ವೇದಿಕೆಯಲ್ಲಿ ವೇಣೂರು ವಾಮನ್ ಕುಮಾರ್ ಅವರ ಯಕ್ಷ ದಿಗ್ವಿಜಯದ ರಜತ ಸಂಭ್ರಮವನ್ನು ಉದ್ಘಾಟಿಸಿ ಹಾಗೂ ಅವರು ರಚಿಸಿದ ವೇಣೂರು ಕ್ಷೇತ್ರ ಮಹಾತ್ಮೆ ಎಂಬ ಪ್ರಸಂಗದ ಕೃತಿಯನ್ನು ಬಿಡುಗಡೆಗೊಳಿಸಿ ಮಾತನಾಡಿದರು.

ವಾಮನ್ ಕುಮಾರ್ ಅವರು ವೇಣೂರಿನ ಹೆಸರನ್ನು ಪಸರಿಸುವ ಕೆಲಸ ಮಾಡುತ್ತಿದ್ದಾರೆ. ಅಜಿಲ ಸೀಮೆ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದವರನ್ನು ನಾಡಿಗೆ ನೀಡಿದೆ. ಅದೇ ರೀತಿ ಇವರು ಸೀಮೆಯ ರತ್ನ ಎಂದು ಶ್ಲಾಘಿಸಿದರು.

ಅತಿಥಿಯಾಗಿದ್ದ ಯಕ್ಷಗಾನ ಅಕಾಡೆಮಿಯ ಸದಸ್ಯ, ಐದು ಮೇಳಗಳ ಯಜಮಾನ ಕಿಶನ್ ಹೆಗ್ಡೆ ಅವರು ಕ್ಷೇತ್ರಗಳ ಮಹಾತ್ಮೆಯನ್ನು ರಚಿಸುವಾಗ ಅಷ್ಟ ಮಂಗಳ ಪ್ರಶ್ನೆಯನ್ನಿಡುವುದು ಉಚಿತ ಎಂದರು.

ವೇದಿಕೆಯಲ್ಲಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಆಡಳಿತಾಧಿಕಾರಿ ಜಯಕೀರ್ತಿ ಜೈನ್, ದೇಗುಲ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಕೆ.ವಿಶ್ವನಾಥ್ ಪೈ, ಕಲಾವಿದ ಡಿ.ಮನೋಹರ್ ಕುಮಾರ್ ಇದ್ದರು. ಪ್ರಸಂಗ ಕರ್ತೃ ಹಿರಿಯಡ್ಕ ಮೇಳದಲ್ಲಿ ಕಲಾವಿದರಾಗಿರುವ ವಾಮನ್ ಕುಮಾರ್ ವೇಣೂರು ಹಾಗೂ ಪದ್ಯ ರಚನಾಕಾರ ಎಂ.ಕೆ.ರಮೇಶ್ ಆಚಾರ್ಯ ಅವರನ್ನು ಸನ್ಮಾನಿಸಲಾಯಿತು.

ಎಚ್.ಕೆ.ನಯನಾಡು ಕಾರ್ಯಕ್ರಮ ನಿರ್ವಹಿಸಿ, ಕಡಬ ದಿನೇಶ್ ರೈ ಸ್ವಾಗತಿಸಿದರು. ವೇಣೂರು ಅಶೋಕ್ ದೇವಾಡಿಗ ವಂದಿಸಿದರು. ಬಳಿಕ ವೇಣೂರು ಕ್ಷೇತ್ರ ಮಹಾತ್ಮೆ ಯಕ್ಷಗಾನ ಬಯಲಾಟ ನಡೆಯಿತು.