ಮೋದಿ ಭೇಟಿ ಹಿನ್ನೆಲೆ ಜಮ್ಮು-ಕಾಶ್ಮೀರದಲ್ಲಿ ತೀವ್ರ ಕಣ್ಗಾವಲು, ಹೈಟೆಕ್‌ ಭದ್ರತಾ ವ್ಯವಸ್ಥೆ

ನವದೆಹಲಿ: ಎರಡು ದಿನಗಳ ಭೇಟಿಗಾಗಿ ಪ್ರಧಾನಿ ನರೇಂದ್ರ ಮೋದಿ ಇಂದು ಜಮ್ಮು ಮತ್ತು ಕಾಶ್ಮೀರಕ್ಕೆ ತೆರಳಲಿದ್ದು, ಇದು ಜಾಗತಿಕ ಗಮನ ಸೆಳೆಯಲಿದೆ. ನಾಳೆ ಶ್ರೀನಗರದ ದಾಲ್ ಸರೋವರದ ದಡದಲ್ಲಿ ಯೋಗ ಕಾರ್ಯಕ್ರಮ ನಡೆಯಲಿದೆ. ಐತಿಹಾಸಿಕ ಮೂರನೇ ಅವಧಿಗೆ ಆಯ್ಕೆಯಾದ ನಂತರ ಕೇಂದ್ರಾಡಳಿತ ಪ್ರದೇಶಕ್ಕೆ ಇದು ಅವರ ಮೊದಲ ಭೇಟಿಯಾಗಿದೆ.

ಪ್ರಧಾನಮಂತ್ರಿಯವರು ಶ್ರೀನಗರದ ತಾಂತ್ರಿಕ ವಿಮಾನ ನಿಲ್ದಾಣದಿಂದ ಬಾದಾಮಿ ಬಾಗ್‌ಗೆ ಹೆಲಿಕಾಪ್ಟರ್ ಮೂಲಕ ಪ್ರಯಾಣಿಸಲಿದ್ದಾರೆ, ಮೊದಲಿ ರಾಜಭವನಕ್ಕೆ ತೆರಳುತ್ತಾರೆ ಮತ್ತು ನಂತರ ರಸ್ತೆಯ ಮೂಲಕ ಎಸ್‌ಕೆಐಸಿಸಿಗೆ ತೆರಳಲಿದ್ದಾರೆ.

ಕೇಂದ್ರಾಡಳಿತ ಪ್ರದೇಶದಲ್ಲಿ ಭಯೋತ್ಪಾದಕರ ದಾಳಿಗಳ ನಡುವೆಯೇ ಪ್ರಧಾನಿ ಮೋದಿಯವರ ಭೇಟಿಯ ಹಿನ್ನೆಲೆಯಲ್ಲಿ ಶ್ರೀನಗರ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಭಾರೀ ಭದ್ರತಾ ವ್ಯವಸ್ಥೆ ಮಾಡಲಾಗಿದೆ.. ಭದ್ರತಾ ಕ್ರಮಗಳು ಕಟ್ಟುನಿಟ್ಟಾಗಿದ್ದು, ಗೊತ್ತುಪಡಿಸಿದ “ಕೆಂಪು ವಲಯ” ಗಳಲ್ಲಿ ಸಂಚಾರ ನಿರ್ಬಂಧಿಸಲಾಗಿದೆ. SPG (ವಿಶೇಷ ರಕ್ಷಣಾ ಗುಂಪು) ಸಿಬ್ಬಂದಿಯಿಂದ ಕಣಿವೆಯನ್ನು ಭದ್ರತಾ ಕೋಟೆಯಾಗಿ ಪರಿವರ್ತಿಸಲಾಗಿದೆ.

ರಾಜಭವನ ಮತ್ತು ಎಸ್‌ಕೆಐಸಿಸಿ ಸೇರಿದಂತೆ ಇಡೀ ಪ್ರದೇಶವನ್ನು ರಾತ್ರಿಯಿಡೀ ಸಂಪೂರ್ಣ ಭದ್ರತಾ ಕಣ್ಗಾವಲಿಗೆ ಒಳಪಡಿಸಲಾಗಿದೆ ಎಂದು ಅಧಿಕಾರಿಯೊಬ್ಬರು ದೃಢಪಡಿಸಿದರು, ದಾಲ್ ಸರೋವರಕ್ಕೆ ಎದುರಾಗಿರುವ ಸ್ಥಳಗಳಲ್ಲಿ ಮಾರ್ಕೋಸ್ ಮತ್ತು ಎಸ್‌ಪಿಜಿ ಘಟಕಗಳನ್ನು ನಿಯೋಜಿಸಲಾಗಿದೆ.

ಎಸ್‌ಪಿಜಿ ಜೊತೆಗೆ ನೌಕಾಪಡೆಯ ಮಾರ್ಕೊ ಕಮಾಂಡೋಗಳು ಎಸ್‌ಕೆಐಸಿಸಿ ಸುತ್ತಲೂ ಬೀಡುಬಿಟ್ಟಿದ್ದಾರೆ. ಮೊಬೈಲ್ ಭದ್ರತಾ ಬಂಕರ್‌ಗಳು, ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಮತ್ತು ಹೈಟೆಕ್ ಕಣ್ಗಾವಲು ಸಾಧನಗಳೊಂದಿಗೆ ನೂರಾರು ಭದ್ರತಾ ಸಿಬ್ಬಂದಿ ನಗರದಾದ್ಯಂತ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ.

“ಇದು ಬಹು ಹಂತದ ಭದ್ರತೆಯಾಗಿದೆ. ಭದ್ರತಾ ಪ್ರೋಟೋಕಾಲ್‌ಗಳ ಪ್ರಕಾರ, ಇಲ್ಲಿ ಹೈ-ಅಲರ್ಟ್ ಭದ್ರತಾ ವ್ಯವಸ್ಥೆಯನ್ನು ಮಾಡಲಾಗಿದೆ” ಎಂದು ಐಜಿಪಿ ಕಾಶ್ಮೀರ ವಲಯದ ಐಜಿಪಿ ವಿಧಿ ಕುಮಾರ್ ಬಿರ್ಡಿ ತಿಳಿಸಿದ್ದಾರೆ.

ದಾಲ್ ಸರೋವರದ ದಂಡೆಯಲ್ಲಿರುವ ಶೇರ್-ಎ-ಕಾಶ್ಮೀರ್ ಇಂಟರ್‌ನ್ಯಾಶನಲ್ ಕನ್ವೆನ್ಷನ್ ಕಾಂಪ್ಲೆಕ್ಸ್ ಅಥವಾ ಎಸ್‌ಕೆಐಸಿಸಿಯಲ್ಲಿ ಶುಕ್ರವಾರದ ಯೋಗ ಅಧಿವೇಶನದಲ್ಲಿ ಸುಮಾರು 4,000 ಜನರು ಪಾಲ್ಗೊಳ್ಳುವ ನಿರೀಕ್ಷೆಯಿದೆ.