ಮಣಿಪುರದ ಕ್ರಿಶ್ಚಿಯನ್ನರನ್ನು ಸಂಘರ್ಷಕ್ಕೆ ಪ್ರಚೋದಿಸುತ್ತಿದೆ ಖಲಿಸ್ಥಾನಿ ಸಂಘಟನೆ

ನವದೆಹಲಿ: ಜುಲೈ 2020 ರಲ್ಲಿ ಭಾರತದಿಂದ ಭಯೋತ್ಪಾದಕ ಎಂದು ಘೋಷಿಸಲ್ಪಟ್ಟ ಗುರುಪತ್ವಂತ್ ಸಿಂಗ್ ಪನ್ನುನ್ ನೇತೃತ್ವದ ನಿಷೇಧಿತ ಖಲಿಸ್ಥಾನಿ ಸಂಘಟನೆಯು ಮಣಿಪುರದ ಕ್ರಿಶ್ಚಿಯನ್ನರನ್ನು ಮತ್ತು  ಮುಸ್ಲಿಮರು, ತಮಿಳರನ್ನು ಭಾರತದಿಂದ ಪ್ರತ್ಯೇಕಗೊಳ್ಳಲು ಪ್ರಚೋದಿಸುತ್ತಿದೆ ಎಂದು ಗುಪ್ತಚರ ಸಂಸ್ಥೆಗಳ ವರದಿ ತಿಳಿಸಿದೆ.

ನಿಷೇಧಿತ ಸಂಘಟನೆ ಸಿಖ್ಸ್ ಫಾರ್ ಜಸ್ಟೀಸ್ (SFJ) ಪ್ರಧಾನಿ ನರೇಂದ್ರ ಮೋದಿ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮತ್ತು ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಅವರಿಗೆ ಬೆದರಿಕೆಗಳನ್ನು ಒಳಗೊಂಡಂತೆ ಭಯೋತ್ಪಾದಕ ಚಟುವಟಿಕೆಗಳನ್ನು ಸಹ ಯೋಜಿಸಿದೆ ಎಂಬ ಅಂಶವನ್ನು ಸರ್ಕಾರವು SFJ ಮೇಲಿನ ನಿಷೇಧವನ್ನು ಇನ್ನೂ ಐದು ವರ್ಷಗಳ ಕಾಲ ವಿಸ್ತರಿಸುವ ಗೆಜೆಟ್ ಅಧಿಸೂಚನೆಯಲ್ಲೂ ಪ್ರಕಟಿಸಿದೆ.

“ಅಲ್ಪಸಂಖ್ಯಾತ ಸಮುದಾಯಗಳನ್ನು ಇತರ ಸಮುದಾಯಗಳ ವಿರುದ್ಧ ಪ್ರಚೋದಿಸುವ ಮೂಲಕ ಜನರನ್ನು ಕೋಮುವಾದಿ ನೆಲೆಯಲ್ಲಿ ವಿಭಜಿಸುವುದು SFJ ಯ ಭಾರತ ವಿರೋಧಿ ಕಾರ್ಯಸೂಚಿಯನ್ನು ಹೆಚ್ಚಿಸುವ ಪ್ರಮುಖ ಸಾಧನವಾಗಿದೆ. SFJ ಮಣಿಪುರದ ಕ್ರಿಶ್ಚಿಯನ್ ಸಮುದಾಯವನ್ನು ಪ್ರತ್ಯೇಕ ದೇಶಕ್ಕಾಗಿ ಧ್ವನಿ ಎತ್ತುವಂತೆ, ತಮಿಳುನಾಡಿನ ಜನರು ‘ದ್ರಾವಿಡಸ್ಥಾನ’ದ ಧ್ವಜಗಳನ್ನು ಹಾರಿಸುವಂತೆ ಪ್ರಚೋದಿಸುತ್ತಿದೆ ಮತ್ತು ‘ಅಲ್ಪಸಂಖ್ಯಾತರ ವಿರುದ್ಧ ಕಿರುಕುಳ’ ಎಂಬ ಸುಳ್ಳನ್ನು ಹಬ್ಬುವ ಮೂಲಕ ಮುಸ್ಲಿಂ ಭಾವನೆಗಳನ್ನು ಕೆರಳಿಸುತ್ತಿದೆ ಮತ್ತು ಭಾರತದ ಮುಸ್ಲಿಮರನ್ನು ಪ್ರತ್ಯೇಕ ‘ಉರ್ದುಸ್ಥಾನ’ವನ್ನು ರೂಪಿಸಲು ಪ್ರಚೋದಿಸುತ್ತಿದೆ” ಎಂದು ಗುಪ್ತಚರ ಸಂಸ್ಥೆಗಳು ಸಿದ್ಧಪಡಿಸಿದ ಟಿಪ್ಪಣಿಯಲ್ಲಿ ತಿಳಿಸಲಾಗಿದೆ.

“ಇದಲ್ಲದೆ, SFJ ಭಾರತದ ದಲಿತರನ್ನು ತನ್ನ ಪ್ರತ್ಯೇಕತಾವಾದಿ ಕಾರ್ಯಕ್ಕೆ ಬೆಂಬಲ ನೀಡುವಂತೆ ಒತ್ತಾಯಿಸುತ್ತಿದೆ, ಭಾರತ ಸರ್ಕಾರ ದಲಿತರ ವಿರುದ್ಧ ಇದೆ ಎಂದು ಅವರನ್ನು ದಾರಿ ತಪ್ಪಿಸುವ ಪ್ರಯತ್ನ ನಡೆಸುತ್ತಿದೆ. SFJ ಕೃಷಿ ಮಸೂದೆಗಳಿಗಾಗಿ ಪಂಜಾಬ್ ಮತ್ತು ಹರಿಯಾಣದ ರೈತರನ್ನು ಪ್ರಚೋದಿಸುವಲ್ಲಿಯೂ ತೊಡಗಿಸಿಕೊಂಡಿತ್ತು” ಎಂದು ಅದು ಹೇಳಿದೆ.