ದೆಹಲಿ ಮಾರುಕಟ್ಟೆ ಪ್ರವೇಶಿಸಿದ ಕರ್ನಾಟಕದ ಹೆಮ್ಮೆಯ ನಂದಿನಿ ಉತ್ಪನ್ನಗಳು

ನವದೆಹಲಿ: ಕರ್ನಾಕ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಗುರುವಾರ ದೆಹಲಿ-ಎನ್‌ಸಿಆರ್ ಮಾರುಕಟ್ಟೆಯಲ್ಲಿ ಕರ್ನಾಟಕ ಹಾಲು ಒಕ್ಕೂಟದ (ಕೆಎಂಎಫ್) ನಂದಿನಿ ಬ್ರಾಂಡ್ ಹಾಲಿನ ಉತ್ಪನ್ನಗಳನ್ನು ಬಿಡುಗಡೆ ಮಾಡಿದರು, ಈ ಪ್ರದೇಶದಲ್ಲಿ ಹಿಡಿತ ಸಾಧಿಸಲು ಪ್ರತಿಸ್ಪರ್ಧಿಗಳಿಗಿಂತ ಸ್ವಲ್ಪ ಕಡಿಮೆ ಬೆಲೆಯನ್ನು ಉತ್ಪನ್ನಗಳಿಗೆ ನಿಗದಿಪಡಿಸಿದ್ದಾರೆ.

ಕೆಎಂಎಫ್ ಶುಕ್ರವಾರದಿಂದ ಹಸುವಿನ ಹಾಲಿನ‌ ನಾಲ್ಕು ವೇರಿಯೆಂಟ್ಸ್, ಮೊಸರು ಮತ್ತು ಮಜ್ಜಿಗೆಗಳನ್ನು ಚಿಲ್ಲರೆಯಾಗಿ ಮಾರಾಟ ಮಾಡುತ್ತದೆ, ಇದು ಮದರ್ ಡೈರಿ ಮತ್ತು ಅಮುಲ್‌ನಂತಹ ಬ್ರಾಂಡ್‌ಗಳಿಗೆ ಹೋಲಿಸಿದರೆ ಸ್ಪರ್ಧಾತ್ಮಕ ಬೆಲೆಯೊಂದಿಗೆ ಗ್ರಾಹಕರನ್ನು ಸೆಳೆಯಲು ಮುಂದಾಗಿದೆ.

ಹಸುವಿನ ಹಾಲು ಲೀಟರ್‌ಗೆ ರೂ 56, ಪೂರ್ಣ ಕೆನೆ ಹಾಲು ಲೀಟರ್‌ಗೆ ರೂ 67, ಸ್ಟಾಂಡರ್ಡೈಸ್ಡ್ ಹಾಲು ಲೀಟರ್‌ಗೆ ರೂ 61, ಟೋನ್ಡ್ ಹಾಲು ಲೀಟರ್‌ಗೆ ರೂ 55 ಮತ್ತು ಮೊಸರು ರೂ 74 ಕ್ಕೆ ಮಾರಾಟವಾಗಲಿದೆ.

ರಾಜ್ಯದಲ್ಲಿ ನಮ್ಮಲ್ಲಿ ಹೆಚ್ಚುವರಿ ಹಾಲು ಇದೆ, ಮಂಡ್ಯ ಹಾಲು ಒಕ್ಕೂಟದೊಂದಿಗೆ ಕೆಎಂಎಫ್ ದೆಹಲಿ-ಎನ್‌ಸಿಆರ್‌ನಲ್ಲಿ ದಿನಕ್ಕೆ 3-4 ಲಕ್ಷ ಲೀಟರ್ ಹೆಚ್ಚುವರಿ ಹಾಲನ್ನು ಮಾರಾಟ ಮಾಡಲಿದೆ ಎಂದು ಸಿದ್ದರಾಮಯ್ಯ ಅವರು ಉತ್ಪನ್ನಗಳನ್ನು ಬಿಡುಗಡೆ ಮಾಡಿದ ನಂತರ ಸುದ್ದಿಗಾರರಿಗೆ ತಿಳಿಸಿದರು.

ಒಕ್ಕೂಟವು ಪ್ರಸ್ತುತ ಪ್ರತಿದಿನ 100 ಲಕ್ಷ ಲೀಟರ್ ಹಾಲನ್ನು ಸಂಗ್ರಹಿಸುತ್ತದೆ, ಸ್ಥಳೀಯ ಬಳಕೆ 60 ಲಕ್ಷ ಲೀಟರ್‌ಗಳಷ್ಟಿದೆ, ಹೊಸ ಮಾರುಕಟ್ಟೆಗಳಿಗೆ ವಿಸ್ತರಣೆಗಾಗಿ 40 ಲಕ್ಷ ಲೀಟರ್‌ಗಳ ಹೆಚ್ಚುವರಿ ಉಳಿದಿದೆ.

50-54 ಗಂಟೆಗಳ ಕಾಲ 2,500 ಕಿ.ಮೀ.ಗೂ ಹೆಚ್ಚು ಹಾಲನ್ನು ಸಾಗಿಸುವಲ್ಲಿ ಇರುವ ಸವಾಲುಗಳನ್ನು ಕೂಡ ಮುಖ್ಯಮಂತ್ರಿ ಒಪ್ಪಿಕೊಂಡರು.

ಹೆಚ್ಚುವರಿ ಹಾಲಿಗೆ ಹೊಸ ಮಾರುಕಟ್ಟೆಗಳನ್ನು ಕಂಡುಹಿಡಿಯುವ ಅವಶ್ಯಕತೆಯಿದೆ ಮತ್ತು ಕ್ರಮೇಣ ಕೆಎಂಎಫ್ ದೆಹಲಿ-ಎನ್‌ಸಿಆರ್‌ನಲ್ಲಿ ದಿನಕ್ಕೆ 5-6 ಲಕ್ಷ ಲೀಟರ್‌ಗಳನ್ನು ಮಾರಾಟ ಮಾಡಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು.

ಸಾಗಣೆಯ ಸಮಯದಲ್ಲಿ ಹಾಲಿನ ಗುಣಮಟ್ಟ ಕಾಯ್ದುಕೊಳ್ಳಲಾಗುವುದು ಎಂದು ಕೆಎಂಎಫ್ ಅಧ್ಯಕ್ಷ ಎಲ್‌ಬಿಪಿ ಭೀಮಾನಾಯ್ಕ್ ಭರವಸೆ ನೀಡಿದರು.

ಮಾರಾಟವನ್ನು ಸುಲಭಗೊಳಿಸಲು ಫೆಡರೇಶನ್ ಈಗಾಗಲೇ ದೆಹಲಿ-ಎನ್‌ಸಿಆರ್ ಪ್ರದೇಶದಲ್ಲಿ 40 ಡೀಲರ್‌ಗಳೊಂದಿಗೆ ಪಾಲುದಾರಿಕೆ ಹೊಂದಿದೆ ಎಂದು ಅವರು ಹೇಳಿದರು.

26.76 ಲಕ್ಷ ಹಾಲು ಉತ್ಪಾದಕರು, 15,737 ಡೈರಿ ಸಹಕಾರ ಸಂಘಗಳು ಮತ್ತು 15 ಜಿಲ್ಲಾ ಹಾಲು ಒಕ್ಕೂಟಗಳ ದೃಢವಾದ ಮೂಲಸೌಕರ್ಯದೊಂದಿಗೆ ಕೆಎಂಎಫ್ ರೂ 25,000 ಕೋಟಿ ವಹಿವಾಟು ಹೊಂದಿದೆ ಮತ್ತು 25 ಕ್ಕೂ ಹೆಚ್ಚು ದೇಶಗಳಿಗೆ ಡೈರಿ ಉತ್ಪನ್ನಗಳನ್ನು ರಫ್ತು ಮಾಡುತ್ತದೆ.

ಉತ್ಪನ್ನ ಬಿಡುಗಡೆ ಸಮಾರಂಭದಲ್ಲಿ ರಾಜ್ಯ ಪಶುಸಂಗೋಪನಾ ಸಚಿವ ಕೆ.ವೆಂಕಟೇಶ್, ಕೃಷಿ ಸಚಿವ ಎನ್.ಚೆಲುವರಾಯಸ್ವಾಮಿ ಉಪಸ್ಥಿತರಿದ್ದರು.