1989ರ ನವೆಂಬರ್ 15ರಂದು ಪಾಕಿಸ್ಥಾನದ ಕರಾಚಿಯಲ್ಲಿ ಮೊದಲ ಬಾರಿಗೆ ಬಿಳಿ ಟಿಶರ್ಟ್ ಧರಿಸಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಜಗತ್ತಿಗೆ ಪಾದಾರ್ಪಣೆ ಮಾಡಿದ 16 ಹರೆಯದ ಪೋರನೊಬ್ಬ ಮುಂದೊಂದು ದಿನ ಕ್ರಿಕೆಟ್ ಜಗತ್ತಿನ ಸಾಮ್ರಾಟನಾಗುತ್ತಾನೆ ಎಂದು ಯಾರೂ ಊಹಿಸಿರಲಿಕ್ಕಿಲ್ಲ. ಆದರೆ ಆ ಪೋರನಿಗೆ ಮಾತ್ರ ಅಂತಹುದೊಂದು ಕನಸಿತ್ತು, ಕ್ರಿಕೆಟ್ ದೊರೆಯಾಗಿ ಮೆರೆಯಬೇಕೆಂಬ ಅದಮ್ಯ ಆಕಾಂಕ್ಷೆಯಿತ್ತು, ಗುರಿಯಿತ್ತು. ಯಶಸ್ಸಿನ ಒಂದೊಂದೆ ಮೆಟ್ಟಿಲನ್ನೇರುವ ಮೂಲಕ ಆತ ತನ್ನ ಗುರಿಯನ್ನು ತಲುಪಿಯೇ ಬಿಟ್ಟ.
ಹೌದು, ಆತನೇ ಕ್ರಿಕೆಟ್ ಲೋಕದ ಮಿನುಗು ತಾರೆ ಸಚಿನ್ ತೆಂಡೂಲ್ಕರ್, ಅಭಿಮಾನಿಗಳ ಪಾಲಿನ ಕ್ರಿಕೆಟ್ ದೇವರು. ಎ.24, 1973ರಲ್ಲಿ ಜನಿಸಿದ ಇವರು 11ನೇ ವಯಸ್ಸಿಗೆ ಕ್ರಿಕೆಟ್ ಲೋಕಕ್ಕೆ ಪಾದಾರ್ಪಣೆ ಮಾಡಿದವರು. ಅಲ್ಲದೇ ಕ್ರಿಕೆಟ್ ಸಾಮ್ರಾಜ್ಯವನ್ನು ಬರೋಬ್ಬರಿ 24 ವರ್ಷಗಳ ಕಾಲ ಆಳಿದವರು. ಶತಕಗಳ ಶತಕ ಪೂರೈಸಿದ ಜಗತ್ತಿನ ಏಕೈಕ ಆಟಗಾರ ಎಂಬ ದಾಖಲೆ ಬರೆದವರು. ಏಕದಿನ ಪಂದ್ಯದಲ್ಲಿ ದ್ವಿಶತಕ ಬಾರಿಸುವುದನ್ನು ಮೊದಲು ಜಗತ್ತಿಗೆ ತೋರಿಸಿಕೊಟ್ಟವರು.
ಸಚಿನ್ ಎಂದರೆ ದಾಖಲೆ, ದಾಖಲೆ ಎಂದರೆ ಸಚಿನ್ ಎಂಬಷ್ಟು ದಾಖಲೆಗಳ ಮೇಲೆ ದಾಖಲೆ ಬರೆದ ಇವರು ಟೆಸ್ಟ್ ಕ್ರಿಕೆಟ್‌ನಲ್ಲಿ 15,921, ಏಕದಿನದಲ್ಲಿ 18,426ಪಡೆದು ಸಾರ್ವಕಾಲಿಕ ಶ್ರೇಷ್ಠ ಕ್ರಿಕೆಟಿಗ ಎಂಬ ಹೆಗ್ಗಳಿಕೆ ಪಾತ್ರರಾಗಿದ್ದಾರೆ.
ಭಾರತದ ಅತ್ಯುನ್ನತ ನಾಗರಿಕ ಪ್ರಶಸ್ತಿ ಭಾರತ ರತ್ನ ಪಡೆದಿರುವ ಸಚಿನ್ , ಕ್ರೀಡಾಕ್ಷೇತ್ರದ ಸಾಧನೆಗೆ ಈ ಪ್ರಶಸ್ತಿಯನ್ನು ಪಡೆದ ಮೊದಲ ವ್ಯಕ್ತಿ ಎನಿಸಿಕೊಂಡಿದ್ದಾರೆ. ಕ್ರಿಕೆಟ್ ಆಟಕ್ಕೆ ಅವರು ನಿವೃತ್ತಿಯನ್ನು ಘೋಷಿಸಿದರೂ ಕ್ರಿಕೆಟ್ ರಸಿಕರು ಮಾತ್ರ ಅವರನ್ನು ಮರೆತಿಲ್ಲ. ಕ್ರೀಡಾ ಜಗತ್ತಿನೊಂದಿಗಿನ ತಮ್ಮ ನಂಟನ್ನು ಸಚಿನ್ ಕೂಡ ಹಾಗೆಯೇ ಉಳಿಸಿಕೊಂಡಿದ್ದಾರೆ. ಇಂದಿಗೂ ಅವರು ಅಭಿಮಾನಿಗಳ ಪಾಲಿನ ಕ್ರಿಕೆಟ್ ಸಾಮ್ರಾಟ.
ಕ್ರಿಕೆಟ್‌ನ್ನು ಬಲುವಾಗಿ ಪ್ರೀತಿಸುವ ಭಾರತೀಯರಿಗೆ ಸಚಿನ್ ಒಬ್ಬ ಹೀರೋ ಆಗಿದ್ದಾರೆ. ಇಂದು 42ನೇ ವಸಂತಕ್ಕೆ ಕಾಲಿಡುತ್ತಿರುವ ಅವರ ಕ್ರೀಡಾ ಸಾಧನೆ ಎಲ್ಲರಿಗೂ ಸ್ಫೂರ್ತಿಯಾಗಲಿ, ಅವರ ಸುಧೀರ್ಘ ಕ್ರಿಕೆಟ್ ಅನುಭವ ಯುವ ಪೀಳಿಗೆಗೆ ಮಾದರಿಯಾಗಲಿ, ಅವರಂತಹ ಮಹಾನ್ ಕ್ರೀಡಾಳುಗಳು ಮತ್ತೆ ಮತ್ತೆ ನಮ್ಮ ನೆಲದಲಿ ಹುಟ್ಟಲಿ ಎಂದು ಆಶಿಸೋಣ.
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
