ಮೈ ದೇಶ್ ಫೌಂಡೇಷನ್ : ಸೈನಿಕರಿಗಾಗಿ ದೇಶಾಭಿಮಾನ ಮೆರೆದ ದೇಶಭಕ್ತರು

ಧಾರವಾಡ : ಕಾರ್ಗಿಲ್ ವಿಜಯ ದಿವಸ ಪ್ರಯುಕ್ತ ಧಾರವಾಡದಲ್ಲಿ ಮೈ ದೇಶ್ ಫೌಂಡೇಷನ್ ವತಿಯಿಂದ ಆಯೋಜಿಸಿದ್ದ ಸೈನಿಕರಿಗಾಗಿ 2ಕೆ ರನ್‌ ನಲ್ಲಿ ನಿರೀಕ್ಷೆಗೂ ಮೀರಿ ಪಾಲ್ಗೊಂಡಿದ್ದ ಜನರು ದೇಶಾಭಿಮಾನ ಮೆರೆದು ಕಾರ್ಯಕ್ರಮ ಯಶಸ್ವಿಗೊಳಿಸಿದರು.

ನಗರದ ಕೆಸಿಡಿ ಕಾಲೇಜು ವೃತ್ತದಿಂದ ಆರಂಭವಾದ ರನ್‌ಗೆ ಕೆಯುಐಡಿಎಫ್‌ಸಿ ಕಾರ್ಯನಿರ್ವಾಹಕ ನಿರ್ದೇಶಕ ಮೇಜರ್ ಸಿದ್ದಲಿಂಗಯ್ಯ ಹಿರೇಮಠ ಹಾಗೂ ರಣಜಿ ಕ್ರಿಕೆಟ್ ಮಾಜಿ ಆಟಗಾರ ಸೋಮಶೇಖರ ಶಿರಗುಪ್ಪಿ ಬಲೂನ್ ಹಾರಿಬಿಡುವ ಮೂಲಕ ಚಾಲನೆ ನೀಡಿದರು.

ಬಳಿಕ ಭಾರತೀಯ ಸೈನ್ಯ ಹಾಗೂ ದೇಶಾಭಿಮಾನದ ಪರ ಘೋಷಣೆಗಳನ್ನು ಹಾಕುತ್ತಲೇ ಜ್ಯುಬಿಲಿ ವೃತ್ತ, ಕೋರ್ಟ್ ವೃತ್ತ ಮಾರ್ಗವಾಗಿ ಜಿಲ್ಲಾಧಿಕಾರಿ ಕಚೇರಿಯಿಂದ ಕಾರ್ಗಿಲ್ ಸ್ತೂಪ ತಲುಪಿದರು. ರನ್ ಆರಂಭವಾದ ಕೆಲ ಹೊತ್ತಿನಲ್ಲೇ ರಭಸವಾಗಿ ಸುರಿದ ಮಳೆಯನ್ನೂ ಲೆಕ್ಕಿಸದ ಜನರು ಕಾರ್ಗಿಲ್ ಸ್ತೂಪವರೆಗೂ ಓಡಿದರು.

ಇದಕ್ಕೂ ಪೂರ್ವ ನಡೆದ ವೇದಿಕೆ ಸಮಾರಂಭದಲ್ಲಿ ಕಾರ್ಗಿಲ್ ಯುದ್ಧದಲ್ಲಿ ಪಾಲ್ಗೊಂಡಿದ್ದ ಯೋಧರಾದ ಭೀಮಪ್ಪ ಜಾಧವ, ವೀರೇಶ ಹಸಬಿ, ಸುರೆಸಹ ತೇಗೂರ, ನಿಂಗಪ್ಪ ಹೂಗಾರ ಹಾಗೂ ಪರಶುರಾಮ ಕ್ಯಾತಪ್ಪನವರ ಅವರಿಗೆ ಸನ್ಮಾನಿಸಲಾಯಿತು.

2ಕೆ ರನ್‌ಗೆ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ, ಗ್ರಾಮ ವಿಕಾಸ ಸಂಸ್ಥೆ, ಸಾಯಿರಾಮ ಡೆವಲಪರ್ಸ್ ಆ್ಯಂಡ್ ಬಿಲ್ಡರ್ಸ್, ಎಚ್‌ಸಿಜಿ ಎನ್‌ಎಂಆರ್ ಕ್ಯಾನ್ಸರ್ ಸೆಂಟರ್ ಹುಬ್ಬಳ್ಳಿ, ಟ್ರು ಮಿಶ್ರಾ, ಆಶಾಕಿರಣ ಫೌಂಡೇಷನ್, ಭಾರತ ಬುಕ್ ಡಿಪೋ ಹಾಗೂ ಫ್ಯಾಟ್ ಬಾಯ್ ಕಮಿಟಿ ಸೇರಿ ಇತರ ಸಂಸ್ಥೆಗಳ ಸಹಕಾರ ನೀಡಿದವು.

ವಿಜಯವಾಣಿ ದಿನಪತ್ರಿಕೆ ಸ್ಥಾನಿಕ ಸಂಪಾದಕ ಪ್ರಕಾಶ ಶೇಟ್, ಎಚ್‌ಸಿಜಿ ಎನ್‌ಎಂಆರ್ ಕ್ಯಾನ್ಸರ್ ಸೆಂಟರ್‌ನ ಡಾ. ಅಬ್ದುಲ್, ಗ್ರಾಮ ವಿಕಾಸ ಸಂಸ್ಥೆಯ ಜಗದೀಶ ನಾಯ್ಕ, ಆಶಾಕಿರಣ ಫೌಂಡೇಷನ್‌ನ ಅಜಯ ಜೋಶಿ, ಸಾಯಿರಾಮ ಡೆವಲಪರ್ಸ್ ಆ್ಯಂಡ್ ಬಿಲ್ಡರ್ಸ್‌ನ ಮಂಜುನಾಥ ಮಕ್ಕಲಗೇರಿ, ವಸಂತ ಮುರ್ಡೇಶ್ವರ, ಕರ್ನಾಟಕ ಸೈನಿಕರ ಕಲ್ಯಾಣ ಸಮಿತಿ ಅಧ್ಯಕ್ಷ ಚಂದ್ರಶೇಖರ ಅಮಿನಗಡ, ಮೈ ದೇಶ್ ಪ್ರತಿಷ್ಠಾನದ ಗುರುದತ್ತ ದೇಶಪಾಂಡೆ, ವಿಷ್ಣು ಹುಕ್ಕೇರಿ, ಶ್ರೀನಿಧಿ ಹುಯಿಲಗೋಳ, ಲೋಕೇಶ ಪಾಟೀಲ, ಪದಾಧಿಕಾರಿಗಳು, ಮಾಜಿ ಹಾಗೂ ಹಾಲಿ ಯೋಧರು, ಇತರರು ಇದ್ದರು.