ನೇತಾಜಿ ಸಾವಿನ ಬಗ್ಗೆ ವಿವಾದಾತ್ಮಕ ಪೋಸ್ಟ್: ರಾಹುಲ್ ಗಾಂಧಿ ವಿರುದ್ಧ ಎಫ್ಐಆರ್ ದಾಖಲು

ಕೋಲ್ಕತ್ತಾ: ಜನವರಿ 23 ರಂದು ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಜನ್ಮ ವಾರ್ಷಿಕೋತ್ಸವದಂದು ಅವರಿಗೆ ಗೌರವ ಸಲ್ಲಿಸುವಾಗ ತಮ್ಮ ಅಧಿಕೃತ ಎಕ್ಸ್ ಹ್ಯಾಂಡಲ್‌ನಲ್ಲಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ನಿಧನದ ದಿನಾಂಕವನ್ನು ಉಲ್ಲೇಖಿಸಿದ್ದಕ್ಕಾಗಿ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ವಿರುದ್ಧ ಭಾನುವಾರ ಕೋಲ್ಕತ್ತಾದ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ.

ಅಖಿಲ ಭಾರತೀಯ ಹಿಂದೂ ಮಹಾಸಭಾ ದಕ್ಷಿಣ ಕೋಲ್ಕತ್ತಾದ ಭವಾನಿಪುರ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಿಸಿದೆ. ಎಫ್‌ಐಆರ್ ದಾಖಲಿಸಿದ ನಂತರ, ದಕ್ಷಿಣ ಕೋಲ್ಕತ್ತಾದ ಎಲ್ಗಿನ್ ರಸ್ತೆಯಲ್ಲಿರುವ ನೇತಾಜಿಯ ಪೂರ್ವಜರ ಮನೆಯ ಬಳಿಯೂ ಗುಂಪಿನ ಕಾರ್ಯಕರ್ತರು ರಾಹುಲ್ ಗಾಂಧಿಯವರ ವಿವಾದಾತ್ಮಕ ಪೋಸ್ಟ್‌ ಅನ್ನು  ವಿರೋಧಿಸಿ ಪ್ರತಿಭಟನೆ ನಡೆಸಿದರು.

ಅಖಿಲ ಭಾರತೀಯ ಹಿಂದೂ ಮಹಾಸಭಾ ರಾಜ್ಯಾಧ್ಯಕ್ಷ ಚಂದ್ರಚೂಡ್ ಗೋಸ್ವಾಮಿ ಅವರ ಪ್ರಕಾರ, ರಾಹುಲ್ ಗಾಂಧಿಯವರು ನೇತಾಜಿ ಅವರನ್ನು ಮೊದಲು ಕಾಂಗ್ರೆಸ್ ತೊರೆಯುವಂತೆ ಮತ್ತು ನಂತರ ದೇಶ ತೊರೆಯುವಂತೆ ಒತ್ತಾಯಿಸಿದ ಪರಂಪರೆಯನ್ನು ಹೊಂದಿದ್ದಾರೆ. “ರಾಹುಲ್ ಗಾಂಧಿ ಮತ್ತು ಅವರ ಪೂರ್ವಜರು ಯಾವಾಗಲೂ ಭಾರತದ ಜನರ ನೆನಪಿನಿಂದ ನೇತಾಜಿಯ ನೆನಪುಗಳನ್ನು ಅಳಿಸಿಹಾಕಲು ಪ್ರಯತ್ನಿಸುತ್ತಲೇಬಂದಿದ್ದಾರೆ. ಭಾರತದ ಜನರು ಅವರನ್ನು ಶಿಕ್ಷಿಸುತ್ತಾರೆ. ಯಾರಾದರೂ ನೇತಾಜಿಯ ಬಗ್ಗೆ ಮಾಹಿತಿಯನ್ನು ವಿರೂಪಗೊಳಿಸಲು ಪ್ರಯತ್ನಿಸಿದರೆ ನಾವು ಪ್ರತಿಭಟಿಸುತ್ತೇವೆ” ಎಂದು ಗೋಸ್ವಾಮಿ ಹೇಳಿದರು.

ರಾಹುಲ್‌ ಗಾಂಧಿ ತಮ್ಮ ಎಕ್ಸ್‌ ಪೋಸ್ಟ್‌ನಲ್ಲಿ ಆಗಸ್ಟ್ 18, 1945 ಅನ್ನು ಅಪ್ರತಿಮ ಸ್ವಾತಂತ್ರ್ಯ ಹೋರಾಟಗಾರನ ಮರಣದ ವರದಿ ದಿನಾಂಕ ಎಂದು ಉಲ್ಲೇಖಿಸಿದ್ದಾರೆ. ಅವರು ಉಲ್ಲೇಖಿಸಿದ ದಿನಾಂಕವು ನೇತಾಜಿಯನ್ನು ಸೈಗಾನ್‌ನಿಂದ ಕರೆದೊಯ್ಯುತ್ತಿದ್ದ ಮತ್ತು ಆಗಿನ USSR ಆಕ್ರಮಿತ ಮಂಚೂರಿಯಾಕ್ಕೆ ಹೋಗಬೇಕಾಗಿದ್ದ ವಿಮಾನವು ತೈಹೋಕು (ಪ್ರಸ್ತುತ ತೈಪೆ) ಯಲ್ಲಿ ಅಪಘಾತಕ್ಕೀಡಾದ ದಿನಾಂಕವಾಗಿದೆ.

ಆದರೆ, ಆ ದಿನಾಂಕವನ್ನು ನೇತಾಜಿಯ ‘ಕಣ್ಮರೆ’ಯ ದಿನಾಂಕವೆಂದು ಸೂಚಿಸಲಾಗುತ್ತದೆಯೆ ಹೊರತು ಮರನ ದಿನವೆಂದಲ್ಲ. ಇದುವರೆಗೂ ಅವರ ಮರಣ ಆಗಸ್ಟ್ 18, 1945 ಎಂದು ದೃಢೀಕರಿಸಲು ಸಾಧ್ಯವಾಗಿಲ್ಲ, ಹೀಗಾಗಿ ಅವರ ಸಾವಿನ ನಿಖರವಾದ ದಿನಾಂಕದ ಸುತ್ತ ನಿಗೂಢತೆ ಸುತ್ತುವರೆದಿದೆ.