ಎಸೆಯಲ್ಪಟ್ಟ ಬಾಟಲಿಗಳನ್ನು ಕಲಾಕೃತಿಗಳನ್ನಾಗಿಸುವ ಮಂಗಳೂರಿನ ಕಲಾವಿದೆ

ಮಂಗಳೂರು: ಸ್ವಚ್ಛತೆಯ ಮಹತ್ವವನ್ನು ಸಾರುವ ಸಲುವಾಗಿ ಮತ್ತು ಸೃಜನಶೀಲತೆಯನ್ನು ಉತ್ತೇಜಿಸುವ ಸಲುವಾಗಿ ಕಲಾವಿದೆ ಮೇಘಾ ಮೆಂಡನ್ ಅವರು ಬಳಸಿ ಎಸೆಯಲ್ಪಟ್ಟ ಬಾಟಲಿಗಳನ್ನು ಸುಂದರ ಕಲಾಕೃತಿಗಳನ್ನಾಗಿಸುವ ಬಗ್ಗೆ ವಿದ್ಯಾರ್ಥಿಗಳಿಗೆ 5 ದಿನಗಳ ಕಲಾ ಶಿಬಿರವನ್ನು ಆಯೋಜನೆಗೊಳಿಸಿದ್ದರು, ಬಳಿಕ ಅಲ್ಲಿ ತಯಾರಾದ ಕಲಾಕೃತಿಗಳ ಪ್ರದರ್ಶನವನ್ನು ಸೋಮವಾರ ಏರ್ಪಡಿಸಿದ್ದರು.

ಪ್ರದರ್ಶನದಲ್ಲಿ ಸುಮಾರು 200 ಮರು ರಚಿತ ಬಾಟಲಿಗಳ ಕಲಾಕೃತಿಗಳನ್ನು ಪ್ರದರ್ಶನಗೊಳಿಸಲಾಯಿತು. ಈ ಶಿಬಿರದಲ್ಲಿ ಸುಮಾರು 28 ವಿದ್ಯಾರ್ಥಿಗಳು ಮತ್ತು ಗೃಹಿಣಿಯರು ಭಾಗಿಯಾಗಿದ್ದರು.

ವಾಸ್ತುಶಿಲ್ಪಿ ವಿದ್ಯಾರ್ಥಿಯಾಗಿರುವ ಮೆಂಡನ್ ಅವರು, ತಮ್ಮ ಶಿಬಿರಾರ್ಥಿಗಳೊಂದಿಗೆ ಮೊದಲು ತಣ್ಣೀರು ಬಾವಿ ಬೀಚ್­ಗೆ ತೆರಳಿ ಅಲ್ಲಿ ಎಸೆಯಲ್ಪಟ್ಟಿದ್ದ ಬಾಟಲಿಗಳನ್ನು ಸಂಗ್ರಹಿಸಿದರು. ಬಳಿಕ ಬಾಟಲಿಗಳಿಗೆ ಪೇಯಿಂಟ್ ಮಾಡಿ, ಅದರೊಳಗೆ ಎಲ್­ಇ­ಡಿ ಬಲ್ಬ್­ಗಳನ್ನು ಇಟ್ಟು ಅದನ್ನು ಆಕರ್ಷಕವಾಗಿಸಿದರು. ಅಷ್ಟೇ ಅಲ್ಲದೆ ವಿವಿಧ ರೀತಿಯಲ್ಲಿ ತ್ಯಾಜ್ಯಗಳನ್ನು ಹೇಗೆ ಆಕರ್ಷಕವಾಗಿಸಬಹುದೆಂಬುದನ್ನು  ವಿದ್ಯಾರ್ಥಿಗಳಿಗೆ ಹೇಳಿಕೊಟ್ಟರು.

ಸ್ವಚ್ಛತೆಯ ಬಗ್ಗೆ ಅರಿವು ಮೂಡಿಸುವ ಸಲುವಾಗಿ ಬೀಚ್­ಗಳಲ್ಲಿ ಎಸೆಯಲ್ಪಟ್ಟ ಬಾಟಲಿಗಳನ್ನೇ ಬಳಸಿಕೊಂಡಿರುವುದಾಗಿ ಮೆಂಡನ್ ಹೇಳಿದ್ದಾರೆ. ಪ್ರತಿ ಬಾರಿ ಬೀಚ್­ಗೆ ತೆರಳಿದಾಗಲೂ ಅವರು ಪ್ಲಾಸ್ಟಿಕ್ ಬಾಟಲಿಗಳನ್ನು ಅಲ್ಲಿಂದ ಹೆಕ್ಕಿ ತಂದು ಕಲಾಕೃತಿಗಳನ್ನಾಗಿ ಪರಿವರ್ತನೆಗೊಳಿಸುತ್ತಾರೆ.

ಪ್ಲಾಸ್ಟಿಕ್, ಗ್ಲಾಸ್ ಬಾಟಲಿಗಳನ್ನು ಎಸೆಯದೆ ಬೀಚ್­ಗಳನ್ನು ಸ್ವಚ್ಛವಾಗಿಟ್ಟುಕೊಳ್ಳಿ ಎಂದು ಎಲ್ಲರಿಗೂ ಮನವಿ ಮಾಡಿಕೊಳ್ಳುವ ಅವರು, ಗಾಜಿನ ಚೂರುಗಳನ್ನೂ ಬೀಚ್ ಬದಿಗಳಲ್ಲಿ ಎಸೆಯಬೇಡಿ ಇದರಿಂದ ಜನರಿಗೆ, ಪ್ರಾಣಿಗಳಿಗೆ ಅಪಾಯವಾಗುತ್ತದೆ ಎಂದು ಕಿವಿಮಾತು ಹೇಳಿದ್ದಾರೆ.

ಮೆಂಡನ್ ಅವರು ತಮ್ಮ ಪ್ರತಿಭೆಯ ಮೂಲಕ ತ್ಯಾಜ್ಯವನ್ನು ಸುಂದರ ಕಲಾಕೃತಿಯಾಗಿ ಹೇಗೆ ಪರಿವರ್ತಿಸಬೇಕು ಎಂಬುದನ್ನು ತೋರಿಸುತ್ತದೆ.