ಎಸ್.ಡಿ.ಎಂ ಸುವರ್ಣ ಮಹೋತ್ಸವ ಇಂದು ಉದ್ಘಾಟನೆ

ಬೆಳ್ತಂಗಡಿ : ಉಜಿರೆಯ ಶ್ರೀ ಧ. ಮಂ. ಪದವಿ ಕಾಲೇಜು ಐವತ್ತು ವರ್ಷಗಳನ್ನು ಪೂರೈಸುತ್ತಿದ್ದು ಸುವರ್ಣ ಮಹೋತ್ಸವದ ಸಂಭ್ರಮದಲ್ಲಿದೆ. 50ನೇ ವರ್ಷಾಚರಣೆಯನ್ನು ಅರ್ಥಪೂರ್ಣ ಚಟುವಟಿಕೆಗಳೊಂದಿಗೆ ಆಚರಿಸಲು ಸಿದ್ದತೆ ನಡೆದಿದ್ದು, ಡಿ. 17 ರಂದು ಕಾರ್ಯಕ್ರಮದ ಉದ್ಘಾಟನೆಗೊಳ್ಳಲಿದೆ.

ಇಂದು(ಡಿ. 17) ಸಂಜೆ 6 ಗಂಟೆಗೆ ಸುವರ್ಣ ಮಹೋತ್ಸವದ ವರ್ಷಾಚರಣೆಗೆ ಬೆಂಗಳೂರಿನ ಪ್ರಸನ್ನ ಟ್ರಸ್ಟ್‌ನ ಸ್ಥಾಪಕಾಧ್ಯಕ್ಷ ಸುಖಬೋದಾನಂದ ಸ್ವಾಮೀಜಿಯವರು ಚಾಲನೆ ನೀಡಲಿದ್ದಾರೆ. ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆಯವರು ಅಧ್ಯಕ್ಷತೆ ವಹಿಸುವರು. ಮುಖ್ಯ ಅತಿಥಿಯಾಗಿ ರಾಜ್ಯ ಸರಕಾರದ ಉನ್ನತ ಶಿಕ್ಷಣ, ಕಾನೂನು ಹಾಗೂ ಸಂಸದೀಯ ವ್ಯವಹಾರ ಸಚಿವ ಟಿ. ಬಿ. ಜಯಚಂದ್ರ, ಮಂಗಳೂರು ವಿವಿ ಕುಲಪತಿ ಡಾ| ಕೆ. ಭೈರಪ್ಪ ಹಾಗೂ ಬೆಳ್ತಂಗಡಿ ಶಾಸಕ ಕೆ. ವಸಂತ ಬಂಗೇರ ಭಾಗವಹಿಸಲಿದ್ದಾರೆ.

ಡಿ. 18 ರಂದು ನೂತನವಾಗಿ ನಿರ್ಮಾಣಗೊಂಡಿರುವ ಸುವರ್ಣ ಮಹೋತ್ಸವದ ಸವಿನೆನಪಿನ ಈಜು ಕೊಳದ ಉದ್ಘಾಟನಾ ಕಾರ್ಯಕ್ರಮವು ನಡೆಯಲಿದೆ. ರಾಜ್ಯದ ಅರಣ್ಯ ಸಚಿವ ಬಿ. ರಮಾನಾಥ ರೈ ಅವರು ಈಜುಕೊಳವನ್ನು ಉದ್ಘಾಟಿಸಲಿದ್ದು, ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆಯವರು ಅಧ್ಯಕ್ಷತೆ ವಹಿಸಲಿದ್ದಾರೆ. ಮುಖ್ಯ ಅತಿಥಿಗಳಾಗಿ ರಾಜ್ಯ ಯುವಜನ ಸೇವೆ ಹಾಗೂ ಕ್ರೀಡಾ ಸಚಿವ ಕೆ. ಅಭಯಚಂದ್ರ ಜೈನ್, ಸಂಸದ ನಳಿನ್ ಕುಮಾರ್ ಕಟೀಲ್, ಯುಜಿಸಿಯ ಉಪಕಾರ್ಯದರ್ಶಿ ಬೆಂಗಳೂರಿನ ಪ್ರಾದೇಶಿಕ ಕೇಂದ್ರದ ಡಾ| ಎನ್. ಗೋಪು ಕುಮಾರ ಹಾಗೂ ಬೆಳ್ತಂಗಡಿ ಶಾಸಕ ಕೆ. ವಸಂತ ಬಂಗೇರ ಭಾಗವಹಿಸಲಿದ್ದಾರೆ.

ಸಾಂಸ್ಕೃತಿಕ ಕಾರ್ಯಕ್ರಮ : ಡಿ. 17 ರಂದು ಸಂಜೆ 7-30 ರಿಂದ ಶ್ರೀ ಧ. ಮಂ. ಕಾಲೇಜು ವಿದ್ಯಾರ್ಥಿಗಳಿಂದ, ರಾತ್ರಿ 8-30 ರಿಂದ ರಘು ದೀಕ್ಷಿತ್ ಪ್ರಾಜೆಕ್ಟ್, ಬೆಂಗಳೂರು ಇವರಿಂದ ಮಧುರ ಸಂಗೀತ ನಡೆಯಲಿದೆ. ಡಿ. 18 ರಂದು ಸಂಜೆ 6-30 ರಿಂದ ಅರ್ಕ( ಭಾರತದ ಖ್ಯಾತ ಫ್ಯೂಶನ್ ಯೋಜನೆ) ಸೆಲ್ವ ಗಣೇಶ್(ಖಂಜಿರ ಮತ್ತು ಪರ್‌ಕ್ಯೂಷನ್ಸ್), ಕಾರ್ತಿಕ್( ಹಿನ್ನಲೆ ಗಾಯನ), ಮಿಶ್ಕೋ, ಪ್ರಾನ್ಸ್(ಗಿಟಾರ್), ಸಂತೋಷ್ ಚಂದ್ರನ್( ಎಕೋಯಿಸ್ಟಿಕ್ ಮತ್ತು ಎಲೆಕ್ಟ್ರಿಕ್ ಗಿಟಾರ್) ಸಂತೋಷ್ ಮತ್ತು ಬಳಗ ಕಣ್ಣೂರು ಇವರಿಂದ ನೃತ್ಯಂ, ಪುರುಲಿಯಾ ಚ್ಚಾವೊ ನೃತ್ಯ, ಪಶ್ವಿಮ ಬಂಗಾಳ ಇವರಿಂದ ಮಹಿಷಾಸುರ ಮರ್ದಿನಿ ಕಾರ್ಯಕ್ರಮ ನಡೆಯಲಿದೆ.