ಗೋವುಗಳನ್ನು ದಾನ ಮಾಡಿದರೆ ಪುಣ್ಯ ಪ್ರಾಪ್ತಿಯಾಗುತ್ತದೆ-ಟಿ.ಬಿ ಜಯಚಂದ್ರ

ಶಿರೂರು : ಶಿರೂರು ಗ್ರೀನ್‌ವ್ಯಾಲಿ ಸಂಸ್ಥಾಪಕ ಅಬ್ದುಲ್ ಖಾದರ್ ಭಾಶು ಅವರು ಶಿರೂರಿನ ಬಡ ಮಹಿಳೆಯರಿಗೆ ದಾನರೂಪವಾಗಿ 100 ದನಗಳನ್ನು ನೀಡುವ ಚಿಂತನೆ ಅದ್ಭುತವಾಗಿದೆ ದಾನಗಳಲ್ಲಿ ಮಹಾದಾನವಾದ ಗೋವುಗಳನ್ನು ದಾನ ಮಾಡಿದರೆ ಪುಣ್ಯ ಪ್ರಾಪ್ತಿಯಾಗುತ್ತದೆ ಎಂಬ ನಂಬಿಕೆಯಿದೆ ಎಂದು ಕಾನೂನು, ಪಶು ಸಂಗೋಪನಾ ಹಾಗೂ ಮುಜರಾಯಿ ಸಚಿವ ಟಿ.ಬಿ ಜಯಚಂದ್ರ ಹೇಳಿದರು.

ಶಿರೂರು ಕಾಲೇಜು ಮೈದಾನದಲ್ಲಿ ರಾಜ್ಯಸಭಾ ಸದಸ್ಯ ಆಸ್ಕರ ಫೆರ್ನಾಂಡಿಸ್ ಅವರ ಆದರ್ಶ ಗ್ರಾಮ ಯೋಜನಗೆ ಚಾಲನೆ ನೀಡುವ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.ಅನಂತರ ರಾಜ್ಯ ಗ್ರಾಮೀಣಾಭಿವೃದ್ಧಿ ಸಚಿವ ಎಚ್ ಕೆ ಪಾಟೀಲ್ ಮಾತನಾಡಿ, ಕೇಂದ್ರ ಸರಕಾರದ ಸಂಸದರ ಆದರ್ಶ ಗ್ರಾಮ ಯೋಜನೆ ಅನುಷ್ಟಾನ ಗೊಳಿಸಿದಂತೆ ರಾಜ್ಯ ಸರ್ಕಾರ ಗ್ರಾಮ ವಿಕಾಸ ಕಾರ್ಯಕ್ರಮ ಜಾರಿಗೆ ತಂದಿದೆ, ಈ ಕಾರ್ಯಕ್ರಮದಂತೆ ಪ್ರತಿ ಶಾಸಕ ಐದು ಗ್ರಾಮವನ್ನು ದತ್ತು ಪಡೆಯಬಹುದಾಗಿದ್ದು ಪ್ರತಿ ಗ್ರಾಮಕ್ಕೆ 75ಲಕ್ಷ ರೂ. ಅನದಾನ ಒದಗಿಸಲಾಗುವುದು. ಎಂದರು.

ಕೇರಳ ಹಾಗೂ ಗೋವಾದಲ್ಲಿರುವಂತೆ ಸಿಆರ್‌ಝಡ್ ಕೇವಲ 100ಮೀ ಗೆ ಸರಳೀಕರಣಗೊಳಿಸಬೇಕೆಂದು ಈಗಾಗಲೇ ರಾಜ್ಯ ಸರ್ಕಾರ ಕೇಂದ್ರಕ್ಕೆ ಪ್ರಸ್ತಾವನೆ ಕಳುಹಿಸಿದೆ ಎಂದರು. ರಾಜ್ಯದಲ್ಲಿ ಪಶ್ಚಿಮವಾಹಿನಿ ಯೋಜನೆಯನ್ನು ಜಾರಿಗೆ ತಂದು ಇಲ್ಲಿನ ನದಿಗಳಿಗೆ ಚೆಕ್ ಡ್ಯಾಂ ನಿರ್ಮಿಸಿದಾಗ ಕುಡಿಯುವ ನೀರಿನ ಸಮಸ್ಯೆ ಹೋಗಲಾಡಿಸಲು ಸಾಧ್ಯವಾಗುತ್ತದೆ ಈ ಬಗ್ಗೆ ಸರ್ಕಾರ ಮುಂದಿನ ದಿನಗಳಳಲ್ಲಿ ಕ್ರಮ ಕೈಗೊಳ್ಳಲಿದೆ ಎಂದು ಅರಣ್ಯ ಮತ್ತು ಪರಿಸರ ಖಾತೆ ಸಚಿವ ರಮಾನಾಥ ರೈ ಹೇಳಿದರು.

181

ಶಿರೂರಿನಲ್ಲಿ ಶೀಘ್ರ 50 ಬೆಡ್‌ನ ಹೆರಿಗೆ ಆಸ್ಪತ್ರೆ ನಿರ್ಮಾಣ ಮಾಡಲಾಗುವುದು ಅಲ್ಲದೇ ತಾಲೂಕು ಕೇಂದ್ರದ ಹೊಸ್ತಿಲಲ್ಲಿರುವ ಬೈಂದೂರು ಸಮುದಾಯ ಆರೋಗ್ಯ ಕೇಂದ್ರವನ್ನು ಮೇಲ್ದರ್ಜೆಗೇರಿಸಲಾಗುವುದು ಎಂದು ಆರೋಗ್ಯ ಸಚಿವ ಯು.ಟಿ. ಖಾದರ್ ಭರವಸೆ ನೀಡಿದರು.

ಶಾಸಕ ಗೋಪಾಲ ಪೂಜಾರಿ ಅಧ್ಯಕ್ಷತೆ ವಹಿಸಿದ್ದರು. ರಾಜ್ಯಸಭಾ ಸದಸ್ಯ ಆಸ್ಕರ್ ಫೆರ್ನಾಂಡಿಸ್, ಉಸ್ತುವಾರಿ ಸಚಿವ ವಿನಯ ಕುಮಾರ ಸೊರಕೆ, ಬ್ಲೋಸಂ ಫೆರ್ನಾಂಡಿಸ್, ಗ್ರೀನ್‌ವ್ಯಾಲಿ ಸಂಸ್ಥಾಪಕ ಸೈಯದ್ ಅಬ್ದುಲ್ ಖಾದರ್ ಬಾಶು, ತಾಪಂ ಸದಸ್ಯರಾದ ಸಾವಿತ್ರಿ ಅಳ್ವೇಗದ್ದೆ, ಎಸ್ ರಾಜು ಪೂಜಾರಿ, ಗ್ರಾಪಂ ಅಧ್ಯಕ್ಷ ರಾಮ ಮೇಸ್ತ ಉಪಸ್ಥಿತರಿದ್ದರು. ಅರುಣಕುಮಾರ್ ಕಾರ್ಯಕ್ರಮ ನಿರ್ವಹಿಸಿದರು.