ಸಾರ್ವಜನಿಕ ಸುರಕ್ಷತೆಗಾಗಿ ನೈಜ-ಸಮಯದ ಪ್ರವಾಹ ಎಚ್ಚರಿಕೆ ಅಪ್ಲಿಕೇಶನ್ ಪ್ರಾರಂಭ

ನವದೆಹಲಿ: ಭಾರೀ ಮಳೆಯಿಂದಾಗಿ ಈ ಬಾರಿ ದೇಶದ ಹಲವು ರಾಜ್ಯಗಳು ತೀವ್ರ ಸಂಕಷ್ಟವನ್ನು ಎದುರಿಸಿದೆ. ಇಂತಹ ಸಂದರ್ಭದಲ್ಲಿ ಪ್ರವಾಹದ ವೇಳೆ ಜನರ ಸುರಕ್ಷತೆಯನ್ನು ಖಚಿತಪಡಿಸುವ ಸಲುವಾಗಿ ದೇಶದಾದ್ಯಂತದ 592 ಮೇಲ್ವಿಚಾರಣಾ ಕೇಂದ್ರಗಳಿಂದ ನೈಜ-ಸಮಯದ ಪ್ರವಾಹ ಮುನ್ಸೂಚನೆಗಳು ಈಗ ಅಪ್ಲಿಕೇಶನ್ ಮೂಲಕ ಲಭ್ಯವಾಗುವಂತೆ ಮಾಡಲಾಗಿದೆ.

ಜಲಶಕ್ತಿ ಸಚಿವ ಸಿಆರ್ ಪಾಟೀಲ್ ಅವರು ಮಂಗಳವಾರ ತಮ್ಮ ಕಚೇರಿಯಲ್ಲಿ ಫ್ಲಡ್ ವಾಚ್ ಇಂಡಿಯಾ 2.0 ಅನ್ನು ದೇಶದ ಪ್ರವಾಹ ಪರಿಸ್ಥಿತಿಗಳ ವ್ಯಾಪಕ ಅವಲೋಕನಕ್ಕಾಗಿ ಸಕ್ರಿಯಗೊಳಿಸಿದರು

ಕುಡಿಯುವ, ನೀರಾವರಿ ಮತ್ತು ವಿದ್ಯುತ್ ಉತ್ಪಾದನೆಗೆ ಪ್ರಮುಖವಾದ 150 ಪ್ರಮುಖ ಜಲಾಶಯಗಳ ಶೇಖರಣಾ ಮಟ್ಟಗಳು ಸಾರ್ವಜನಿಕರಿಗೆ ಇದರಡಿ ಆಪ್‌ ಮೂಲಕ ಲಭ್ಯವಿರುತ್ತವೆ ಎಂದು ಸಚಿವರು ಹೇಳಿದರು. ಇಲ್ಲಿಯವರೆಗೆ, 200 ಕೇಂದ್ರಗಳಲ್ಲಿ ಪ್ರವಾಹ ಮುನ್ಸೂಚನೆಗಳಿಗೆ ಡೇಟಾ ಲಭ್ಯವಿತ್ತು. ಆದರೆ ಈ ಅಪ್ಲಿಕೇಶನ್ ಮುಳುಗಡೆ ಸಾಧ್ಯತೆಯ ಬಗ್ಗೆ ಮುಂಚಿತವಾಗಿ ಮಾಹಿತಿಯನ್ನು ಒದಗಿಸುತ್ತದೆ, ಅದರ ಆಧಾರದ ಮೇಲೆ ಸಾರ್ವಜನಿಕರನ್ನು ಸ್ಥಳಾಂತರಿಸಲು ನಿರ್ಧಾರಗಳನ್ನು ತೆಗೆದುಕೊಳ್ಳಬಹುದು. ಇದು ರಾಷ್ಟ್ರೀಯವಾಗಿ ಮೇಲ್ವಿಚಾರಣೆ ಮಾಡಲಾದ 150 ಜಲಾಶಯಗಳ ಕೆಳಭಾಗದ ಪ್ರದೇಶಗಳಲ್ಲಿ ಪ್ರವಾಹದ ಮುನ್ಸೂಚನೆಗಳನ್ನು ನೀಡುತ್ತದೆ.

ಧಾರಾಕಾರ ಮಳೆ, ಪ್ರವಾಹ ಮತ್ತು ಭೂಕುಸಿತಗಳು ಹಲವು ರಾಜ್ಯಗಳ ಮೇಲೆ ವ್ಯತಿರಿಕ್ತ ಪ್ರಭಾವವನ್ನು ಬೀರಿದ್ದು, ನೂರಾರು ಜನರನ್ನು ಬಲಿಪಡೆದುಕೊಂಡಿದೆ ಮತ್ತು ಕಳೆದ ತಿಂಗಳು ಸಾಮಾನ್ಯಕ್ಕಿಂತ ಹೆಚ್ಚಿನ ಮಾನ್ಸೂನ್‌ನ ಪರಿಣಾಮವಾಗಿ ಸಾವಿರಾರು ಜನರನ್ನು ಸ್ಥಳಾಂತರಿಸಲಾಗಿದೆ. ಹವಾಮಾನ ವಿಜ್ಞಾನಿಗಳು ವಿಪರೀತ ಮಳೆ ಮತ್ತು ಹವಾಮಾನ ಬದಲಾವಣೆ, ಮೇಘಸ್ಫೋಟಗಳಿಗೆ ಪರಿಸರ ಸೂಕ್ಷ್ಮ ವಲಯಗಳಲ್ಲಿ ತ್ವರಿತ ಮೂಲಸೌಕರ್ಯ ಅಭಿವೃದ್ಧಿಯೇ ಮೂಲ ಕಾರಣ ಎಂದು ಹೇಳುತ್ತಿದ್ದಾರೆ. ಜುಲೈ 30 ರಂದು, ಕೇರಳದ ವಯನಾಡಿನಲ್ಲಿ ತೀವ್ರ ಮಳೆಯ ನಡುವೆ ಭಾರೀ ಭೂಕುಸಿತಗಳು ಸಂಭವಿಸಿ 231 ಜನರನ್ನು ಬಲಿ ತೆಗೆದುಕೊಂಡಿವೆ ಎಂದು ರಾಜ್ಯ ಸರ್ಕಾರದ ಇತ್ತೀಚಿನ ಅಂಕಿಅಂಶಗಳು ತಿಳಿಸಿವೆ.