ಕ್ಯಾಮೆರಾಗಳನ್ನು ಹೊಂದಲಿವೆ ಸಿಆರ್­ಪಿಎಫ್ ಶ್ವಾನಗಳು

ನವದೆಹಲಿ: ಜಮ್ಮು ಮತ್ತು ಕಾಶ್ಮೀರ ಮತ್ತು ನಕ್ಸಲ್ ಪೀಡಿತ ಪ್ರದೇಶದಲ್ಲಿ ನಿಯೋಜಿಸಲಾದ ಸಿಆರ್­ಪಿಎಫ್ ಪಡೆಯ ಶ್ವಾನಗಳಿಗೆ ಕ್ಯಾಮೆರಾಗಳನ್ನು ಅಳವಡಿಸಲು ನಿರ್ಧರಿಸಲಾಗಿದೆ.

ವರದಿಗಳ ಪ್ರಕಾರ, ಸಿಆರ್­ಪಿಎಫ್ ಆರಂಭದಲ್ಲಿ 25 ಪೊಲೀಸ್ ಡಾಗ್ ಕ್ಯಾಮೆರಾಗಳನ್ನು ಖರೀದಿಸಲಿದೆ. ಈ ಕ್ಯಾಮೆರಾಗಳನ್ನು ಖರೀದಿಸುವ ಪ್ರಕ್ರಿಯೆಯನ್ನು ಈಗಾಗಲೇ ಪ್ರಾರಂಭಿಸಲಾಗಿದೆ.

ಕಳೆದ ಕೆಲವು ತಿಂಗಳುಗಳಿಂದ, ಸಿಆರ್­ಪಿಎಫ್ ಈ ಕ್ಯಾಮೆರಾಗಳ ಬಗ್ಗೆ ಸಂಶೋಧನೆ ನಡೆಸುತ್ತಿದೆ. ಈ ವೇಳೆ ಕ್ಯಾಮೆರಾಗಳ ಕಾರ್ಯಾಚರಣೆಯಲ್ಲಿ ಸಮಸ್ಯೆಗಳನ್ನು ಕಂಡುಹಿಡಿದಿದೆ. ಈ ಸಮಸ್ಯೆಗಳನ್ನು ಬಗೆಹರಿಸಿಯೇ 25 ಪೊಲೀಸ್ ಡಾಗ್ ಕ್ಯಾಮೆರಾಗಳನ್ನು ಖರೀದಿಸುವ ಪ್ರಕ್ರಿಯೆಯನ್ನು ಆರಂಭಿಸಲಾಗಿದೆ. ತನ್ನ K 9 ಘಟಕಕ್ಕೆ ಈ ಕ್ಯಾಮೆರಾಗಳನ್ನು ಖರೀದಿಸಿದ ಮೊದಲ ಭಾರತೀಯ ಪಡೆ ಎಂಬ ಹೆಗ್ಗಳಿಕೆಗೆ ಸಿಆರ್­ಪಿಎಫ್  ಪಾತ್ರವಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಕ್ಯಾಮೆರಾಗಳನ್ನು ಶ್ವಾನಗಳ ಹಿಂಭಾಗದಲ್ಲಿ ಇರಿಸಲಾಗುತ್ತದೆ. ಶ್ವಾನಗಳು ಏನನ್ನು ಗಮನಿಸುತ್ತಿವೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ಈ ಕ್ಯಾಮೆರಾಗಳು ಹ್ಯಾಂಡ್ಲರ್‌ಗಳಿಗೆ ಸಹಾಯ ಮಾಡುತ್ತದೆ. ಈ ಕ್ಯಾಮೆರಾಗಳು  ಹೈ ಡೆಫಿನಿಷನ್, ವಾಟರ್-ಪ್ರೂಫ್ ಮತ್ತು ಸ್ಕ್ರ್ಯಾಚ್-ರೆಸಿಸ್ಟೆಂಟ್ ಸೇರಿದಂತೆ ಅನೇಕ ಗುಣಗಳನ್ನು ಹೊಂದಿವೆ.

ಸಿಆರ್­ಪಿಎಫ್ ಅಧಿಕಾರಿಗಳ ಸಮಿತಿಯು ಪೊಲೀಸ್ ಡಾಗ್ ಕ್ಯಾಮೆರಾದ ಅನೇಕ ಮಾದರಿಗಳನ್ನು ವಿಶ್ಲೇಷಿಸುತ್ತದೆ.

“ಶ್ವಾನಗಳು ಮತ್ತು ತರಬೇತುದಾರರಿಗೆ ಈ ಯುದ್ಧ ತಾಂತ್ರಿಕ ಎಲೆಕ್ಟ್ರಾನಿಕ್ ಸಾಧನದ ಮೂಲಭೂತ ತರಬೇತಿಯ ಅಗತ್ಯವಿರುತ್ತದೆ. ಹ್ಯಾಂಡ್ಲರ್­ಗಳು ಔಟ್­ಪುಟ್ ಸಾಧನವನ್ನು ಹೊಂದಿರಲಿದ್ದು, ಅಲ್ಲಿ ಅವರು ಈ ಕ್ಯಾಮೆರಾಗಳ ಫೀಡ್ ಅನ್ನು ದೂರದಿಂದ ವೀಕ್ಷಿಸಬಹುದು. ಸಿಬ್ಬಂದಿಯನ್ನು ಕಾರ್ಯಾಚರಣೆಗೆ ಇಳಿಸುವ ಮೊದಲೇ ಪರಿಸ್ಥಿತಿಯನ್ನು ವಿಶ್ಲೇಷಿಸಲು ಈ ಕ್ಯಾಮೆರಾ ಸಹಾಯಕವಾಗಲಿದೆ “ಎಂದು ಹಿರಿಯ ಸಿಆರ್­ಪಿಎಫ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ.