’ಮೋಕ್ಷ ಮಾರ್ಗ’ ನೃತ್ಯ ಪ್ರದರ್ಶನ

ಬೆಳ್ತಂಗಡಿ: ಆಶಾ ಸಾಲಿಯಾನ್ ಪ್ರತಿಷ್ಠಾನ ಬೆಳ್ತಂಗಡಿ ಇದರ ವತಿಯಿಂದ ಶನಿವಾರ ಬೆಳ್ತಂಗಡಿಯ ಶ್ರೀ ನಾರಾಯಣಗುರು ವಾಣಿಜ್ಯ ಸಂಕೀರ್ಣದ ಆಶಾ ಸಾಲಿಯಾನ್ ಕಲ್ಯಾಣಮಂಟಪದಲ್ಲಿ ಅಂತಾರಾಷ್ಟ್ರೀಯ ಖ್ಯಾತಿಯ ನೃತ್ಯ ದಂಪತಿ ಚೆನ್ನೈನ ಯುವ ಕಲಾ ಭಾರತಿ ಪ್ರಶಸ್ತ್ತಿ ಪುರಸ್ಕೃತ ವಿದ್ವಾನ್ ಶ್ರೀಕಾಂತ್, ಯುವ ಕಲಾ ಭಾರತಿ ಹಾಗೂ ಕಲಾರತ್ನ ಪುರಸ್ಕೃತೆ ವಿದುಷಿ ಅಶ್ವತಿ ಮತ್ತು ತಂಡದವರು ಭಕ್ತಿ-ನೃತ್ಯ-ಕಥಾನಕ ಮೋಕ್ಷ ಮಾರ್ಗ ಎಂಬ ನೃತ್ಯ ಪ್ರದರ್ಶಿಸಿದರು.

ನೃತ್ಯ ದಂಪತಿಗಳು ಮತ್ತು ತಂಡದವರನ್ನು ಪ್ರತಿಷ್ಠಾನದ ವತಿಯಿಂದ ಪ್ರತಿಷ್ಠಾನದ ಅಧ್ಯಕ್ಷ ಕೆ. ರಮಾನಂದ ಸಾಲ್ಯಾನ್ ಅವರು ಗೌರವಿಸಿದರು. ಈ ಸಂದರ್ಭ ರೇಣು ರಾಜೇಶ್, ರಾಗ್ನೇಶ್, ರಕ್ಷಾ ರಾಗ್ನೇಶ್ ಉಪಸ್ಥಿತರಿದ್ದರು. ಉಪನ್ಯಾಸಕ ಮಧುಕರ ಮಲ್ಯ ಪ್ರಸ್ತಾವಿಸಿ, ಸ್ವಾಗತಿಸಿದರು. ಗುರುದೇವ ಕಾಲೇಜಿನ ಪ್ರಾಚಾರ್ಯ ಕಲಾವಿದರನ್ನು ಪರಿಚಯಿಸಿದರು. ಭರತನಾಟ್ಯ ಶಿಕ್ಷಕ ಕಮಲಾಕ್ಷ ಆಚಾರ್ ಕಾರ್ಯಕ್ರಮ ನಿರ್ವಹಿಸಿ, ವಂದಿಸಿದರು.

ವಿದ್ವಾನ್ ಎನ್. ಶ್ರೀಕಾಂತ್ ಹಾಗೂ ವಿದುಷಿ ಅಶ್ವತಿ ದಂಪತಿಗಳು ನೃತ್ಯ ಕ್ಷೇತ್ರದಲ್ಲಿ ಜೊತೆಯಾಗಿ ಕಲಾ ಪ್ರದರ್ಶನ ನೀಡಿರುವುದಲ್ಲದೆ ಅನೇಕ ನೃತ್ಯ- ನಾಟಕಗಳಿಗೆ ನೃತ್ಯ ಸಂಯೋಜನೆ ಕೂಡ ಮಾಡಿದವರಾಗಿದ್ದಾರೆ. ಭಾರತದ ಪ್ರತಿಷ್ಠಿತ ವೇದಿಕೆಗಳಲ್ಲೆಲ್ಲಾ ಪ್ರದರ್ಶನ ನೀಡಿರುವ ಯುವ ದಂಪತಿ ಹೊರ ದೇಶಗಳಲ್ಲಿ ಪ್ರದರ್ಶನ, ನೃತ್ಯ ಕಾರ್ಯಾಗಾರ ನೀಡುವ ಮೂಲಕ ಅಂತಾರಾಷ್ಟ್ರೀಯ ಮನ್ನಣೆಯನ್ನು ಪಡೆದಿದ್ದು, ಬೆಳ್ತಂಗಡಿಯಲ್ಲಿ ಮೋಕ್ಷ ಮಾರ್ಗ ಎಂಬ ಸಮೂಹ ನೃತ್ಯ ಸರಣಿ ಕಾರ್ಯಕ್ರಮವನ್ನು ಸಾದರಪಡಿಸಿದರು.

ನೃತ್ಯ ಪ್ರದರ್ಶನಕ್ಕೆ ಹಿಮ್ಮೇಳದಲ್ಲಿ ನಟುವಾಂಗದಲ್ಲಿ ನಿಖಿಲ್ ರವೀಂದ್ರನ್, ಹಾಡುಗಾರಿಕೆಯಲ್ಲಿ ಬಿಜೇಶ್ ಕೃಷ್ಣ, ಮೃದಂಗದಲ್ಲಿ ಚಾರುದತ್ ಹಾಗೂ ವಯೋಲಿನ್‌ನಲ್ಲಿ ಸನಲ್ ಕುಮಾರ್ ಸಹಕರಿಸಿದರು. ನೃತ್ಯ ತಂಡದಲ್ಲಿ ದಿವ್ಯಾಚಂದ್ರನ್, ಭಾಗ್ಯ ಜಯೇಶ್, ಮೇಘ ಅನಿಲ್ ಕುಮಾರ್, ಮೇಘ ಎಸ್. ನಾಯರ್, ಐಶ್ವರ್ಯ ಸಂತೋಷ್, ಕಾವ್ಯ ಚಂದ್ರನ್ ಭಾಗವಹಿಸಿದ್ದರು.