ಜರ್ಮನ್ ಮಹಿಳೆಯಿಂದ ’ಚಕ್ ದೇ’ ಮರು ನಿರ್ಮಾಣ

ಈಕೆ ಜರ್ಮನಿಯ ರಾಷ್ಟ್ರ ಮಟ್ಟದ ಹಾಕಿ ಆಟಗಾರ್ತಿ. 2009ರಲ್ಲಿ ಭಾರತಕ್ಕೆ ಆಗಮಿಸಿದ ಇವಳು ರಾಜಸ್ಥಾನದ ಗ್ರಾಮೀಣ ಪ್ರದೇಶದ ಮಕ್ಕಳಿಗೆ ಹಾಕಿ ತರಬೇತಿ ನೀಡುತ್ತಿದ್ದಾಳೆ. ಈ ಮಕ್ಕಳ ಶಿಕ್ಷಣಕ್ಕೆ ಸಹಾಯ ಮಾಡುವುದು ಮಾತ್ರವಲ್ಲದೇ ಇಂಗ್ಲಿಷ್ ಬೋಧನೆ ಮಾಡುತ್ತಿದ್ದಾಳೆ. ಈ ಪೈಕಿ 5 ಮಂದಿ ಮಕ್ಕಳಿಗೆ ತರಬೇತಿ ನೀಡಲು ಜರ್ಮನಿಗೆ ಕರೆಸಿದ್ದಾಳೆ.

ಆಂಡ್ರಿಯಾ ಥಂಶಿರ್ನ್, ಜರ್ಮನ್ ಪ್ರೀಮಿಯರ್ ಲೀಗ್‌ನ ಹಾಕಿ ಆಟಗಾರ್ತಿ. ಪ್ರವಾಸದ ಆಯೋಜಕಳಾಗಿ ಭಾರತಕ್ಕೆ ಆಗಮಿಸಿದ್ದ ಇವಳು ರಾಜಸ್ಥಾನದ ಹಳ್ಳಿಯೊಂದಕ್ಕೆ ಭೇಟಿ ನೀಡಿದ್ದಳು. ಇವಳ ಆಗಮನದ ಬಳಿಕ ಆ ಹಳ್ಳಿಯ ಜನರ ಜೀವನವೇ ಬದಲಾಗಿದೆ.

ಆಂಡ್ರಿಯಾ ಈಗ ಅಲ್ಲಿನ ಮಕ್ಕಳಿಗೆ ಹಾಕಿ ತರಬೇತಿ ನೀಡುತ್ತಿದ್ದಾರೆ. ಆರು ವರ್ಷ ಪ್ರಾಯದಲ್ಲೇ ಹಾಕಿ ಆಡಲು ಆರಂಭಿಸಿದ ಆಂಡ್ರಿಯಾ, ರಾಷ್ಟ್ರ ಮಟ್ಟದಲ್ಲಿ ಆಡಿದ್ದಾರೆ. ಆದರೆ ಗಾಯಗೊಂಡಿದ್ದರಿಂದ ವೃತ್ತಿಪರ ಹಾಕಿ ಆಟಕ್ಕೆ ವಿದಾಯ ಹೇಳಿದ್ದರು. ಆ ಬಳಿಕ ಜರ್ಮನಿಯಲ್ಲಿ ಮಕ್ಕಳಿಗೆ ಹಾಕಿ ತರಬೇತಿ ನೀಡಲಾರಂಭಿಸಿದ್ದರು.

ಆಂಡ್ರಿಯಾ ಅವರು ಹಾಕಿ ಸ್ಟಿಕ್‌ಗಳೊಂದಿಗೆ 2010ರಲ್ಲಿ ಮತ್ತೆ ಭಾರತಕ್ಕೆ ಮರಳಿ, ಅದೇ ಸ್ಫೂರ್ತಿ ಮತ್ತು ಪ್ರೀತಿಯೊಂದಿಗೆ ರಾಜಸ್ಥಾನದ ಘರ್ ಹಿಮ್ಮತ್ ಸಿಂಗ್ ಗ್ರಾಮದ ಮಕ್ಕಳಿಗೆ ಶಾಲಾ ಸಮಯದ ನಂತರ ತರಬೇತಿ ನೀಡುತ್ತಿದ್ದಾರೆ. ಈಗ ಇಲ್ಲಿನ ಶಾಲಾ ಬಾಲಕ- ಬಾಲಕಿಯರು ಹಾಕಿ ಪರಿಣಿತರು.

ಇದೇ ಗ್ರಾಮದ ತಮ್ಮ ಸಹೋದ್ಯೋಗಿಯ ನೆರವಿನೊಂದಿಗೆ ಆಂಡ್ರಿಯಾ ರಾಜಸ್ಥಾನಕ್ಕೆ ಶಾಶ್ವತವಾಗಿ ಸ್ಥಳಾಂತರಗೊಂಡಿದ್ದು, ಕಳೆದ ನಾಲ್ಕು ವರ್ಷದಿಂದ ಇಲ್ಲಿನ ಸ್ಥಳೀಯ ಕುಟುಂಬದೊಂದಿಗೆ ವಾಸಿಸುತ್ತಿದ್ದಾರೆ. ಹಾಕಿ ಇಂಡಿಯಾ ವಿಲೇಜ್ ಎಂಬ ಅಧಿಕೃತ ಫೌಂಡೇಷನ್ ಒಂದನ್ನು ಆರಂಭಿಸಿದ್ದಾರೆ.

ಅವರು ಮಕ್ಕಳ ಶಿಕ್ಷಣಕ್ಕಾಗಿ ಪ್ರಾಥಮಿಕ ಆಂಗ್ಲ ಮಾಧ್ಯಮ ಶಾಲೆಯನ್ನೂ ಆರಂಭಿಸಿದ್ದಾರೆ. ಹಲವಾರು ಹಾಕಿ ಟೂರ್ನಿಗಳಲ್ಲಿ ಭಾಗವಹಿಸಿದ ಈ ಮಕ್ಕಳು ಟ್ರೋಫಿಗಳನ್ನು ಗೆದ್ದುಕೊಂಡಿದ್ದಾರೆ. ಈ ಶಾಲಾ ವಿದ್ಯಾರ್ಥಿಗಳಿಗೆ ಸಮವಸ್ತ್ರ, ಹಾಕಿ ಸ್ಟಿಕ್ ಮತ್ತು ಶೂಗಳನ್ನು ಒದಗಿಸಲಾಗಿದೆ. ಈ ವಿದ್ಯಾರ್ಥಿಗಳು ಹೆಚ್ಚಿನ ಆತ್ಮವಿಶ್ವಾಸ ಮತ್ತು ದೈಹಿಕವಾಗಿ ಬಲಾಢ್ಯರಾಗಿದ್ದಾರೆ.

ಹಾಕಿ ವಿಲೇಜ್ ಇಂಡಿಯಾ ಗ್ರಾಮೀಣ ಭಾಗದಲ್ಲಿ ಕ್ರೀಡೆಯ ಅಭಿವೃದ್ಧಿಗಾಗಿರುವ ಕೇಂದ್ರ ಸರ್ಕಾರದ ಪಂಚಾಯತ್ ಯುವ ಕ್ರೀಡಾ ಔರ್ ಖೇಲ್ ಅಭಿಯಾನ್‌ನ ಅಂಗ ಸಂಸ್ಥೆಯಾಗಿದೆ. ಇಲ್ಲಿನ 5 ವಿದ್ಯಾರ್ಥಿನಿಯರು 16 ವರ್ಷದೊಳಗಿನವರ ರಾಜ್ಯ ಮಟ್ಟದ ಟೂರ್ನಿಯಲ್ಲಿ ಆಯ್ಕೆಗೊಂಡಿದ್ದಾರೆ.

ಆಂಡ್ರಿಯಾ ಪ್ರಸ್ತುತ ಕೆಲವು ಜರ್ಮನ್ ಪ್ರಾಯೋಜಕರ ಸಹಾಯದಿಂದ ತಮ್ಮ ಫೌಂಡೇಶನ್ ನಡೆಸುತ್ತಿದ್ದಾರೆ. ಅವರು ಸದ್ಯ ತಮ್ಮ ಫೌಂಡೇಶನ್ ನಡೆಸಲು ಧನಸಹಾಯ ಪಡೆಯಲು ಪ್ರಯತ್ನಿಸುತ್ತಿದ್ದು, ಹಾಕಿ ತರಬೇತಿ ನೀಡಲು ಮತ್ತು ಇಂಗ್ಲಿಷ್ ಕಲಿಸಲು ವೊಲಿಂಟಿಯರ್(ಸ್ವಯಂಸೇವಕರನ್ನು)ಗಳ ಹುಡುಕಾಟದಲ್ಲಿದ್ದಾರೆ.