ಇಂದು ವರ್ಲ್ಡ್ ರೆಡ್ ಕ್ರಾಸ್ ಮತ್ತು ರೆಡ್ ಕ್ರೆಸೆಂಟ್ ಡೇ

ಅಂತಾರಾಷ್ಟ್ರೀಯ ರೆಡ್ ಕ್ರಾಸ್ ಮತ್ತು ರೆಡ್ ಕ್ರೆಸೆಂಟ್ ಚಳುವಳಿಯ ಧ್ಯೇಯಗಳನ್ನು ಆಚರಿಸುವುದಕ್ಕಾಗಿ ಪ್ರತಿವರ್ಷ ಮಾರ್ಚ್ 8ರಂದು ವರ್ಲ್ಡ್ ರೆಡ್ ಕ್ರಾಸ್ ಮತ್ತು ರೆಡ್ ಕ್ರೆಸೆಂಟ್ ಡೇಯನ್ನು ಆಚರಿಸಲಾಗುತ್ತದೆ. ರೆಡ್‌ಕ್ರಾಸ್ ಅಂತಾರಾಷ್ಟ್ರೀಯ ಸಮಿತಿಯ ಸಂಸ್ಥಾಪಕ ಹೆನ್ರಿ ಡುನಂಟ್ ಅವರ ಜನ್ಮದಿನವೂ ಇದಾಗಿದೆ. ತಮ್ಮ ಮಾನವತಾ ಕಾರ್ಯಕ್ಕಾಗಿ ಮೊದಲ ನೋಬೆಲ್ ಶಾಂತಿ ಪುರಸ್ಕಾರವನ್ನು ಪಡೆದ ಹೆಗ್ಗಳಿಕೆ ಹೆನ್ರಿ ಅವರದ್ದು.

1948ರ ಮೇ 8ರಂದು ಮೊತ್ತ ಮೊದಲ ಬಾರಿಗೆ ರೆಡ್‌ಕ್ರಾಸ್ ಡೇಯನ್ನು ಆಚರಿಸಲಾಯಿತು. ಬಳಿಕ 1984ರಲ್ಲಿ ಇದರ ಹೆಸರನ್ನು ಬದಲಾಯಿಸಿ ‘ಇಂಟರ್‌ನ್ಯಾಷನಲ್ ರೆಡ್‌ಕ್ರಾಸ್ ಆಂಡ್ ರೆಡ್ ಕ್ರೆಸೆಂಟ್ ಡೇ’ ಎಂದು ಕರೆಯಲಾಯಿತು.

ಇಂಟರ್‌ನ್ಯಾಷನಲ್ ಕಮಿಟಿ ಆಫ್ ರೆಡ್ ಕ್ರಾಸ್ ಖಾಸಗಿ ಮಾನವತಾ ಸಂಸ್ಥೆಯಾಗಿ 1863ರಲ್ಲಿ ಸ್ವಿಟ್ಜರ್‌ಲ್ಯಾಂಡ್‌ನ ಜಿನೆವಾದಲ್ಲಿ ಹೆನ್ರಿ ಡುನಂಟ್ ಮತ್ತು ಗಸ್ಟವೆ ಎಂಬುವವರಿಂದ ಸ್ಥಾಪನೆಗೊಂಡಿತು. ಯುದ್ಧಪೀಡಿತ ಜನರ ಬದುಕು ಮತ್ತು ಗೌರವವನ್ನು ಕಾಪಾಡುವ ಧ್ಯೇಯವನ್ನು ಇಟ್ಟುಕೊಂಡ ಈ ಸಂಸ್ಥೆ ಆರಂಭದಲ್ಲಿ 25 ಸದಸ್ಯರನ್ನು ಒಳಗೊಂಡಿತ್ತು, ವಿಶ್ವಶಾಂತಿಗಾಗಿ ಶ್ರಮಿಸಿದ ಈ ಸಂಸ್ಥೆಗೆ 1917, 1944, 1963ರಲ್ಲಿ ಒಟ್ಟು ಮೂರು ನೋಬೆಲ್ ಶಾಂತಿ ಪುರಸ್ಕಾರಗಳು ಲಭಿಸಿವೆ.

ಅಂತಾರಾಷ್ಟ್ರೀಯ ರೆಡ್‌ಕ್ರಾಸ್ ಮತ್ತು ರೆಡ್ ಕ್ರೆಸೆಂಟ್ ಚಳುವಳಿ ಎಂಬುದು ಒಂದು ಅಂತಾರಾಷ್ಟ್ರೀಯ ಮಟ್ಟದ ಮಾನವತಾ ಚಳುವಳಿ. 97 ಮಿಲಿಯನ್ ಸ್ವಯಂಸೇವಕರು, ಸದಸ್ಯರು, ಸಿಬ್ಬಂದಿಗಳು ಜಗತ್ತಿನಾದ್ಯಂತ ಈ ಚಳುವಳಿಯ ಯಶಸ್ಸಿಗಾಗಿ ಶ್ರಮಿಸುತ್ತಿದ್ದಾರೆ. ಮಾನವನ ಬದುಕು, ಆರೋಗ್ಯದ ರಕ್ಷಣೆಗಾಗಿ, ಎಲ್ಲಾ ಜೀವಿಯ ಗೌರವವನ್ನು ಎತ್ತಿಹಿಡಿಯುವ ಸಲುವಾಗಿ, ಮಾನವ ಸಂಕಷ್ಟಗಳನ್ನು ನಿರ್ಮೂಲನೆ ಮಾಡುವ ಗುರಿಯೊಂದಿಗೆ ಹುಟ್ಟಿಕೊಂಡ ಚಳುವಳಿ ಇದಾಗಿದೆ.

ಈ ಚಳುವಳಿ ವಿವಿಧ ಪ್ರತ್ಯೇಕ ಸಂಸ್ಥೆಗಳನ್ನು ಒಳಗೊಂಡಿದೆ, ಇದು ಕಾನೂನಾತ್ಮಕವಾಗಿ ಒಂದರಿಂದ ಒಂದು ಸ್ವತಂತ್ರ ಸಂಸ್ಥೆಯಾದರೂ ಚಳುವಳಿಯ ಮೂಲ ತತ್ವ, ಉದ್ದೇಶ, ಚಿಹ್ನೆ, ಸ್ಥಾನಮಾನ, ಆಡಳಿತ ಮಂಡಳಿಯ ಅಧೀನದಲ್ಲಿ ಪರಸ್ಪರ ಒಗ್ಗಟ್ಟಿನಿಂದ ಕಾರ್ಯನಿರ್ವಹಿಸುತ್ತದೆ.

ಮೊದಲ ವಿಶ್ವಯುದ್ಧ, ಎರಡನೇ ವಿಶ್ವಯುದ್ಧದ ಸಂದರ್ಭ ರೆಡ್‌ಕ್ರಾಸ್ ನಿರ್ವಹಿಸಿದ ಕಾರ್ಯ ನಿಜಕ್ಕೂ ಶ್ಲಾಘನೀಯ. ಶಸ್ತ್ರಾಸ್ತ್ರಗಳ ಕಾಳಗದಲ್ಲಿ ಗಾಯಗೊಂಡು ನರಲಾಡಿದ ಜನರ, ಸೈನಿಕರ ಉಪಚಾರವನ್ನು ಮಾಡಿ, ಸೂಕ್ತ ಸಂದರ್ಭದಲ್ಲಿ ಅವರಿಗೆ ಚಿಕಿತ್ಸೆ ನೀಡಿ ಎಡೆಬಿಡದೆ ಶ್ರಮಿಸಿದವರು ಒಂದು ಲಕ್ಷಕ್ಕೂ ಅಧಿಕ ರೆಡ್‌ಕ್ರಾಸ್ ಸ್ವಯಂಸೇವಕರು.

ಜನರ ಉದ್ಧಾರಕ್ಕಾಗಿ ಸಲ್ಲಿಸಿದ ಅಪಾರ ಸೇವೆಗಾಗಿ ರೆಡ್‌ಕ್ರಾಸ್ ಖ್ಯಾತಿಯನ್ನು ಪಡೆದಿದೆ. ಅದರ ಧ್ಯೇಯ ಉದ್ದೇಶಗಳ ಗುರಿ ಸಾಧನೆಗಾಗಿ ಇಂದು ’ಇಂಟರ್‌ನ್ಯಾಷನಲ್ ರೆಡ್‌ಕ್ರಾಸ್ ಆಂಡ್ ರೆಡ್ ಕ್ರೆಸೆಂಟ್ ಡೇ’ಯನ್ನು ಆಚರಿಸಲಾಗುತ್ತದೆ.