ನ. 6 ಹಾಗೂ 7 ರಂದು ಬೆಳ್ತಂಗಡಿ ತಾಲೂಕು ಮಟ್ಟದ ಕ್ರೀಡಾಕೂಟ

ಬೆಳ್ತಂಗಡಿ : ನ. 6 ಹಾಗೂ 7 ರಂದು ಸರಕಾರಿ ಉನ್ನತೀಕರಿಸಿದ ಪ್ರಾಥಮಿಕ ಶಾಲೆ ಬಜಿರೆ ಇಲ್ಲಿ ಬೆಳ್ತಂಗಡಿ ತಾಲೂಕು ಮಟ್ಟದ ಪ್ರಾಥಮಿಕ ಹಾಗೂ ಪ್ರೌಢಶಾಲಾ ಮಕ್ಕಳ ಕ್ರೀಡಾಕೂಟ ನಡೆಯಲಿದೆ ಎಂದು ತಾಲೂಕು ಕ್ರೀಡಾ ಸಮಿತಿ ಅಧ್ಯಕ್ಷ ವಿ. ಪ್ರಭಾಕರ ಹೆಗ್ಡೆ ಹಟ್ಟಾಜೆಗುತ್ತು ತಿಳಿಸಿದರು.ಅವರು ವಾರ್ತಾಭವನದಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ಕ್ರೀಡಾಕೂಟದ ವಿವರ ನೀಡಿದರು.

ಓಟ, ಹ್ಯಾಮರ್‌ಎಸೆತ, ಗುಂಡೆಸೆತ, ಜಾವೆಲಿನ್ ಎಸೆತ, ಎತ್ತರಜಿಗಿತ, ಚಕ್ರಎಸೆತ, ಉದ್ದಜಿಗಿತ, ಪೋಲ್ ವಾಲ್ಟ್, 5 ಕಿ.ಮೀ. ನಡಿಗೆ, ಟ್ರಿಪಲ್‌ಜಂಪ್, ಹರ್ಡಲ್ಸ್, ರಿಲೇ ಮೊದಲಾದ 14 ವಿಧದ ಸ್ಪರ್ಧೆಗಳು ನಡೆಯಲಿವೆ. ಸಮಾರಂಭದ ಯಶಸ್ಸಿಗೆ ವಿವಿಧ ಸಮಿತಿಗಳನ್ನು ರಚಿಸಲಾಗಿದೆ. ತೀರ್ಪುಗಾರರ ಸಮವಸ್ತ್ರಗಳನ್ನು, ಬಹುಮಾನಗಳನ್ನು, ಜಿಗಿತದ ಅಂಕಣಗಳನ್ನು ದಾನಿಗಳು ನೀಡಿದ್ದಾರೆ. ಮೆಸ್ಕಾಂ ಹಾಗೂ ವೇಣೂರು ಪಂಚಾಯತ್ ಸಹಕಾರದಲ್ಲಿ ಕ್ರೀಡಾಂಗಣದ ವಿಸ್ತರಣೆ ನಡೆದಿದೆ ಎಂದು ಮಾಹಿತಿ ನೀಡಿದರು.

ದ.ಕ.ಜಿ.ಪಂ., ಸಾರ್ವಜನಿಕ ಶಿಕ್ಷಣ ಇಲಾಖೆ, ಕ್ಷೇತ್ರ ಶಿಕ್ಷಣಾಧಿಕಾರಿಗಳ ಕಚೇರಿ, ತಾಲೂಕು ಮಟ್ಟದ ಕ್ರೀಡಾಕೂಟದ ನಿರ್ವಹಣಾ ಸಮಿತಿ, ಸರಕಾರಿ ಉನ್ನತೀಕರಿಸಿದ ಶಾಲೆ ಬಜಿರೆ ವತಿಯಿಂದ ನಡೆಯುವ ಈ ಕ್ರೀಡಾಕೂಟನ್ನು ನ. 6 ರಂದು ಶಾಸಕ ಕೆ. ವಸಂತ ಬಂಗೇರ ಉದ್ಘಾಟಿಸಲಿದ್ದು, ತಾ.ಪಂ. ಅಧ್ಯಕ್ಷೆ ಜಯಂತಿ ಪಾಲೇದು, ಜಿ.ಪಂ.ಶಿಕ್ಷಣ ಆರೋಗ್ಯ ಸ್ಥಾಯಿ ಸಮಿತಿ ಅಧ್ಯಕ್ಷೆ ಸಿ.ಕೆ.ಚಂದ್ರಕಲಾ, ತಾ.ಪಂ. ಸದಸ್ಯೆ ಸುಮಿತ್ರಾ, ವೇಣೂರು ಪಂ.ಅಧ್ಯಕ್ಷ ಸತೀಶ್ ಹೆಗ್ಡೆ ಭಾಗವಹಿಸಲಿದ್ದಾರೆ. ನ. 7 ರಂದು ಸಮಾರೋಪ ಸಮಾರಂಭ ನಡೆಯಲಿದೆ ಎಂದರು.

ಗೋಷ್ಠಿಯಲ್ಲಿ ಶಾಲಾ ಮುಖ್ಯೋಪಾಧ್ಯಾಯಿನಿ ಕಮಲಾ ಜಿ.ಎಸ್.ಜೈನ್, ವೇಣೂರು ಪಂ.ಅಧ್ಯಕ್ಷ, ಶಾಲಾ ಮೇಲುಸ್ತುವಾರಿ ಸಮಿತಿ ಅಧ್ಯಕ್ಷ ಸತೀಶ್ ಹೆಗ್ಡೆ, ದೈಹಿಕ ಶಿಕ್ಷಣ ಶಿಕ್ಷಕ ನಿರಂಜನ್, ಸಮಿತಿ ಸದಸ್ಯ ಹರಿಪ್ರಸಾದ್ ಮುದ್ದಾಡಿ ಇದ್ದರು.