ಬೆಳ್ತಂಗಡಿ : ನೀರಿನ ಕೊರತೆಯಿಂದಾಗಿ ಸಾವಿರಾರು ದೇವರ ಮೀನುಗಳು ನಾಶ ಹೊಂದುತ್ತಿರುವ ವಿದ್ಯಮಾನ ಕರಂಬಾರು ಗ್ರಾಮದ ಶ್ರೀ ಕೇಳ್ಕರೇಶ್ವರ ದೇವಸ್ಥಾನದ ಸನಿಹದ ನದಿಯಲ್ಲಿ ನಡೆಯುತ್ತಿದೆ.
ಕಳೆದ ನಾಲ್ಕು ದಿನಗಳಿಂದಿಚೆಗೆ ಈ ಆಘಾತಕಾರಿ ಘಟನೆ ನಡೆಯುತ್ತಿದ್ದು ನೂರಾರು ಜನರು ಮತ್ಸ್ಯ ಸಂತತಿಗಳಿಗಾಗುತ್ತಿರುವ ದುರವಸ್ಥೆಯನ್ನು ಗಮನಿಸಿ ಏನೂ ಮಾಡಲಾಗದೆ ಹತಾಶೆ, ದುಃಖದಿಂದ, ಭಾರವಾದ ಹೃದಯದಿಂದ ಮರಳುತ್ತಿದ್ದಾರೆ.
ಗುರುವಾಯನಕೆರೆಯಿಂದ ಸುಮಾರು ಏಳೆಂಟು ಕಿ.ಮೀ ದೂರದಲ್ಲಿರುವ ಕೇಳ್ಕರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಪಕ್ಕದಲ್ಲಿ ಫಲ್ಗುಣಿ ನದಿ ಹರಿಯುತ್ತಿದೆ. ಇಲ್ಲಿ ಪೆರುವೊಳು, ಪುರಿಯೊಳು, ತರು, ಕೊಡ್ಯೆಲೆ ಮತ್ತಿತರ ಅಪೂರ್ವ ಜಾತಿಯ ದೊಡ್ಡ ದೊಡ್ಡ ಮೀನುಗಳು ಇದ್ದು ದೇವಸ್ಥಾನಕ್ಕೆ ಬರುವ ಭಕ್ತರನ್ನು, ಪ್ರವಾಸಿಗರನ್ನು ಬೆರಗುಗೊಳಿಸುತ್ತವೆ. ಜೊತೆಗೆ ಮಡೆಂಜಿ, ಏಡಿ, ಸಿಗಡಿಗಳೂ ಇವೆ. ಪ್ರಸ್ತುತ ಬಿರು ಬೇಸಿಗೆಯಿಂದಾಗಿ ನದಿಯಲ್ಲಿ ಹರಿವು ಕಾಣೆಯಾಗಿದೆಯಲ್ಲದೆ ಇರುವ ಬೃಹತ್ ಹೊಂಡದಲ್ಲಿ ನೀರು ದಿನದಿಂದ ದಿನಕ್ಕೆ ಕಡಿಮೆಯಾಗುತ್ತಿವೆ. ಈ ಹೊಂಡದಲ್ಲೇ ಲಕ್ಷಾಂತರ ಮೀನುಗಳು ಇವೆ.
ಕಳೆದ ನಾಲ್ಕು ದಿನಗಳಿಂದ ನೀರಿನ ಪ್ರಮಾಣ ಮತ್ತಷ್ಟು ಕಡಿಮೆಯಾಗುತ್ತಿರುವ ಕಾರಣ ಹೊಂಡದ ನೀರು ಬಿಸಿಯಾಗ ತೊಡಗಿದೆ. ಅಲ್ಲದೆ ಹೊಂಡದ ಸುತ್ತಲೂ ಬಂಡೆಗಲ್ಲುಗಳೇ ತುಂಬಿವೆ. ಇದರಿಂದ ನೀರು ಇನ್ನಷ್ಟು ಬಿಸಿಯಾಗುತ್ತಿದೆ. ಬಿಸಿ ನೀರಿನ ಪ್ರಭಾವದಿಂದಾಗಿ, ಹೊಸ ನೀರು ಇಲ್ಲದೆ ಇರುವ ನೀರಿನಲ್ಲಿ ಆಮ್ಲಜನಕ ಕಡಿಮೆಯಾಗಿ ಮೀನುಗಳು, ಇನ್ನಿತರ ಜಲಚರಗಳು ಒಂದೊಂದಾಗಿ ಸಾಯತೊಡಗಿವೆ. ಕಳೆದ ನಾಲ್ಕು ದಿನಗಳಿಂದ ಸಾವಿರಾರು ಮೀನುಗಳು ಸತ್ತು ತೇಲುತ್ತಿದ್ದು ಸ್ಥಳೀಯರು ಅವನ್ನೆಲ್ಲ ಮೇಲಕ್ಕೆತ್ತಿ ಸಮಾಧಿ ಮಾಡಿದ್ದಾರೆ. ಸತ್ತ ಮೀನುಗಳನ್ನು ಎಷ್ಟೇ ಮೇಲಕ್ಕೆತ್ತಿದರೂ ಮತ್ತೂ ಮತ್ತೂ ತೇಲುವ ದೃಶ್ಯ ಕಾಣುತ್ತಿದೆ. ಪರಿಸರ ದುರ್ವಾಸನೆ ಬೀರುತ್ತಿದೆ.
ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ನವೀನ್ ಸಾಮಾನಿ, ಸ್ಥಳೀಯರು ಮೀನುಗಳನ್ನುಳಿಸಲು ಹರಸಾಹಸ ಪಡುತ್ತಿದ್ದಾರೆ. ಸನಿಹದ ಕೊಳವೆ ಬಾವಿಯಿಂದ ನೀರನ್ನು ಹೊಂಡಕ್ಕೆ ಹಾಯಿಸಿದ್ದಾರೆ. ದೇವಸ್ಥಾನಕ್ಕೆ ಬರುವ ರಸ್ತೆಯ ಡಾಮರೀಕರಣ ನಡೆಯುತ್ತಿದ್ದು ಅದರ ಗುತ್ತಿಗೆದಾರರು ಟ್ಯಾಂಕರ್ ಮೂಲಕ ನೀರು ತಂದು ಹೊಂಡ ತುಂಬಿಸುತ್ತಿದ್ದಾರೆ. ಎಷ್ಟೇ ಏನೇ ಮಾಡಿದರೂ ಮೀನುಗಳನ್ನುಳಿಸಲು ಕಷ್ಟಸಾಧ್ಯ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ. ಇನ್ನೆರಡು ದಿನಗಳಲ್ಲಿ ಧಾರಾಕಾರವಾಗಿ ಮಳೆ ಸುರಿದಲ್ಲಿ ಮಾತ್ರ ಉಳಿದ ಲಕ್ಷಾಂತರ ಮೀನುಗಳುಳಿಯಲು ಸಾಧ್ಯ ಎಂಬತಾಗಿದೆ ಇಲ್ಲಿನ ಸ್ಥಿತಿ.
ತಾಲೂಕಿನಲ್ಲಿ ಅಪೂರ್ವ ಸಂತತಿಯ ಮೀನುಗಳು ಕಾಣ ಸಿಗುವುದು ಶಿಶಿಲದ ಶ್ರೀ ಶಿಶಿಲೇಶ್ವರನ ಸನ್ನಿಧಿಯ ಸನಿಹ ಹರಿಯುವ ಕಪಿಲಾ ನದಿಯಲ್ಲಿ ಮತ್ತು ಶ್ರೀ ಕ್ಷೇತ್ರ ಧರ್ಮಸ್ಥಳದಲ್ಲಿ. ಈ ಎರಡು ಕ್ಷೇತ್ರಗಳನ್ನು ಬಿಟ್ಟರೆ ಕರಂಬಾರು ಗ್ರಾಮದ ಶ್ರೀ ಕೇಳ್ಕರೇಶ್ವರನ ಸನ್ನಿಧಿಯ ಪಕ್ಕ ಹರಿಯು ಫಲ್ಗುಣಿ ನದಿಯಲ್ಲಿ. ಇಲ್ಲಿನ ಮತ್ಸ್ಯ ಸಂತತಿ ಉಳಿಸುವತ್ತ ಆಡಳಿತ ಅತಿ ಶೀಘ್ರವಾಗಿ ಕ್ರಮ ಕೈಗೊಳ್ಳಬೇಕಾಗಿದೆ.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
