ಮನಸ್ಸಿನ ಶುದ್ದತೆ, ಸ್ವಚ್ಛತೆಗೆ ಸಾಮೂಹಿಕ ಪಾದಯಾತ್ರೆ ಸಹಾಯಕಾರಿ

ಬೆಳ್ತಂಗಡಿ : ನಮ್ಮ ಮನಸ್ಸಿನ ಶುದ್ದತೆ, ಸ್ವಚ್ಛತೆಗೆ ಸಾಮೂಹಿಕ ಪಾದಯಾತ್ರೆ ಸಹಾಯಕಾರಿ. ಶಕ್ತಿ ಕೇಂದ್ರದೆಡೆಗೆ ನಡೆಸುವ ಈ ಕಾರ್ಯದಿಂದ ದೈಹಿಕ, ಮಾನಸಿಕ ಸದ್ಭಾವನೆ ಮೂಡುತ್ತದೆ ಉಜಿರೆ ಶ್ರೀ ಜನಾರ್ದನ ದೇವಸ್ಥಾನದ ಆಡಳಿತ ಮೊಕ್ತೇಸರ ವಿಜಯರಾಘವ ಪಡ್ವೆಟ್ನಾಯ ಹೇಳಿದರು.ಅವರು ಶುಕ್ರವಾರ ಉಜಿರೆ ಶ್ರೀ ಜನಾರ್ದನ ದೇವಸ್ಥಾನದ ಶ್ರೀ ರಾಮಕೃಷ್ಣ ಸಭಾ ಮಂಟಪದಲ್ಲಿ ಶ್ರೀ ಕ್ಷೇತ್ರ ಧರ್ಮಸ್ಥಳ ಲಕ್ಷ ದೀಪೋತ್ಸವ ಪಾದಯಾತ್ರೆ ಸಮಿತಿಯ ಸಮಾಲೋಚನಾ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ಪ್ರಸ್ತಾವಿಸಿದ ತಾಲೂಕು ಹಿತ ರಕ್ಷಣಾ ವೇದಿಕೆಯ ಅಧ್ಯಕ್ಷ ಪ್ರತಾಪಸಿಂಹ ನಾಯಕ್ ಶ್ರೀಕ್ಷೇತ್ರ ಧರ್ಮಸ್ಥಳ ಕೋಟ್ಯಂತರ ಜನರ ಭಕ್ತಿ, ಶ್ರದ್ಧೆ, ನಂಬಿಕೆಯ ನೆಲೆಯಾಗಿ ಸಮಾಧಾನ ಕೊಡುವ ಪುಣ್ಯ ಸನ್ನಿಧಿ. ಕ್ಷೇತ್ರದೆಡೆಗೆ ಸಮಸ್ತ ಭಕ್ತ ಜನರು ಯಾವದೇ ಜಾತಿ ಮತ ಧರ್ಮ ವೃತ್ತಿ ವಯೋಮಾನ ಪಂಥಗಳ ಭೇದ ಮರೆತು ಒಗ್ಗಟ್ಟಿನಿಂದ ಭಕ್ತಿಭಾವ ಭರಿತರಾಗಿ ಪಾದಯಾತ್ರೆ ಮಾಡುವುದರಿಂದ ನಮ್ಮ ನಂಬಿಕೆ, ಶ್ರದ್ಧೆ ಬಲಗೊಂಡು ಬಾಂಧವ್ಯ, ಸ್ನೇಹ ವೃದ್ಧಿಸುವುದು ಎಂದರು.

ಡಿ. 6ರಂದು ಭಾನುವಾರ ಸಂಜೆ 4ಕ್ಕೆ ಉಜಿರೆ ಶ್ರೀ ಜನಾರ್ದನ ಸ್ವಾಮಿ ಸನ್ನಿಧಿಯಿಂದ ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿ ಸನ್ನಿಧಿಗೆ ೩ನೇ ವರ್ಷದ ಪಾದಯಾತ್ರೆಯಲ್ಲಿ ಸ್ವಸ್ಥ ಸಮಾಜದ ನಿರ್ಮಾಣಕ್ಕಾಗಿ ಸ್ವಯಂ ಪ್ರೇರಿತರಾಗಿ ಭಾಗವಹಿಸಿ ಅರ್ಥಪೂರ್ಣಗೊಳಿಸುವಂತೆ ವಿನಂತಿಸಿದರು.ವೇದಿಕೆಯಲ್ಲಿ ಜನಜಾಗೃತಿ ವೇದಿಕೆ ಸ್ಥಾಪಕಾಧ್ಯಕ್ಷ ವಸಂತ ಸಾಲಿಯಾನ್, ವೇದಿಕೆ ಅಧ್ಯಕ್ಷ ಕಿಶೋರ್ ಹೆಗ್ಡೆ, ನಾಗರಿಕ ಸೇವಾ ಸಮಿತಿ ಅಧ್ಯಕ್ಷ ಕೇಶವ ಬಿ., ಕೊಡಗು ಜಿಲ್ಲಾ ಯೋಜನೆಯ ಅಧ್ಯಕ್ಷ ಸೀತಾರಾಮ ಶೆಟ್ಟಿ ಮತ್ತು ಬೆಳ್ತಂಗಡಿ ತಾಲೂಕು ಅಧ್ಯಕ್ಷ ಚಂದ್ರಶೇಖರ ಮುಖ್ಯ ಅತಿಥಿಗಳಾಗಿ ಉಪಸ್ಥಿತರಿದ್ದರು.

ಬೆಳ್ತಂಗಡಿ ತಾಲೂಕಿನ ಎಲ್ಲಾ ದೇವಸ್ಥಾನ, ಭಜನಾ ಮಂದಿರ, ಯುವಕ, ಯುವತಿ ಮಂಡಲಗಳ ಸದಸ್ಯರು ಸಾಂಪ್ರದಾಯಿಕ ಉಡುಗೆಯಲ್ಲಿ ಸಂಜೆ 3ಕ್ಕೆ ಉಜಿರೆ ಶ್ರೀ ಜನಾರ್ದನ ದೇವಸ್ಥಾನದಲ್ಲಿ ಸಮಾವೇಶಗೊಳ್ಳಬೇಕೆಂದು ತಿಳಿಸಲಾಯಿತು. ವಿವಿಧ ವಿಷಯಗಳ ಬಗೆಗೆ ಸಮಾಲೋಚನೆ ನಡೆಸಿ ಚರ್ಚಿಸಲಾಯಿತು. ತಾಲೂಕಿನ 10 ವಲಯಗಳ ಪ್ರತ್ಯೇಕ ಸಭೆ ನಡೆಸಿ ಹೆಚ್ಚಿನ ಸದಸ್ಯರು ಪಾಲ್ಗೊಳ್ಳುವಂತೆ ಪ್ರೇರೇಪಿಸಬೆಕೆಂದು ಸೂಚಿಸಲಾಯಿತು.

ಸಮಾಲೋಚನಾ ಸಭೆಯಲ್ಲಿ ಪೀತಾಂಬರ ಹೆರಾಜೆ, ಸುಬ್ರಾಯ ಶೆಣೈ, ಇ. ಸುಂದರ ಗೌಡ, ರಮೇಶ್ ಪ್ರಭು, ವೆಂಕಟ್ರಮಣ ಹೆಬ್ಬಾರ್, ರಾಜೇಶ್ ಪೈ, ಶರತ್‌ಕೃಷ್ಣ ಪಡ್ವೆಟ್ನಾಯ, ಮೋಹನ್ ಕುಮಾರ್, ಮೋಹನ ಶೆಟ್ಟಿಗಾರ್, ವೆಂಕಟ್ರಾವ್ ಅಡೂರು, ಸುಬ್ರಹ್ಮಣ್ಯ ಅಗರ್ತ, ಜಗದೀಶ್ ಪ್ರಸಾದ್, ಹರೀಶ್ ಕುಮಾರ್, ರಾಜು ಪೂಜಾರಿ, ರೂಪಾ ಜೈನ್, ಭಾಸ್ಕರ ಧರ್ಮಸ್ಥಳ, ರಾಘವೇಂದ್ರ ಬೈಪಾಡಿತ್ತಾಯ, ಬಾಲಕೃಷ್ಣ ಗೌಡ, ವಿವೇಕ್ ವಿನ್ಸೆಂಟ್ ಪಾಯಸ್, ಯೋಗೀಶ್ ಕುಮಾರ್, ಡಾ. ಜಯಕುಮಾರ್ ಶೆಟ್ಟಿ, ವಸಂತ ಮಜಲು, ಮಂಜುನಾಥ ಕಾಮತ್, ಬಾಲಕೃಷ್ಣ ಶೆಟ್ಟಿ, ರಾಮಚಂದ್ರ ಶೆಟ್ಟಿ, ಲಕ್ಷ್ಮಣ, ವಿವಿಧ ವಲಯಗಳ ಪ್ರತಿನಿಧಿಗಳು, ಸದಸ್ಯರು ಹಾಗೂ ಉಜಿರೆ ನಾಗರಿಕರು, ಕ್ಷೇತ್ರದ ಅಭಿಮಾನಿಗಳು ಭಾಗವಹಿಸಿದ್ದರು. ನ್ಯಾಯವಾದಿ ಧನಂಜಯ ರಾವ್ ಸ್ವಾಗತಿಸಿದರು ಶ್ರೀನಿವಾಸ ರಾವ್ ಕಾರ್ಯಕ್ರಮ ನಿರೂಪಿಸಿ, ಜಗದೀಶ್ ಪ್ರಸಾದ್ ವಂದಿಸಿದರು.