ನಂತೂರು ಪ್ರದೇಶಕ್ಕೆ ಕುಡಿಯುವ ನೀರಿನ ವ್ಯವಸ್ಥೆ ಮಾಡಲು ಮನಪಾ ವಿಫಲ

ಮಂಗಳೂರು : ಮಂಗಳೂರು ಮಹಾನಗರ ಪಾಲಿಕೆಯಿಂದ ನೀರಿಗಾಗಿ ಒಂದಷ್ಟು ಕೋಟಿಗಟ್ಟಲೆ ಹಣ ಬರುತ್ತದೆ. ಅದನ್ನು ದುರುಪಯೋಗ ಮಾಡುತ್ತಿದ್ದಾರೆ. ಮಂಗಳೂರು ಮಹಾನಗರ ಪಾಲಿಕೆಯಲ್ಲಿ ಅದನ್ನು ಸರಿಯಾಗಿ ಬಳಕೆ ಮಾಡುತ್ತಿಲ್ಲ. ಅದಕ್ಕಾಗಿ ಜನರು ಆಕ್ರೋಶ ಭರಿತರಾಗಿದ್ದಾರೆ ಎಂದು ಮಾಜಿ ಕೊರ್ಪರೇಟ್ ಜಯಂತಿ ಬಿ. ಶೆಟ್ಟಿಯವರು ಆರೋಪಿಸಿದರು.

ನಂತೂರು ಪ್ರದೇಶದ ಕುಡಿಯುವ ನೀರಿನ ಸಮಸ್ಯೆಗಾಗಿ ಮಹಾನಗರ ಪಾಲಿಕೆ ಎದುರು ನಡೆದ ಪ್ರತಿಭಟನೆಯಲ್ಲಿ ಮಾತನಾಡಿದ ಅವರು, ಸುಮಾರು 50 ವರ್ಷದ ಹಿಂದೆ ಪೆನಲ್ ಬೋರ್ಡ್ ಅಳವಡಿಸಿದ ಕಾರಣ ಅಲ್ಲಿ ಒಂದು ಬೋರ್‌ವೆಲ್‌ನಿಂದ ಕುಡಿಯುವ ನೀರು ಸರಬರಾಜು ಆಗುತ್ತಿತ್ತು. ಆ ಸಂದರ್ಭದಲ್ಲಿ ಯಾವುದೇ ರೀತಿಯ ನೀರಿನ ಸಮಸ್ಯೆ ಎದುರಾಗುತ್ತಿರಲಿಲ್ಲ. ಆದರೆ ಇತ್ತೀಚಿನ ದಿನಗಳಲ್ಲಿ ಸರಿಯಾಗಿ ನಿರ್ವಹಣೆ ಮಾಡದ ಕಾರಣ ಮೊಟರ್‌ಗಳು ದುರಸ್ಥಿ ಸ್ಥಿತಿಯಲ್ಲಿರುವುದರಿಂದ ಈ ಪ್ರದೇಶಗಳಿಗೆ ಕುಡಿಯುವ ನೀರಿನ ಸಮರ್ಪಕ ಸರಬರಾಜು ಆಗುತ್ತಿಲ್ಲವೆಂದು ಆರೋಪಿಸಿದರು.

ಸಿಪಿಐ(ಎಂ) ಪಕ್ಷದ ನಂತೂರು ಪ್ರದೇಶದ ಶಾಖಾ ಕಾರ್ಯದರ್ಶಿ ಲಿಂಗಪ್ಪ ನಂತೂರು ಮಾತನಾಡುತ್ತಾ, ದಿನದ 24 ಗಂಟೆಯೂ ಕುಡಿಯುವ ನೀರನ್ನು ಜನರಿಗೆ ಕೊಡುತ್ತೇವೆ ಎಂದು ಹೇಳಿ ಜನರಿಂದ ಮತವನ್ನು ಗಳಿಸಿ ಇಲ್ಲಿಯ ಸ್ಥಳೀಯ ಪ್ರತಿನಿಧಿ ಹಲವಾರು ಸಮಯಗಳಿಂದ ಈ ಪ್ರದೇಶಗಳಿಗೆ ಸರಿಯಾಗಿ ಒಂದು ಗಂಟೆ ಕೂಡ ಕುಡಿಯುವ ನೀರಿನ ವ್ಯವಸ್ಥೆ ಮಾಡಲು ವಿಫಲರಾಗಿದ್ದಾರೆ. ಮಲ್ಲಿಕಟ್ಟೆಯಿಂದ ನಂತೂರು ರಸ್ತೆಯು ಅಗಲೀಕರಣ ಮತ್ತು ಅಭಿವೃದ್ದಿ ಆಗುವ ಈ ಸಂದರ್ಭದಲ್ಲಿ ಆ ಪ್ರದೇಶದಲ್ಲಿದ್ದ ಪಂಪ್‌ಹೌಸನ್ನು ತೆಗೆದುದರಿಂದ ನಂತೂರಿನ ಸುತ್ತಮುತ್ತಲಿರುವ ಪ್ರದೇಶಗಳು ಎತ್ತರದ ಪ್ರದೇಶವಾಗಿರುವುದರಿಂದ ನೀರು ಸರಾಗವಾಗಿ ಹರಿಯಲು ಅಸಾಧ್ಯವಾಗುತ್ತದೆ.

ಆದುದರಿಂದ ಈ ಪ್ರದೇಶಗಳಿಗೆ ನೀರು ಸರಾಗವಾಗಿ ಹರಿಯಲು ಹೊಸ ಮೋಟರ್ ಅಳವಡಿಸಿ ಈ ಪ್ರದೇಶದ ಜನರಿಗೆ ಕುಡಿಯುವ ನೀರನ್ನು ಒದಗಿಸುವುದು ಈ ಪ್ರದೇಶದ ಸ್ಥಳೀಯ ಪ್ರತಿನಿಧಿ ಆಧ್ಯ ಕರ್ತವ್ಯವಾಗಿದೆ ಎಂದು ತಿಳಿಸಿದರು. ಅದೇ ರೀತಿ ಈ ಪ್ರದೇಶಕ್ಕೆ ನೀರಿನ ಸಂಪರ್ಕಕ್ಕಾಗಿ ಅಳವಡಿಸಿದಂತಹ ನೀರಿನ ಪೈಪ್‌ಗಳು 45 ವರ್ಷಗಳ ಹಿಂದಿನ ಕಾಲದಾಗಿರುವುದರಿಂದ ಪೈಪ್‌ಗಳು ತುಕ್ಕು ಹಿಡಿದು ಹೋಗಿದೆ. ಶೀಘ್ರವೇ ಹೊಸ ಮೋಟರ್ ಮತ್ತು ಪೈಪ್‌ಗಳನ್ನು ಅಳವಡಿಸಿ ಜನರಿಗೆ ಕುಡಿಯುವ ನೀರಿನ ಸಮರ್ಪಕ ವ್ಯವಸ್ಥೆ ಮಾಡಬೇಕಾಗಿ ಸಿಪಿಐ(ಎಂ) ನಂತೂರು ಶಾಖೆ ಆಗ್ರಹಿಸಿದೆ ಎಂದು ತಿಳಿಸಿದರು. ಪ್ರತಿಭಟನೆಯ ಬಳಿಕ ಶಾಸಕರಿಗೆ, ಆಯುಕ್ತರಿಗೆ ಮೇಯರ್ ಮೂಲಕ ಮನವಿ ಸಲ್ಲಿಸಲಾಯಿತು.

ಪ್ರತಿಭಟನೆಯ ಸಭೆಯಲ್ಲಿ ಥೋಮಸ್ ನಂತೂರು, ಶಶಿಕಲಾ ನಂತೂರು, ಅಶ್ವಿನಿ ನಂತೂರು, ಸವಿತ ನಂತೂರು, ವಸಂತಿ ನಂತೂರು, ಶಶಿಕಲಾ ಮೂಡುಶೆಡ್ಡೆ, ಪ್ರಶಾಂತ್ ಎಂ.ಬಿ, ತಿಮ್ಮಯ್ಯ ಕೊಂಚಾಡಿ, ಬೇಬಿ ತಣ್ಣೀರುಬಾವಿ, ಶಮೀಮಬಾನು, ಉಮಾಶಂಕರ್, ರವಿ ಉರ್ವಾಸ್ಟೋರ್ ಮತ್ತಿತರರು ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು. ಥೋಮಸ್ ನಂತೂರು ಧನ್ಯವಾದ ಸಲ್ಲಿಸಿದರು.