ಅಫ್ಘಾನಿಸ್ಥಾನದ ವಿರುದ್ಧ ʼಮುಕ್ತ ಯುದ್ಧʼ ಘೋಷಿಸಿದ ಪಾಕಿಸ್ಥಾನ

ಕಾಬುಲ್‌: ಪಾಕಿಸ್ಥಾನ ಮತ್ತು ಅಫ್ಘಾನಿಸ್ಥಾನ ನಡುವಿನ ಗಡಿ ವಿವಾದ ಇಂದು ತೀವ್ರ ಸಂಘರ್ಷಕ್ಕೆ ತಿರುಗಿದೆ. ಪಾಕಿಸ್ಥಾನ ರಕ್ಷಣಾ ಸಚಿವ ಖ್ವಾಜಾ ಮೊಹಮ್ಮದ್ ಆಸಿಫ್ ಅವರು ಅಧಿಕೃತವಾಗಿ “ಓಪನ್ ವಾರ್” (ಮುಕ್ತ ಯುದ್ಧ) ಘೋಷಿಸಿದ್ದಾರೆ. ಇದು ಎರಡು ನೆರೆಹೊರೆಯ ದೇಶಗಳ ನಡುವೆ ತಿಂಗಳುಗಳಿಂದ ನಡೆಯುತ್ತಿದ್ದ ಟಿಟ್-ಫಾರ್-ಟ್ಯಾಟ್ ದಾಳಿಗಳ ನಂತರದ ಅತಿ ದೊಡ್ಡ ಸಂಘರ್ಷ ಎಂದು ವರದಿಯಾಗಿದೆ.

ಪಾಕಿಸ್ಥಾನ ಸೇನೆಯು ರಾತ್ರಿ ಅಫ್ಘಾನಿಸ್ಥಾನದ ರಾಜಧಾನಿ ಕಾಬೂಲ್, ಕಂದಹಾರ್ ಮತ್ತು ಪಕ್ತಿಯಾ ಪ್ರಾಂತ್ಯಗಳಲ್ಲಿ ವಾಯುದಾಳಿ ನಡೆಸಿದೆ ಎಂದು ಎರಡೂ ದೇಶಗಳ ಅಧಿಕಾರಿಗಳು ದೃಢಪಡಿಸಿದ್ದಾರೆ. ಕಾಬೂಲ್‌ನಲ್ಲಿ ಬಾಂಬ್ ಸ್ಫೋಟಗಳು ಮತ್ತು ಯುದ್ಧ ವಿಮಾನಗಳ ಸದ್ದು ಕೇಳಿಸಿದೆ ಎಂದು ಸ್ಥಳೀಯ ಸಾಕ್ಷಿಗಳು ತಿಳಿಸಿದ್ದಾರೆ.

ಕೆಲವು ವರದಿಗಳ ಪ್ರಕಾರ ಕಪ್ಪು ಹೊಗೆ ಮತ್ತು ಬೆಂಕಿ ಕಾಣಿಸಿದೆ. ಪಾಕಿಸ್ಥಾನ ಪ್ರಧಾನಿ ಕಚೇರಿಯ ಪ್ರತಿನಿಧಿ ಮೊಶರ್ರಫ್ ಅಲಿ ಜೈದಿ ಅವರು ಈ ದಾಳಿಗಳಲ್ಲಿ 133 ಅಫ್ಘಾನ್ ತಾಲಿಬಾನ್ ಯೋಧರು ಸತ್ತಿದ್ದಾರೆ, 200ಕ್ಕೂ ಹೆಚ್ಚು ಗಾಯಗೊಂಡಿದ್ದಾರೆ ಎಂದು ಹೇಳಿದ್ದಾರೆ. ಇದಲ್ಲದೆ 27 ಅಫ್ಘಾನ್ ಸೈನಿಕ ಪೋಸ್ಟ್‌ಗಳನ್ನು ನಾಶಪಡಿಸಲಾಗಿದೆ ಮತ್ತು 9 ಜನರನ್ನು ಸೆರೆಹಿಡಿಯಲಾಗಿದೆ ಎಂದು ಪಾಕಿಸ್ಥಾನ  ಹೇಳಿದೆ. ಇದನ್ನು “ಆಪರೇಷನ್ ಘಜಬ್ ಲಿಲ್ ಹಖ್”  ಎಂದು ಹೆಸರಿಸಲಾಗಿದೆ ಎಂದು ವರದಿಯಾಗಿದೆ.

ಆದರೆ ಅಫ್ಘಾನಿಸ್ಥಾನ ತಾಲಿಬಾನ್ ಸರ್ಕಾರದ ವಕ್ತಾರ ಜಬಿಹುಲ್ಲಾ ಮುಜಾಹಿದ್ ಅವರು ಈ ಸಂಖ್ಯೆಯನ್ನು ತಿರಸ್ಕರಿಸಿದ್ದಾರೆ. ಅವರ ಪ್ರಕಾರ ಪಾಕಿಸ್ಥಾನದ ದಾಳಿಗಳಲ್ಲಿ ಯಾವುದೇ ದೊಡ್ಡ ನಷ್ಟವಾಗಿಲ್ಲ ಎಂದು ಹೇಳಿದ್ದಾರೆ. ಇದಕ್ಕೂ ಮೊದಲು ಗುರುವಾರ ರಾತ್ರಿ ಅಫ್ಘಾನ್ ಪಡೆಗಳು ಪಾಕಿಸ್ತಾನ್ ಗಡಿ ಪೋಸ್ಟ್‌ಗಳ ಮೇಲೆ ದೊಡ್ಡ ದಾಳಿ ನಡೆಸಿ 55 ಪಾಕಿಸ್ತಾನಿ ಸೈನಿಕರು ಸತ್ತಿದ್ದಾರೆ, ಹಲವರು ಸೆರೆಯಾಗಿದ್ದಾರೆ ಎಂದು ತಾಲಿಬಾನ್ ಹೇಳಿದೆ. 19 ಪಾಕಿಸ್ತಾನಿ ಪೋಸ್ಟ್‌ಗಳನ್ನು ನಾಶಪಡಿಸಲಾಗಿದೆ ಎಂದೂ ಅವರು ವಾದಿಸಿದ್ದಾರೆ.

ಪಾಕಿಸ್ಥಾನವು ತನ್ನ ದೇಶದೊಳಗೆ ನಡೆಯುತ್ತಿರುವ ದಾಳಿಗಳಿಗೆ ಅಫ್ಘಾನಿಸ್ಥಾನ ಆಶ್ರಯ ನೀಡುತ್ತಿದೆ ಎಂದು ಆರೋಪಿಸುತ್ತಿರುವುದು ಈ ಸಂಘರ್ಷಕ್ಕೆ ಕಾರಣವಾಗಿದೆ.