ಅಶೋಕ ವಾಟಿಕಾದಲ್ಲಿ ಹನುಮಂತ ತೋರಿದ ಆದರ್ಶವನ್ನೇ ಭಾರತೀಯ ಸೇನೆ ಅನುಸರಿಸಿತು: ರಾಜನಾಥ್

ನವದೆಹಲಿ: ಪಹಲ್ಗಾಮ್ ದಾಳಿಯ ಪ್ರತೀಕಾರವಾಗಿ ಆಪರೇಷನ್ ಸಿಂಧೂರ್ ಅಡಿಯಲ್ಲಿ ವಾಯುದಾಳಿಗಳನ್ನು ನಿಖರತೆ, ಎಚ್ಚರಿಕೆಯಿಂದ ಮತ್ತು ಸೂಕ್ಷ್ಮತೆಯಿಂದ ನಡೆಸಲಾಗಿದೆ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಇಂದು ಹೇಳಿದ್ದಾರೆ.

ಆರು ರಾಜ್ಯಗಳು ಮತ್ತು 2 ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಗಡಿ ರಸ್ತೆಗಳ ಸಂಘಟನೆಯ 50 ಮೂಲಸೌಕರ್ಯ ಯೋಜನೆಗಳ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಸಿಂಗ್, ಪಾಕಿಸ್ತಾನ ಮತ್ತು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದಲ್ಲಿನ ಗುರಿಗಳನ್ನು ಹೊಡೆದುರುಳಿಸಿದ ಯಶಸ್ವಿ ಕಾರ್ಯಾಚರಣೆಗಾಗಿ ಸಶಸ್ತ್ರ ಪಡೆಗಳಿಗೆ ಧನ್ಯವಾದ ಅರ್ಪಿಸಿದರು.

ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ನಡೆದ ಭಯೋತ್ಪಾದಕ ದಾಳಿಯಲ್ಲಿ 25 ಪ್ರವಾಸಿಗರು ಮತ್ತು ಒಬ್ಬ ಕಾಶ್ಮೀರಿ ಪೋನಿ ರೈಡ್ ಆಪರೇಟರ್ ಸಾವನ್ನಪ್ಪಿದ ನಂತರ ಭಾರತ ಪ್ರತಿಕ್ರಿಯಿಸುವ ಹಕ್ಕನ್ನು ಚಲಾಯಿಸಿದೆ ಎಂದು ಸಿಂಗ್ ಹೇಳಿದರು. ಭಯೋತ್ಪಾದಕರು ಗಡಿಯಾಚೆಗಿನ ಸಂಪರ್ಕವನ್ನು ಹೊಂದಿದ್ದರು ಮತ್ತು ತನಿಖೆಯು ಪಾಕಿಸ್ತಾನದ ಪಾತ್ರವನ್ನು ತೋರಿಸಿದೆ, ಹಿಂದೆ ಭಾರತೀಯ ನೆಲದಲ್ಲಿ ನಡೆದ ಹಲವಾರು ದಾಳಿಗಳಂತೆ ಪಾಕಿಸ್ಥಾನದ ಸಂಪರ್ಕ ಬಯಲಾಗಿದೆ ಎಂದರು.

ಭಾರತದ ಸಶಸ್ತ್ರ ಪಡೆಗಳು ಇತಿಹಾಸವನ್ನು ಬರೆದಿವೆ ಮತ್ತು ಪಡೆಗಳನ್ನು ಬೆಂಬಲಿಸಿದ್ದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿಯವರನ್ನು ಶ್ಲಾಘಿಸಿವೆ ಎಂದು ರಕ್ಷಣಾ ಸಚಿವರು ಹೇಳಿದರು. ರಾಮಾಯಣ ಉಲ್ಲೇಖಿಸಿದ ಅವರು, ರಾವಣ ಸೀತೆಯನ್ನು ಬಂಧಿಸಿದ ಅಶೋಕ ವಾಟಿಕಾ ವನವನ್ನು ನಾಶಪಡಿಸಿದಾಗ ಹನುಮಂತ ತೋರಿದ ಆದರ್ಶವನ್ನು ಭಾರತವು ಪ್ರತಿದಾಳಿ ನಡೆಸಿದಾಗ ಅನುಸರಿಸಿತು. ಹಾನಿ ಮಾಡಿದವರಿಗೆ ಮಾತ್ರ ನಾವು ಹಾನಿ ಮಾಡಿದ್ದೇವೆ. ನಾಗರಿಕರಿಗೆ ಯಾವುದೇ ಹಾನಿಯಾಗದಂತೆ ನೋಡಿಕೊಂಡಿದ್ದೇವೆ ಎಂದು  ಸಿಂಗ್ ಹೇಳಿದರು.