ಏಷ್ಯಾದ ಅತೀ ಕಿರಿಯ ಸ್ನಾತಕೋತ್ತರ ಪದವೀಧರೆ ನೈನಾ ಜೈಸ್ವಾಲ್

ತಮ್ಮ 16ನೇ ವಯಸ್ಸಿನಲ್ಲಿ ಎಸ್‌ಎಸ್‌ಎಲ್‌ಸಿ, 20ನೇ ವಯಸ್ಸಿನಲ್ಲಿ ಪದವಿ ಪಡೆಯುವುದು ಇಂದು ಸರ್ವೇ ಸಾಮಾನ್ಯ. ಅತೀ ಜಾಣ ವಿದ್ಯಾರ್ಥಿಗಳು 18ನೇ ವಯಸ್ಸಿನಲ್ಲಿ ಪದವಿ ಪಡೆಯುವುದೂ ಇದೆ.

ಆದರೆ ಹೈದರಾಬಾದ್‌ನ ನೈನಾ ಜೈಸ್ವಾಲ್ ತನ್ನ 16ನೇ ವಯಸ್ಸಿನಲ್ಲೇ ಸ್ನಾತಕೋತ್ತರ ಪದವಿಯನ್ನೂ ಪಡೆದಿದ್ದಾಳೆ. ಓದಿನ ಜೊತೆಗೆ ಟೇಬಲ್-ಟೆನ್ನಿಸ್ ಆಡಲು ಇಷ್ಟಪಡುವ ಪ್ರತಿಭಾವಂತ ವಿದ್ಯಾರ್ಥಿನಿ ನೈನಾ, ಕೇವಲ ಭಾರತದಲ್ಲಿ ಮಾತ್ರವಲ್ಲದೇ ಏಷ್ಯಾದಲ್ಲೇ ಅತೀ ಕಿರಿಯ ಸ್ನಾತಕೋತ್ತರ ಪದವೀಧರೆ ಎನಿಸಿಕೊಂಡಿದ್ದಾಳೆ.

ಆಕೆಯ ವಯಸ್ಸಿನವರು ಈಗ 10ನೇ ತರಗತಿ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದರೆ, ಆಕೆ ತನ್ನ 8ನೇ ವಯಸ್ಸಿನಲ್ಲೇ ಬೋರ್ಡ್ ಪರೀಕ್ಷೆಯಲ್ಲಿ ಉನ್ನತ ಶ್ರೇಣಿಯಲ್ಲಿ ಉತ್ತೀರ್ಣಳಾಗಿದ್ದಳು. 10ನೇ ವಯಸ್ಸಿನಲ್ಲಿ ಸೇಂಟ್ ಮೇರಿಸ್ ಕಾಲೇಜಿನಿಂದ 12ನೇ ತರಗತಿ ಪೂರ್ಣಗೊಳಿಸಿದ್ದ ನೈನಾ, 13ನೇ ವಯಸ್ಸಿನಲ್ಲಿ ಭಾರತದ ಅತಿ ಕಿರಿಯ ಪತ್ರಿಕೋದ್ಯಮ ಪದವೀಧರೆ ಆಗಿದ್ದಳು. 15ರಲ್ಲಿ ಓಸ್ಮಾನಿಯಾ ವಿಶ್ವವಿದ್ಯಾಲಯದಿಂದ ಸ್ನಾತಕೋತ್ತರ ಪದವಿಯನ್ನೂ ಪಡೆದಳು. ಮುಂದೇನು ಎನ್ನುವಷ್ಟರಲ್ಲಿ ಈಗ ಪಿ.ಎಚ್‌ಡಿ.ಗೆ ತಯಾರಿ ನಡೆಸುತ್ತಿದ್ದಾಳೆ.

ಕೇವಲ ಓದು ಮಾತ್ರವಲ್ಲದೇ ಜಾಗತಿಕ ಮಟ್ಟದಲ್ಲಿ ಟಾಪ್ ಟೇಬಲ್-ಟೆನ್ನಿಸ್ ಆಟಗಾರ್ತಿಯಾಗಿರುವ ನೈನಾ, ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರಶಸ್ತಿಗಳನ್ನು ಗೆದ್ದುಕೊಂಡಿದ್ದಾಳೆ. ಜೊತೆಗೆ ಓರ್ವ ನಿಪುಣ ಪಿಯಾನೋ ವಾದಕಿಯೂ ಹೌದು. ಈಕೆ ಹಲವು ಹಾಡುಗಳನ್ನೂ ರಚಿಸಿದ್ದಾಳೆ.

ನೈನಾ ಜೈಸ್ವಾಲ್‌ಳಂತೆ ಆಕೆಯ ಸಹೋದರ 11 ವರ್ಷದ ಅಗಸ್ತ್ಯ ಜೈಸ್ವಾಲ್ ಈಗಾಗಲೇ 12ನೇ ತರಗತಿ ಪರೀಕ್ಷೆ ಬರೆದಿದ್ದಾನೆ. ಈತ ಸೇಂಟ್ ಮೇರಿಸ್ ಕಾಲೇಜಿನ ಕಾಮರ್ಸ್ ವಿದ್ಯಾರ್ಥಿ.