ಸ್ವಚ್ಛ ಭಾರತದಿಂದ ಪ್ರೇರಿತನಾಗಿ ಆಡು, ಆಭರಣ ಮಾರಿ ಶೌಚಾಲಯ ನಿರ್ಮಿಸಿದ

ಪ್ರಧಾನಿ ನರೇಂದ್ರ ಮೋದಿಯವರ ಸ್ವಚ್ಛ ಭಾರತ ಅಭಿಯಾನದಿಂದ ಪ್ರೇರಿತನಾಗಿ ತನ್ನ ಬಳಿ ಇದ್ದ ಆಡುಗಳನ್ನು ಮಾರಿ ಮತ್ತು ತನ್ನ ಪತ್ನಿಯ ಆಭರಣಗಳನ್ನು ಅಡವಿಟ್ಟು ಶೌಚಾಲಯವನ್ನು ನಿರ್ಮಿಸಿದ ಬುಡಕಟ್ಟು ಜನಾಂಗದ ಕಾಂತಿ ಲಾಲ್ ರಾಟ್ ಈಗ ಎಲ್ಲರಿಗೂ ಆದರ್ಶ ವ್ಯಕ್ತಿ.

ರಾಜಸ್ಥಾನದ ದುಂಗರ್‌ಪುರ್ ಜಿಲ್ಲೆಯವರಾದ ಕಾಂತಿ ಲಾಲ್ ಕೂಲಿ ಕಾರ್ಮಿಕ. ತನ್ನ ತಾಯಿ, ಹೆಂಡತಿ, ಮಕ್ಕಳು ಮತ್ತು ಮೃತ ಸಹೋದರನ ಪತ್ನಿಯನ್ನು ಸಲಹಬೇಕಾದ ಅನಿವಾರ್ಯತೆ ಇವರದ್ದು. ಹರಕಲು ಮನೆಯಲ್ಲಿ ಇರುವ ಇವರು ಶೌಚಾಲಯವನ್ನು ನಿರ್ಮಿಸುವುದು ಕನಸಿನ ಮಾತೇ ಆಗಿತ್ತು.

ಆದರೆ ಮೋದಿಯವರ ಸ್ವಚ್ಛ ಭಾರತದಿಂದ ತೀವ್ರ ಪ್ರೇರಿತರಾದ ಕಾಂತಿ ತಾನೂ ಶೌಚಾಲಯವನ್ನು ನಿರ್ಮಿಸಿ ಸ್ವಚ್ಛತೆಯನ್ನು ಕಾಪಾಡಬೇಕು ಎಂಬ ಹಠ ತೊಟ್ಟರು. ಸ್ವಚ್ಛತಾ ಹೋರಾಟಗಾರರು ಇವರಿಗೆ ಸ್ಫೂರ್ತಿ ತುಂಬಿದರು, ಕೇಂದ್ರ, ರಾಜ್ಯ, ಸ್ಥಳೀಯ ಆಡಳಿತದಿಂದ 4 ಸಾವಿರ ತೆಗೆಸಿಕೊಡುವ ಭರವಸೆ ನೀಡಿದರು.

ಕೊನೆಗೂ ಗಟ್ಟಿ ಮನಸ್ಸು ಮಾಡಿ ಸ್ಥಳಿಯ ಕಾರ್ಮಿಕರನ್ನು ಸೇರಿಸಿ ಶೌಚಾಲಯ ನಿರ್ಮಿಸಲು ಮುಂದಾದರು, ಸರ್ಕಾರಗಳ ವತಿಯಿಂದ ದೊರೆತ 4 ಸಾವಿರ ಖಾಲಿಯಾದ ಬಳಿಕ ಅವರ ನಿರ್ಮಾಣ ಕಾರ್ಯ ಅರ್ಧಕ್ಕೆ ನಿಲ್ಲುವ ಭೀತಿ ಉಂಟಾಯಿತು.

ಆದರೂ ಛಲ ನಿಲ್ಲಿಸದ ಕಾಂತಿ ತನ್ನ ಬಳಿ ಇದ್ದ 5 ಆಡುಗಳನ್ನು ಮಾರಿ 5 ಸಾವಿರ ಪಡೆದರು, ಬಳಿಕ ಹೆಂಡತಿಯ ಬೆಳ್ಳಿಯ ಆಭರಣಗಳನ್ನು ಅಡವಿಟ್ಟು ಶೌಚಾಲಯದ ಕಾರ್ಯವನ್ನು ಮುಂದುವರೆಸಿದರು. ಇವರ ಕಾರ್ಯಕ್ಕೆ ಶ್ಲಾಘನೆಯ ರೂಪದಲ್ಲಿ ಅಧಿಕಾರಿಗಳು ಇನ್ನಷ್ಟು ಸಹಾಯ ಮಾಡಿದರು.

ಹೀಗೆ ಕಾಂತಿಲಾಲ್ ಬುಡಕಟ್ಟು ಜನರೇ ಇರುವ ತನ್ನ ಮನೆ ಪ್ರದೇಶದಲ್ಲಿ ಶೌಚಾಲಯವನ್ನು ನಿರ್ಮಿಸಿ ಸ್ವಚ್ಛ ಭಾರತಕ್ಕೆ ತನ್ನದೇ ಆದ ಕೊಡುಗೆಯನ್ನು ನೀಡಿ ಇಡೀ ದೇಶಕ್ಕೆ ಮಾದರಿ ಎನಿಸಿದರು.