ಜ.22 ರಂದು ಅಡಿಕೆ ಚಹಾ ಲೋಕಾರ್ಪಣೆ

ಬೆಂಗಳೂರು : ಆಸ್ಟ್ರೇಲಿಯಾದ ಮೆಲ್ಬರ್ನ್‌ನಲ್ಲಿ ಫಾರ್ಮಸಿ ಪದವಿ ಗಳಿಸಿದ ಕನ್ನಡಿಗ ಸಂಶೋಧಕ ನಿವೇದನ್ ನೆಂಪೆ ಅವರು ಅಭಿವೃದ್ಧಿಪಡಿಸಿದ ಹಾಗೂ 2014-15 ರ ‘ಮೇಕ್ ಇನ್ ಇಂಡಿಯಾ ಎಕ್ಸಲೆನ್ಸ್ ಅವಾರ್ಡ್’ ಮತ್ತು ‘ಇನೋವೇಟಿವ್ ಪ್ರೊಡಕ್ಟ್ ಆಫ್ ದಿನ ಇಯರ್ 2015 ‘ ಪ್ರಶಸ್ತಿ ಗಳಿಸಿದ ಅಡಿಕೆ ಚಹಾ (ಅರೇಕಾ ಟೀ) ಶುಕ್ರವಾರ ಲೋಕಾರ್ಪಣೆಗೊಳ್ಳಲಿದೆ.

ಮಲ್ಲೇಶ್ವರಂನ ಬ್ರಿಗೇಡ್ ಗೇಟ್‌ವೇಯ ಹೋಟೆಲ್ ಶೆರಟಾನ್ ಗ್ರಾಂಡ್‌ನಲ್ಲಿ ಶುಕ್ರವಾರ ಮಧ್ಯಾಹ್ನ 3-30ಕ್ಕೆ ನಡೆಯುವ ಸಮಾರಂಭದಲ್ಲಿ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಅಡಿಕೆ ಚಹಾವನ್ನು ಲೋಕಾರ್ಪಣೆ ಮಾಡುವರು. ಕೇಂದ್ರದ ವಾಣಿಜ್ಯ ಮತ್ತು ಕೈಗಾರಿಕಾ ಖಾತೆ ರಾಜ್ಯ ಸಚಿವೆ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಮುಖ್ಯ ಅತಿಥಿಯಾಗಿರುವರು.

ಈ ಅಡಿಕೆ ಚಹಾವು ಎಫ್‌ಎಸ್‌ಎಸ್‌ಎಸ್‌ಎಐ ಪ್ರಮಾಣಪತ್ರ ಗಳಿಸಿಕೊಂಡಿದ್ದು, ಅಪಾರ ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ. ವೃದ್ಧಾಪ್ಯವನ್ನು ದೂರ ಮಾಡುವ, ಖಿನ್ನತೆಯನ್ನು ನಿವಾರಿಸುವ, ನಂಜು ನಿವಾರಕ, ಜೀರ್ಣಕ್ರಿಯೆ ಸುಗಮಗೊಳಿಸಿ ಹಸಿವನ್ನು ಉಂಟುಮಾಡುವ ಹಾಗೂ ಮಧುಮೇಹವನ್ನು ನಿವಾರಿಸುವ ಹೈಪೊಗ್ಲಿಸೆಮಿಕ್ ಗುಣವನ್ನು ಹೊಂದಿದ್ದು, ಈ ಚಹಾದಿಂದ ದೇಹದಲ್ಲಿ ಚಯಾಪಚಯ ಕ್ರಿಯೆ ಸುಗಮವಾಗುತ್ತದೆ. ಸಾಮಾನ್ಯವಾಗಿ ಹೆಚ್ಚಿನವರು ತಮ್ಮ ಆರೋಗ್ಯದ ಬಗ್ಗೆ ಗಮನ ಹರಿಸುವುದಿಲ್ಲ. ಒತ್ತಡದ ಜೀವನದಲ್ಲಿ ಸಿಕ್ಕಿದ್ದನ್ನು ತಿನ್ನುವ ಪ್ರವೃತ್ತಿಯೇ ಜಾಸ್ತಿ. ಈ ಅಡಿಕೆ ಚಹಾ ಸೇವನೆಯಿಂದ ಮನಸ್ಸಿಗೆ ಆರಾಮ ನೀಡಿ ಒತ್ತಡ ನಿವಾರಣೆಯಾಗುತ್ತದೆ.

ಅಡಿಕೆ ಚಹಾ ಬಿಡುಗಡೆ ಸಮಾರಂಭದಲ್ಲಿ ಸಂಸದ ಡಾ.ಎಂ.ರಾಮಾ ಜೋಯಿಸ್, ನಿವೃತ್ತ ಲೋಕಾಯುಕ್ತ ನ್ಯಾಯಮೂರ್ತಿ ಎನ್.ಸಂತೋಷ್ ಹೆಗ್ಡೆ, ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ ಸಚಿವ  ಕಿಮ್ಮನೆ ರತ್ನಾಕರ್, ಖ್ಯಾತ ಉದ್ಯಮಿ ಡಾ. ಬಿ.ಆರ್.ಶೆಟ್ಟಿ, ಮಾಜಿ ಮುಖ್ಯಮಂತ್ರಿ  ಬಿ.ಎಸ್.ಯಡಿಯೂರಪ್ಪ, ಆರೋಗ್ಯ ಸಚಿವ  ಯು.ಟಿ.ಖಾದರ್ ಸಹಿತ ಹಲವಾರು ಗಣ್ಯರು ಪಾಲ್ಗೊಳ್ಳಲಿದ್ದಾರೆ.

ನಿವೇದನ್ ನೆಂಪೆ ಶಿವಮೊಗ್ಗ ಜಿಲ್ಲೆಯ ಮಂಡಗದ್ದೆಯವರಾದ ಕನ್ನಡ ಮಾಧ್ಯಮ ಶಾಲೆಯಲ್ಲಿ ಓದಿ, ತಮ್ಮ ಕಿರಿಯ ವಯಸ್ಸಿನಲ್ಲೇ ಯುವ ಸಂಶೋಧಕರು ಮತ್ತು ಉದ್ಯಮಿಗಳಿಗೆಲ್ಲ ಮಾದರಿ ಎನಿಸಿದ್ದಾರೆ. ಬಹುರಾಷ್ಟ್ರೀಯ ಕಂಪೆನಿಗಳಲ್ಲಿ ಉದ್ಯೋಗದ ಅವಕಾಶ ಇದ್ದರೂ ಅದನ್ನು ನಿರಾಕರಿಸಿ, ದೇಶದ ಅಗತ್ಯಗಳನ್ನು ಪೂರೈಸುವ ಸಲುವಾಗಿ ವಿದೇಶದಲ್ಲಿ ಕೈತುಂಬ ಸಿಗುತ್ತಿದ್ದ ಸಂಬಳದ ಕೆಲಸವನ್ನು ಬಿಟ್ಟು ಹೊಸ ಹೊಸ ಸಂಶೋಧನೆಯಲ್ಲಿ ನಿರತರಾಗಿದ್ದಾರೆ. ‘ಅಡಿಕೆ ಬೆಳೆಗಾರರು ಇಂದು ಸಂಕಷ್ಟದಲ್ಲಿದ್ದಾರೆ. ಅಡಿಕೆ ಮಾರುಕಟ್ಟೆಯನ್ನು ವಿಸ್ತರಿಸಬೇಕಿದ್ದು, ಈ ಅಡಿಕೆ ಚಹಾ ಪ್ರಮುಖ ಪಾತ್ರ ನಿರ್ವಹಿಸುವ ನಿರೀಕ್ಷೆ ಇದೆ’ ಎಂದು ನಿವೇದನ್ ನೆಂಪೆ ಹೇಳುತ್ತಾರೆ.