ಅಶೋಕ್ ಸಿಂಘಾಲ್‌ಗೆ ಪುತ್ತೂರಿನಲ್ಲಿ ಶ್ರದ್ದಾಂಜಲಿ ಸಭೆ

ಪುತ್ತೂರು : ವ್ಯಕ್ತಿಗಿಂತ ಸಂಘಟನೆ ದೊಡ್ಡದು. ಆದರೆ ಸಂಘಟನೆ ಜೊತೆಗೆ ವ್ಯಕ್ತಿ ಸಾಗಬೇಕಾದರೆ, ವ್ಯಕ್ತಿಗೆ ಶಕ್ತಿ ತುಂಬುವ ಕೆಲಸ ಆಗಬೇಕಾಗಿದೆ. ಅಶೋಕ್ ಸಿಂಘಾಲ್ ಯುವಕರಿಗೆ ಆದರ್ಶರು. ಧರ್ಮ ಪ್ರಜ್ಞೆಯೊಂದಿಗೆ ಜೀವನ ಸಾರ್ಥಕ ಪಡಿಸಿಕೊಂಡಿದ್ದಾರೆ ಎಂದು ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನದ ಶ್ರೀ ಗುರುದೇವಾನಂದ ಸ್ವಾಮೀಜಿ ಹೇಳಿದರು.

ಅವರು ಸೋಮವಾರ ವಿಶ್ವ ಹಿಂದು ಪರಿಷದ್‌ನ ಅಂತರಾಷ್ಟ್ರೀಯ ಮಾಜಿ ಅಧ್ಯಕ್ಷ ಅಶೋಕ್ ಸಿಂಘಾಲ್‌ಗೆ ಪುತ್ತೂರು ಪಂಚವಟಿಯಲ್ಲಿ ನಡೆದ ಶ್ರದ್ಧಾಂಜಲಿ ಸಭೆಯಲ್ಲಿ ನುಡಿಗೌರವ ಸಲ್ಲಿಸಿದರು.ಹಿಂದು ಸಮಾಜದ ಅಂತಃಸತ್ವ ಧೀಶಕ್ತಿ. ಆಧ್ಯಾತ್ಮ ವಿದ್ಯೆಯನ್ನು ಧೀಶಕ್ತಿ ಜತೆ ಸೇರಿಸಿಕೊಂಡು ಯುವಶಕ್ತಿಯನ್ನು ಮುನ್ನಡೆಸಬೇಕಾದ ಅಗತ್ಯವಿದೆ. ರಾಷ್ಟ್ರ ನಿರ್ಮಾಣದಲ್ಲಿ ನಮ್ಮ ಪಾತ್ರವೇನು ಎನ್ನುವುದನ್ನು ತಿಳಿ ಹೇಳಬೇಕಾಗಿದೆ.ನಿಸ್ವಾರ್ಥ ದಾರಿಯಲ್ಲಿ ನಡೆಯುವ ಬಗೆ ಹೇಗೆ ಹಾಗೂ ದಾರಿಯಲ್ಲಿ ಎದುರಾಗುವ ಸವಾಲೇನು ಎಂಬುದನ್ನು ಯುವಕರಿಗೆ ತಿಳಿ ಹೇಳಬೇಕು.

ಹಳೆ ಬೇರು ಇದ್ದಾಗ ಮಾತ್ರ ಹೊಸ ಚಿಗುರಿಗೆ ಶಕ್ತಿ. ಹಳೆ ಬೇರಿಲ್ಲದೇ ಹೋದರೆ ಹೊಸ ಬೇರಿಗೆ, ಚಿಗುರಿಗೆ ಬಲವೇ ಇಲ್ಲ. ಯುವಜನತೆಗೆ ಅಶೋಕ್ ಸಿಂಘಾಲ್ ಆದರ್ಶಪ್ರಾಯವಾಗಿದ್ದಾರೆ. ಅಯೋಧ್ಯೆಯಲ್ಲಿ ರಾಮ ಮಂದಿರ ನಿರ್ಮಾಣವಾಗದ ಹೊರತು, ಅವರಿಗೆ ಪೂರ್ಣ ಶ್ರದ್ಧಾಂಜಲಿ ಸಲ್ಲಿಕೆಯಾಗದು. ಅವರ ಕನಸನ್ನು ನನಸು ಮಾಡುವ ಜವಾಬ್ದಾರಿ ನಮ್ಮ ಮೇಲಿದೆ ಎಂದರು.

ಆರ್‌ಎಸ್‌ಎಸ್ ಮುಖಂಡ ಡಾ.ಪ್ರಭಾಕರ್ ಭಟ್ ಕಲ್ಲಡ್ಕ ಮಾತನಾಡಿ, ಸಮಾಜ ಕಾರ್ಯಕ್ಕೆ ಜೋಡಿಸುವುದು ಸಂಘಟನೆ ಕೆಲಸ. ರಾಮನ ಕಾರ್ಯವೇ ದೇಶದ ಕಾಯಕ. ಅದಕ್ಕಾಗಿ ಸಂಪೂರ್ಣ ಸಮರ್ಪಿಸಿಕೊಂಡವರು ಅಶೋಕ್ ಸಿಂಘಾಲ್. ತಾನು ಹಿಡಿದ ನಿಲುವಿನಿಂದ ವಿಚಲಿತನಾಗದೇ, ಕೊನೆವರೆಗೂ ಪಟ್ಟು ಹಿಡಿದು ಯಶಸ್ಸು ಕಂಡುಕೊಂಡವರು. ರಾಮಸೇತು ಒಡೆಯಲು ಮುಂದಾದ ಸರ್ಕಾರದ ನಿಲುವನ್ನು ವಿರೋಧಿಸಿದರು. ಅವರು ಬಿಟ್ಟು ಹೋದರು ಅವರ ಆದರ್ಶ, ವಿಚಾರ ಉಳಿದಿದೆ. ರಾಮ ಮಂದಿರ ನಿರ್ಮಾಣ ಮಾಡಬೇಕೆಂಬ ಕನಸನ್ನು ನಾವು ನನಸು ಮಾಡಬೇಕು. ಸರ್ವಸಾಮಾನ್ಯ ಹಿಂದುವಿಗಾಗಿ ನಾವು ಬದುಕಬೇಕು ಎಂದು ನುಡಿಗೌರವ ಸಲ್ಲಿಸಿದರು.ವಿಹಿಂಪ ಪುತ್ತೂರು ಜಿಲ್ಲೆಯ ಅಧ್ಯಕ್ಷ ಡೀಕಯ್ಯ ಪೆರ್‍ವೋಡಿ ಉಪಸ್ಥಿತರಿದ್ದರು.

ವಿಶ್ವೇಶ್ವರ ಭಟ್ ಬಂಗಾರಡ್ಕ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಬಜರಂಗದಳದ ಭಾಸ್ಕರ್ ಸ್ವಾಗತಿಸಿದರು. ಅದಿತಿ ಕೊಂಕೋಡಿ ವೈಯಕ್ತಿಕ ಗೀತೆ ಹಾಡಿದರು. ಬಜರಂಗದಳ ಮಂಗಳೂರು ವಿಭಾಗ ಸಂಚಾಲಕ ಮುರಳೀಕೃಷ್ಣ ಹಸಂತಡ್ಕ ಕಾರ್ಯಕ್ರಮ ನಿರೂಪಿಸಿದರು.