ಬೆಳ್ತಂಗಡಿ :ತಿರುಗಾಟವನ್ನು ಮುಗಿಸಿ ಪತ್ತನಾಜೆಯಂದು ಸಂಭ್ರಮದ ಮೆರವಣಿಗೆ

ಬೆಳ್ತಂಗಡಿ : ವೃಷಭ ಮಾಸದ ಹತ್ತನೇ ದಿನ ಪತ್ತನಾಜೆಯೆಂದೇ ಪ್ರತೀತಿ. ಕಾರ್ತಿಕ ಮಾಸದಲ್ಲಿ ಆರಂಭಗೊಳ್ಳುವ ಹಿಂದೂ ದೇವಾಲಯ, ದೈವಾಲಯಗಳಲ್ಲಿ ವಿಶೇಷ ಸೇವೆ, ಉತ್ಸವ, ನೇಮಗಳು ಪತ್ತನಾಜೆಯಂದು ಸಮಾಪನಗೊಳ್ಳುತ್ತದೆ. ಗರ್ಭಗುಡಿಯಿಂದ ಹೊರಬರುವ ದೇವರ ಉತ್ಸವ, ಬಲಿ ಮೂರ್ತಿ ಪತ್ತನಾಜೆಯಂದು ದೇವರು ಒಳಗಾಗುವ ಮೂಲಕ ಸಮಾಪ್ತಿಯಾಗುತ್ತದೆ.

ಶ್ರೀಕ್ಷೇತ್ರ ಧರ್ಮಸ್ಥಳದ ಶ್ರೀ ಮಂಜುನಾಥ ಸ್ವಾಮಿ ಸನ್ನಿಧಿಯಲ್ಲಿ ಕಾರ್ತಿಕ ಲಕ್ಷದೀಪೋತ್ಸವದಿಂದ ಪ್ರಾರಂಭಗೊಳ್ಳುವ ವಿಶೇಷ ಸೇವೆ ಉತ್ಸವಗಳಿಗೆ ಪತ್ತನಾಜೆಯಂದು ತೆರೆ ಬೀಳುತ್ತದೆ. ಶ್ರೀ ಮಂಜುನಾಥ ಸ್ವಾಮಿಗೆಉತ್ಸವ ಬಲಿ, ವಸಂತ ಪೂಜೆ, ಅಷ್ಠಾವಧಾನ ಸೇವೆ ನಡೆದು ಧ್ವಜಮರ ಅವರೋಹಣದೊಂದಿಗೆ ಉತ್ಸವಗಳು ಸಮಾಪನಗೊಳ್ಳುತ್ತವೆ.

ಶ್ರೀ ಮಂಜುನಾಥೇಶ್ವರ ಕೃಪಾಪೋಷಿತ ಯಕ್ಷಗಾನ ಮಂಡಳಿ ತನ್ನ ಪ್ರಸಕ್ತ ಸಾಲಿನ ತಿರುಗಾಟವನ್ನು ಮುಗಿಸಿ ಪತ್ತನಾಜೆಯಂದು ಸಂಜೆ ವಾಸ್ತವ್ಯದ ಬಿಡಾರದಿಂದ ಸಂಭ್ರಮದ ಮೆರವಣಿಗೆಯಲ್ಲಿ ಕ್ಷೇತ್ರ ಪ್ರವೇಶಿಸಿತು. ಮೇಳದ ಶ್ರೀ ಮಹಾಗಣಪತಿಯನ್ನು ವೈಭವದ ಮೆರವಣಿಗೆಯಲ್ಲಿ ಸ್ವಾಗತಿಸಲಾಯಿತು.

ಮೆರವಣಿಗೆಯಲ್ಲಿ ಕ್ಷೇತ್ರದ ಸರ್ವಾಲಂಕೃತ ಆನೆ, ಬಸವ, ವಾದ್ಯಮೇಳ, ನಾಸಿಕ್ ಬ್ಯಾಂಡ್, ಸ್ಯಾಕ್ಸೋಫೋನ್, ನಾಗಸ್ವರ, ಶಂಖ, ಜಾಗಟೆ, ಕೇರಳದ ಚೆಂಡೆ ಮೇಳ, ಹೂವಿನ ಕೋಲು ವಿಶೇಷ ಆಕರ್ಷಣೆಗಳು ಮೆರವಣಿಗೆಗೆ ಶೋಭೆ ನೀಡಿತ್ತು.

ಧರ್ಮಾಧಿಕಾರಿಡಾ| ಡಿ. ವೀರೇಂದ್ರ ಹೆಗ್ಗಡೆಯವರು, ಹೇಮಾವತಿ ಹೆಗ್ಗಡೆಯವರು, ಡಿ. ಹರ್ಷೇಂದ್ರಕುಮಾರ್, ಸುಪ್ರಿಯಾ ಹರ್ಷೇಂದ್ರಕುಮಾರ್, ಮಾನ್ಯ, ಸೀತಾರಾಮ ತೋಳ್ಪಾಡಿತ್ತಾಯ, ಎನ್. ಆರ್. ಉಡುಪ, ಕ್ಷೇತ್ರದ ಸಿಬಂದಿ ವರ್ಗ, ನಾಗರಿಕರು ಹಾಗೂ ಭಕ್ತಾದಿಗಳು ಭಾಗವಹಿಸಿದ್ದರು.

ಮೇಳದ ಗಣಪತಿಯನ್ನು ಛತ್ರಗಣಪತಿ ಸನ್ನಿಧಿಗೆ ಕೊಂಡೊಯ್ದುಅಲ್ಲಿ ಮಹಾ ಮಂಗಳಾರತಿ, ಪ್ರಸಾದ ವಿತರಣೆ ನಡೆಯಿತು. ಪತ್ತನಾಜೆ ಪ್ರಯುಕ್ತ ಭಕ್ತರಿಂದ ಪ್ರವಚನ ಮಂಟಪದಲ್ಲಿ ಭಜನಾಕಾರ್ಯಕ್ರಮ ನಡೆಯಿತು.