ಜಯಂಟ್ಸ್ ವತಿಯಿಂದ ಅಂಚೆಯಣ್ಣನಿಗೆ ಸನ್ಮಾನ ಮತ್ತು ಹಿಂದಿ ದಿವಸ ಆಚರಣೆ

ಉಡುಪಿ : ಜಯಂಟ್ಸ್ ಸಂಸ್ಥೆ ಮತ್ತು ಉಡುಪಿ ಪ್ರಧಾನ ಅಂಚೆ ಕಛೇರಿ ಬುಧವಾರದಂದು ಹಿಂದಿ ದಿವಸ ಆಚರಣೆಯನ್ನು ನಡೆಸಲಾಯಿತು. ಮುಖ್ಯ ಅತಿಥಿಯಾಗಿ ಶ್ರೀಮತಿ ತಾರಾ ಭಾಗವತ್ ಮಾತನಾಡುತ್ತಾ `ಹಿಂದಿ ಭಾಷೆಯನ್ನು ನಿರಂತರ ಬಳಸುವುದು ತಮ್ಮ ವ್ಯವಹಾರದ ಜೀವನದಲ್ಲಿ ಮುಖ್ಯವಾಗಿ ಅಳವಡಿಸಿಕೊಂಡರೆ ಭಾಷೆ ಸಮೃದ್ಧಿಯಾಗಿ ಬೆಳೆಯುವುದು. ಹಿಂದಿ ರಾಷ್ಟ್ರ ಭಾಷೆಯಾಗಿದ್ದು ದೇಶದ ನಾನಾ ಭಾಗಗಳಲ್ಲಿ ತಮ್ಮ ಮಾತೃಭಾಷೆಯನ್ನಾಗಿ ಬಳಸುವುದನ್ನು ಕಾಣಬಹುದು. ಪ್ರತಿಯೊಂದು ಭಾಷೆಯು ತನ್ನದೇ ಆದ ವಿಶಿಷ್ಟವನ್ನು ಹೊಂದಿದ್ದು, ತಾರತಮ್ಯ ಮಾಡುವುದು ಸರಿಯಲ್ಲ ಎಂದು ತಿಳಿಹೇಳಿದರು.

ಉಡುಪಿಯ ಜಯಂಟ್ಸ್ ಸಂಸ್ಥೆಯು ಉಡುಪಿ ಪ್ರಧಾನ ಅಂಚೆ ಕಛೇರಿಯಲ್ಲಿ ಪೋಸ್ಟ್‌ಮ್ಯಾನ್‌ಗಳಾಗಿ ಸೇವೆ ಸಲ್ಲಿಸುತ್ತಿರುವ ಶ್ರೀ ಪುಷ್ಪರಾಜ್ ಬ್ರಹ್ಮಾವರ ಇವರನ್ನು ಉಡುಪಿ ಅಂಚೆ ಕಛೇರಿಯ ಅಧೀಕ್ಷಕರಾದ  ನವೀನ್‌ಚಂದರ್ ಮತ್ತು ಜಯಂಟ್ಸ್ ವಲಯ ನಿರ್ದೇಶಕರಾದ ದೇವದಾಸ್ ಕಾಮತ್ ಸ್ಮರಣಿಕೆ ನೀಡಿ ಗೌರವಿಸಿದರು. ಶ್ರೀಮತಿ ಪ್ರಮೀಳಾ ಉಡುಪಿ ಇವರನ್ನು ಜಯಂಟ್ಸ್ ಸಂಸ್ಥೆಯ ಅಧ್ಯಕ್ಷರಾದ ವಿಶ್ವನಾಥ ಶೆಣೈ ಹಾಗೂ ಅಂಚೆ ಕಛೇರಿಯ ಉಪನಿರೀಕ್ಷಕರಾದ  ಜಯರಾಮ್ ಶೆಟ್ಟಿ ಹೂಹಾರ, ಸ್ಮರಣಿಕೆ, ಶಾಲು ಹೊದಿಸಿ, ಫಲಪುಷ್ಪ ನೀಡಿ ಗೌರವಿಸಿದರು.

 ನವೀನ್‌ಚಂದರ್ ಮಾತನಾಡುತ್ತಾ ನಮ್ಮ ಅಂಚೆ ಕಛೇರಿಯ ಸಿಬ್ಬಂದಿಯನ್ನು ಗುರುತಿಸಿ ಜಯಂಟ್ಸ್ ಸಂಸ್ಥೆ ಅಭಿನಂದಿಸಿರುವುದು ಪೋಸ್ಟ್‌ಮ್ಯಾನ್‌ಗಳ ಪ್ರಾಮಾಣಿಕತೆ, ನಿಷ್ಠೆಗೆ ಸಂದ ಗೌರವವಾಗಿದೆ. ದೇವದಾಸ್ ಕಾಮತ್ ಮಾತನಾಡುತ್ತಾ, ಅಂಚೆ ಇಲಾಖೆ ಮತ್ತು ಜನಸಾಮಾನ್ಯರ ನಡುವೆ ಸೇತುವೆಯಾಗಿ ಇವರ ಸೇವೆಯನ್ನು ಗುರುತಿಸಿದೆ. ಮುಂದಿನ ದಿನಗಳಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಸೇವೆ ಸಲ್ಲಿಸುತ್ತಿರುವ ಸಿಬ್ಬಂದಿಗಳನ್ನು ಗುರುತಿಸುವ ಕಾರ್ಯ ಜಯಂಟ್ಸ್ ಸಂಸ್ಥೆಯಿಂದ ನಡೆಯಲೆಂದು ಶುಭಹಾರೈಸಿದರು. ಈ ಸಂದರ್ಭದಲ್ಲಿ ಅಂಚೆಕಛೇರಿಯ ಪೋಸ್ಟ್ ಮಾಸ್ಟರ್ ಆದ  ಜಗನ್ನಾಥ್ ನಾಯಕ್, ಕಾರ್ಯದರ್ಶಿ  ಗಣೇಶ್ ಕೆ.ಆರ್. ಹಾಗೂ ಅಂಚೆ ಸಿಬ್ಬಂದಿಗಳು, ಸಾರ್ವಜನಿಕರಿ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.  ದೇವದಾಸ್ ಕಾಮತ್ ಸ್ವಾಗತಿಸಿ, ಶ್ರೀ ನರಸಿಂಹ ನಾಯಕ್ ವಂದನಾರ್ಪಣೆಗೈದರು.