ವಾಣಿಜ್ಯೋದ್ಯಮವಾಗಿ ಪರಿವರ್ತನೆಯಾಗುತ್ತಿದೆ ರಾಮೇಶ್ವರಂ: ಭಕ್ತರಿಂದ ಪ್ರತಿಭಟನೆ

ಚೆನ್ನೈ: ರಾಮೇಶ್ವರಂ ರಾಮನಾಥಸ್ವಾಮಿ ದೇವಸ್ಥಾನದಲ್ಲಿ ಭಕ್ತಾದಿಗಳ ಹಕ್ಕನ್ನು ಕಸಿದುಕೊಂಡು ದೇವಸ್ಥಾನವನ್ನು ವಾಣಿಜ್ಯೋದ್ಯಮವನ್ನಾಗಿ ಪರಿವರ್ತಿಸಲಾಗುತ್ತಿದೆ ಎಂದು ಆರೋಪಿಸಿ ಜಂಟಿ ಆಯುಕ್ತರ ವಿರುದ್ಧ ಸೋಮವಾರ ಭಕ್ತರು ಪ್ರತಿಭಟನೆ ನಡೆಸಿದ್ದಾರೆ.

ರಾಮೇಶ್ವರಂನಲ್ಲಿ ಸೋಮವಾರ ಜನರು ಸ್ವಯಂಪ್ರೇರಿತವಾಗಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡು ಮುತ್ತಿಗೆ ಹಾಕಿದರು. ಅಂಗಡಿಗಳು ಮತ್ತು ವಾಣಿಜ್ಯ ಸಂಸ್ಥೆಗಳನ್ನು ಸ್ವಯಂಪ್ರೇರಿತವಾಗಿ ಬಂದ್‌ ಮಾಡಲಾಗಿತ್ತು. ಇದರಿಂದ ನಗರದ ಜನಜೀವನ ಅಸ್ತವ್ಯಸ್ತಗೊಂಡಿತ್ತು. ಜಂಟಿ ಆಯುಕ್ತರ ವರ್ಗಾವಣೆಗೆ ಆಗ್ರಹಿಸಿ ಭಕ್ತರು ಸಂಪೂರ್ಣ ಬಂದ್‌ ಪ್ರತಿಭಟನೆ ನಡೆಸಿದರು. ರಾಮೇಶ್ವರಂ ರಾಮನಾಥಸ್ವಾಮಿ ದೇವಸ್ಥಾನವು ಸಾಂಪ್ರದಾಯಿಕ ಆಚರಣೆಗಳನ್ನು ಬದಲಿಸಿ ಆದಾಯಕ್ಕೆ ಮಾತ್ರ ಒತ್ತು ನೀಡಲಾಗುತ್ತಿದೆ ಎಂದು ಭಕ್ತರು ಆರೋಪಿಸಿದ್ದಾರೆ.

ದೇವಸ್ಥಾನಕ್ಕೆ ಬರುವ ಯಾತ್ರಾರ್ಥಿಗಳಿಗೆ ಉಚಿತ ವಸತಿ, ಕುಡಿಯುವ ನೀರು, ಶೌಚಾಲಯದಂತಹ ಮೂಲ ಸೌಕರ್ಯಗಳಿಲ್ಲ. ಇದಕ್ಕೆ ವ್ಯತಿರಿಕ್ತವಾಗಿ ಶುಲ್ಕ ಆಧಾರಿತ ದರ್ಶನಕ್ಕೆ ಆದ್ಯತೆ ನೀಡಿ ಪ್ರಹಾರಗಳಲ್ಲಿ ಬ್ಯಾರಿಕೇಡ್‌ಗಳನ್ನು ಹಾಕಲಾಗಿದೆ. ಸ್ಥಳೀಯ ಸಾರ್ವಜನಿಕರು, ಹಿರಿಯ ನಾಗರಿಕರು ಮತ್ತು ವಿಕಲಚೇತನರು ಯಾವುದೇ ತೊಂದರೆ ಇಲ್ಲದೆ ದರ್ಶನ ಪಡೆಯಲು ಸಾಧ್ಯವಾಗುತ್ತಿಲ್ಲ ಎಂದು ಭಕ್ತರು ಆರೋಪಿಸಿದ್ದಾರೆ.

ದೇವಾಲಯದ ಆಡಳಿತವು ಕಾಶಿಯಿಂದ ಯಾತ್ರಿಕರು ತರುವ ಗಂಗಾ ತೀರ್ಥಕ್ಕೆ ಮೀಸಲಿಟ್ಟ ಪೂಜಾ ಸ್ಥಳವನ್ನು ಸ್ಥಳಾಂತರಿಸಿದೆ ಮತ್ತು ಸ್ಪಟಿಕಲಿಂಗದ ದರ್ಶನಕ್ಕೆ 200 ರೂಪಾಯಿಗಳನ್ನು ವಿಧಿಸುತ್ತಿದೆ ಎಂದು ಆರೋಪಿಸಿದ್ದಾರೆ. ಇತ್ತೀಚಿನ ಈ ಕ್ರಮಗಳ ವಿರುದ್ಧ ಸಾರ್ವಜನಿಕರು ಮತ್ತು ರಾಜಕೀಯ ಪಕ್ಷಗಳು ಪ್ರತಿಭಟನೆಗಳನ್ನು ನಡೆಸುತ್ತಿವೆ.

ராமநாதபுரம் மாவட்டத்தில் இன்று பொது வேலை நிறுத்த கடையடைப்பு போராட்டம் #Protest #Ramanathapuram #Rameshwaram #RamanathaSwamyTemple #Jayaplus pic.twitter.com/bnuHFkiA5M

— Jaya Plus (@jayapluschannel) July 31, 2023