ಬಿಹಾರದ ಈಶಾನ್ಯ ಭಾಗದಲ್ಲಿರುವ ಗ್ರಾಮ ಕೈತಾಡೌ ಎಂಬ ಬುಡಕಟ್ಟು ಗ್ರಾಮ ದನಗಳ ಕಳ್ಳತನದಿಂದ ತತ್ತರಿಸಿ ಹೋಗಿತ್ತು. ದನಗಳ ಕಳ್ಳ ಸಾಗಾಣೆದಾರರು ಸಕ್ರಿಯರಾಗಿದ್ದು ನಿರಂತರವಾಗಿ ದನಗಳು ಕಳ್ಳತನವಾಗುತ್ತಿದ್ದವು. ಆದರೆ ಇನ್ನು ಮುಂದೆ ಈ ಗ್ರಾಮಸ್ಥರಿಗೆ ತಮ್ಮ ದನಗಳ ಕಳ್ಳತನದ ಬಗ್ಗೆ ಹೆಚ್ಚಿನ ಚಿಂತೆ ನಡೆಸುವ ಅಗತ್ಯವಿಲ್ಲ. ಯಾಕೆಂದರೆ ಇಲ್ಲಿನ ಪೂರ್ಣಿಯಾ ಜಿಲ್ಲೆಯ 12 ನೇ ತರಗತಿಯ ವಿದ್ಯಾರ್ಥಿಯೊಬ್ಬ ದನಗಳಿಗೆಂದೇ ಸುರಕ್ಷಿತ ಹಗ್ಗವೊಂದನ್ನು ವಿನ್ಯಾಸಗೊಳಿಸಿದ್ದಾನೆ. ಈತ ವಿನ್ಯಾಸಗೊಳಿಸಿದ ಹಗ್ಗ ಕೊಟ್ಟಿಗೆಗಳಿಂದ ದನಗಳು ಕಳ್ಳತನವಾಗುವುದನ್ನು ತಡೆಯಲಿವೆ.
17 ವರ್ಷದ ರಾಜೇಶ್ ಹನ್ಸ್ಡಾ ಈ ಸುರಕ್ಷಿತ ಹಗ್ಗವನ್ನು (safety rope) ಕಂಡುಹಿಡಿದಿದ್ದು, ಇದು ದನಗಳ ಕಳ್ಳ ಸಾಗಾಣೆದಾರರನ್ನು ಹತ್ತಿಕ್ಕುತ್ತದೆ ಎಂಬ ಭರವಸೆ ನೀಡಿದ್ದಾನೆ.
‘ನಮ್ಮ ಗ್ರಾಮದ ಜನರು ಗೋ ಕಳ್ಳತನದಿಂದ ಬೇಸತ್ತಿದ್ದನ್ನು ನಾನು ನೋಡಿದ್ದೇನೆ. ನಮ್ಮದೇ ಕುಟುಂಬಕ್ಕೆ ಸೇರಿದ ಎರಡು ಕೋಣಗಳು ಮತ್ತು ಮೂರು ದನಗಳು ಕಳ್ಳತನವಾದಾಗ ನನ್ನ ತಂದೆ ಮತ್ತು ಚಿಕ್ಕಪ್ಪನ ಕಣ್ಣೀರನ್ನು ನೋಡಿದ್ದೇನೆ. ಇದು ನನ್ನನ್ನು ತೀವ್ರ ಸಂಕಷ್ಟಕ್ಕೀಡು ಮಾಡಿತ್ತು. ಅಂದೇ ನಾನು ಈ ಸಮಸ್ಯೆಗೊಂದು ಪರಿಹಾರ ಕಂಡುಹಿಡಿಯಬೇಕೆಂದು ನಿರ್ಧರಿಸಿದ್ದೆ. ಇದರ ಪ್ರಯತ್ನವೇ ಈ ಸುರಕ್ಷಿತ ಹಗ್ಗ’ ಎಂದು ಹೇಳುತ್ತಾನೆ ರಾಜೇಶ್.
ಈ ಹಗ್ಗವು 12 ವೋಲ್ಟ್ ಬ್ಯಾಟರಿ ಮೂಲಕ ಕಾರ್ಯ ನಿರ್ವಹಿಸುತ್ತದೆ. ಇದರಲ್ಲಿ ಇನ್ಸ್ಯುಲೇಟೆಡ್ ಕಾಪರ್ ಅಥವಾ ಅಲ್ಯುಮಿನಿಯಂ ವೈರ್ ಮತ್ತು ಒಂದು ರಿಲೇ, ಒಂದು ಡಿಯೋಡ್ (ಒಂದೇ ದಿಕ್ಕಿನಲ್ಲಿ ಕರೆಂಟ್ ಸರಾಗವಾಗಿ ಹರಿಯುವಂತೆ ಮಾಡುವ ಎರಡು ಟರ್ಮಿನಲ್ಸ್ಗಳಿರುವ ಸೆಮಿಕಂಡಕ್ಟರ್) ಇದೆ. ಈ ಸರ್ಕ್ಯುಟ್ ಪೂರ್ಣಗೊಂಡ ಬಳಿಕ ಇದನ್ನು ಅಲಾರಾಂಗೆ ಲಿಂಕ್ ಮಾಡಲಾಗಿದೆ. ಈ ಹಗ್ಗವನ್ನು ಜಾನುವಾರುಗಳಿಗೆ ಅಳವಡಿಸಲಾಗುತ್ತದೆ. ಒಂದು ವೇಳೆ ಕಳ್ಳರು ಈ ಹಗ್ಗವನ್ನು ಬಿಚ್ಚಿದರೆ ಅಥವಾ ಕತ್ತರಿಸಿದರೆ ಅದು ಅಲಾರಾಂ ಶಬ್ದವನ್ನು ಉಂಟು ಮಾಡುತ್ತದೆ. ಇದರಿಂದ ಕಳ್ಳರು ಸಿಕ್ಕಿ ಬೀಳುತ್ತಾರೆ. ಈ ಡಿವೈಸ್ ಅಷ್ಟೇನೂ ದುಬಾರಿಯಲ್ಲ. ಕೇವಲ ಬ್ಯಾಟರಿಯನ್ನು ಮಾತ್ರ ಖರೀದಿ ಮಾಡಬೇಕಾಗುತ್ತದೆ.
ಈತನ ಈ ಹಗ್ಗದ ಮಾಡೆಲ್‌ನ್ನು 5 ನೇ ರಾಷ್ಟ್ರೀಯ ಮಟ್ಟದ ಪ್ರದರ್ಶನ ಮತ್ತು ಪ್ರಾಜೆಕ್ಟ್ ಸ್ಪರ್ಧೆಯಲ್ಲಿ ಪ್ರದರ್ಶಿಸಲಾಗಿದ್ದು, ಇದಕ್ಕೆ ಭಾರೀ ಶ್ಲಾಘನೆಗಳು ವ್ಯಕ್ತವಾಗಿದೆ. ಅಷ್ಟೇ ಅಲ್ಲದೆ, ರಾಜೇಶ್ ಹನ್ಸ್ಡಾನಿಗೆ ಜಪಾನ್ಗೆ ಭೇಟಿ ಕೊಡುವ ಅವಕಾಶವನ್ನು ನೀಡಿದ್ದು, ರಾಜೇಶ್ ಮೇ 27 ರಂದು ಜಪಾನ್ಗೆ ಭೇಟಿ ನೀಡಿ ಜೂನ್ 4 ರಂದು ವಾಪಾಸ್ ಬಂದಿದ್ದಾನೆ.
ಕೃಷ್ಣಗಂಜ್ ಕಚೇರಿಯ ಬಿಎಸ್‌ಎಫ್ ವರದಿಯ ಪ್ರಕಾರ ಲಕ್ಷಗಟ್ಟಲೆ ಗೋವುಗಳು ಈ ಸುತ್ತಮುತ್ತಲ ಪ್ರದೇಶಗಳಿಂದ ಕಳ್ಳತನವಾಗಿ ಬಾಂಗ್ಲಾದೇಶಕ್ಕೆ ಸಾಗಿಸಲ್ಪಡುತ್ತಿವೆ. ಪ್ರತಿ ವರ್ಷ 25 ಸಾವಿರದಷ್ಟು ಗೋವುಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗುತ್ತದೆ.
ಇದೀಗ ರಾಜೇಶ್ ಹನ್ಸ್ಡಾ ಕಂಡುಹಿಡಿದಿರುವ ವಿನೂತನ ಹಗ್ಗ ಈ ಪ್ರದೇಶದ ಜನರಿಗೆ ಗೋ ಕಳ್ಳರಿಂದ ಬಚಾವಾಗಲು ಸಿಕ್ಕ ವರದಾನವಾಗಿದೆ.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
