ಜನವರಿ 26 : ಹೆಬ್ರಿ ಟಿಜಿ. ಆಚಾರ್ಯರಿಗೆ ಸಾರ್ವಜನಿಕ ಸನ್ಮಾನ

ಹೆಬ್ರಿ : ಹೆಬ್ರಿ ಟಿ.ಜಿ.ಆಚಾರ್ಯ ಅಭಿನಂದನಾ ಸಮಿತಿ ವತಿಯಿಂದ ಇಂಡಿಯನ್ ಓವರ್‌ಸೀಸ್ ಬ್ಯಾಂಕ್ ನಿವೃತ್ತ ಡೆಪ್ಯುಟಿ ಮ್ಯಾನೇಜರ್ ಕಲಾವಿದ ಹರಿದಾಸರಾದ ಹೆಬ್ರಿ ಟಿ.ಜಿ.ಆಚಾರ್ಯರಿಗೆ ಇದೇ ಜನವರಿ 26 ರಂದು ಹೆಬ್ರಿಯ ಅನಂತ ಪದ್ಮನಾಭ ಸನ್ನಿಧಿಯಲ್ಲಿ ಸಾರ್ವಜನಿಕ ಸನ್ಮಾನ, ಸ್ನೇಹ ಸೌರಭ ಅಭಿನಂದನ ಗ್ರಂಥ ಗೌರವ ಮತ್ತು ಗುರುವಂದನ ಸಮಾರಂಭ ನಡೆಯಲಿದೆ. ಚಂದ್ರಶೇಖರ ಕೆದ್ಲಾಯ ಬಳಗದ ಸುಗಮ ಸಂಗೀತ ಮತ್ತು ಕುಚ್ಚೂರು ಪ್ರೌಢಶಾಲೆಯ ವಿದ್ಯಾರ್ಥಿ ಪ್ರವೀಣ್ ಆಚಾರ್ಯರಿಂದ ಯಕ್ಷಗಾನ ನೃತ್ಯ ವೈಭವ ನಡೆಯಲಿದೆ.

ಅಭಿನಂದನ ಸಮಾರಂಭದ ಅಧ್ಯಕ್ಷತೆಯನ್ನು ಚಿಂತಕ ಮುಂಬಯಿ ರವಿ ರಾ.ಅಂಚನ್ ವಹಿಸುವರು. ಮುಂಬಯಿ ವಿಶ್ವವಿದ್ಯಾಲಯದ ಕನ್ನಡ ವಿಭಾಗದ ಮಾಜಿ ಮುಖ್ಯಸ್ಥ ಡಾ.ತಾಳ್ತಜೆ ವಸಂತ ಕುಮಾರ್, ಕಾರ್ಕಳ ಮಾಜಿ ಶಾಸಕ ಎಚ್.ಗೋಪಾಲ ಭಂಡಾರಿ ಮತ್ತಿತರರು ಉಪಸ್ಥಿತರಿರುವರು. ಹೆಬ್ರಿ ಯೋಗೀಶ್ ಭಟ್ ಅಭಿನಂದನೆ ಸಲ್ಲಿಸುವರು. ಸ್ನೇಹ ಸೌರಭ ಅಭಿನಂದನ ಗ್ರಂಥವನ್ನು ಸಾಹಿತಿ ಗ್ರಂಥದ ಸಂಪಾದಕ ಅಂಬಾತನಯ ಮುದ್ರಾಡಿ ಬಿಡುಗಡೆಗೊಳಿಸುವರು. ಹೆಬ್ರಿ ಪಂಚಾಯಿತಿ ಅಧ್ಯಕ್ಷ ಸುಧಾಕರ ಹೆಗ್ಡೆ, ಲಯನ್ಸ್ ಜಿಲ್ಲಾ ಗವರ್ನರ್ ಶ್ರೀಧರ ಶೇಣವ, ಇಂಡಿಯನ್ ಓವರ್‌ಸೀಸ್ ಬ್ಯಾಂಕ್ ಸೀನಿಯರ್ ಮ್ಯಾನೇಜರ್ ಎಚ್.ಪಿ.ಪಾಯಸ್, ಹೆಬ್ರಿ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ವಾಣಿಜ್ಯ ವಿಭಾಗದ ಮುಖ್ಯಸ್ಥ ಕೆ.ಜಿ.ಸುಧಾಕರ್ ಶುಭಾಶಂಸನೆ ಮಾಡುವರು.

ಹೆಬ್ರಿ ವಿಷ್ಣುಮೂರ್ತಿ ಜೋಯಿಸ್ ಗುರುವಂದನ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸುವರು. ವಿಶ್ರಾಂತ ಪತ್ರಕರ್ತ ಡಾ.ಕೆ.ಎಂ.ರಾಘವ ನಂಬಿಯಾರ್ ಅಧ್ಯಕ್ಷತೆ ವಹಿಸುವರು. ಹಿರಿಯಡ್ಕದ ಎ.ನರಸಿಂಹ, ಜಿ.ಟಿ.ಆಚಾರ್ಯ ಮುಂಬಯಿ, ಮುಂಡ್ಕೂರು ಸುರೇಂದ್ರ ಸಾಲ್ಯಾನ್ ಮುಂಬಯಿ ಮತ್ತಿತರರು ಭಾಗವಹಿಸುವರು.

ಬಾರ್ಕೂರು ಗೋಪಾಲ್ ಭಟ್, ಸೀತಾರಾಮ ಶೆಟ್ಟಿ, ಕಲ್ಯಾಣಪುರ ವಿಲ್‌ಪ್ರೈಡ್ ಆರ್.ಡಿಸೋಜಾ ಮತ್ತು ಡಾ.ತಾಳ್ತಜೆ ವಸಂತ ಕುಮಾರ್ ಅವರಿಗೆ ಗುರುವಂದನ ಕಾರ್ಯಕ್ರಮ ನಡೆಯಲಿದೆ ಎಂದು ಸಮಿತಿಯ ಗೌರವ ಪ್ರಧಾನ ಕಾರ್ಯದರ್ಶಿ ಡಾ.ಎಚ್.ಎ.ಗಣಪತಿ ತಿಳಿಸಿದ್ದಾರೆ.