ಉಧಂಪುರದಲ್ಲಿ ಯೋಗ ದಿನ: ಸೇನೆಯ ಜೀವನ ವಿಧಾನವಾಗಿ ಯೋಗ ಪ್ರಚಾರ

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಉಧಂಪುರದಲ್ಲಿ ಯೋಗವನ್ನು ಸೇನೆಯ ಜೀವನ ವಿಧಾನವಾಗಿ ಪ್ರಚಾರ ಮಾಡಲಾಗುತ್ತಿದೆ ಮತ್ತು ವಿಶೇಷವಾಗಿ ಉತ್ತರ ಕಮಾಂಡ್‌ನ ಪರ್ವತ ಮತ್ತು ಎತ್ತರದ ಪ್ರದೇಶಗಳಲ್ಲಿ ನಿಯೋಜಿಸಲಾದ ಪಡೆಗಳಿಗೆ ಯೋಗ ಅವಿಭಾಜ್ಯ ಭಾಗವಾಗಿದೆ. ಎಲ್ಲಾ ಶ್ರೇಯಾಂಕಗಳ ಯೋಧರು ತಮ್ಮ ಮಾನಸಿಕ/ದೈಹಿಕ ಆರೋಗ್ಯವನ್ನು ಹೆಚ್ಚಿಸಲು ಒಂದು ಪ್ರಮುಖ ಅಂಶವಾಗಿ ಯೋಗವನ್ನು ಅಳವಡಿಸಿಕೊಂಡಿದ್ದಾರೆ.

ಅಂತಾರಾಷ್ಟ್ರೀಯ ಯೋಗ ದಿನವಾದ ಇಂದು ಹೆಚ್ಚಿನ ಸಂಖ್ಯೆಯ ಸ್ಥಳಗಳಲ್ಲಿ ಯೋಗವನ್ನು ಆಯೋಜಿಸುವ ಮೂಲಕ ಉತ್ತರ ಕಮಾಂಡ್‌ನ ಘಟಕಗಳು ಮತ್ತು ರಚನೆಗಳಿಂದ ವಿಶಿಷ್ಟವಾದ ಸಾಧನೆಯನ್ನು ಮಾಡಿವೆ. ಯೋಗದ ಕುರಿತಾದ ಅಭಿಯಾನವು ಉತ್ತರ ಕಮಾಂಡ್‌ನಾದ್ಯಂತ “ಸಿಂಧೂನಿಂದ ಗಂಗಾನದಿಯವರೆಗೆ” ಹರಡಿತು ಮತ್ತು 1,75,000 ಸೈನಿಕರು ಮತ್ತು 75,000 ಕುಟುಂಬಗಳು ಯೋಗ ಸೆಷನ್‌ಗಳಲ್ಲಿ ಹೆಚ್ಚಿನ ಉತ್ಸಾಹದಿಂದ ಭಾಗವಹಿಸಿದರು ಎಂದು ವರದಿಗಳು ತಿಳಿಸಿವೆ.

ಲೆ.ಜನರಲ್ ಉಪೇಂದ್ರ ದ್ವಿವೇದಿ, ಜಿಒಸಿ-ಇನ್-ಸಿ, ನಾರ್ದರ್ನ್ ಕಮಾಂಡ್ ಕೂಡ ಉಧಂಪುರದಲ್ಲಿ ಆಯೋಜಿಸಲಾದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಮಾನಸಿಕ ಒತ್ತಡ ಮತ್ತು ಆಯಾಸವನ್ನು ಎದುರಿಸಲು ಅತ್ಯಂತ ಎತ್ತರದ ಪ್ರದೇಶಗಳಲ್ಲಿ ಮತ್ತು ಕಠಿಣ ಹವಾಮಾನ ಪರಿಸ್ಥಿತಿಗಳಲ್ಲಿ ಯೋಗವನ್ನು ತಮ್ಮ ದೈನಂದಿನ ದಿನಚರಿಯಲ್ಲಿ ಅಳವಡಿಸಿಕೊಂಡಿದ್ದಕ್ಕಾಗಿ ಅವರು ಸೈನಿಕರು ಮತ್ತು ಕುಟುಂಬಗಳನ್ನು ಶ್ಲಾಘಿಸಿದರು. ಯೋಗವು ಒತ್ತಡ ನಿರ್ವಹಣೆ ಮತ್ತು ಯುದ್ಧ ದಕ್ಷತೆಯ ಸುಧಾರಣೆಗೆ ಒಂದು ಪ್ರಧಾನ ಸಾಧನವಾಗಿದೆ. ಸೇನಾ ಕಮಾಂಡರ್ ಅವರು ತಮ್ಮ ದೈಹಿಕ ಮತ್ತು ಮಾನಸಿಕ ಸಾಮರ್ಥ್ಯಗಳನ್ನು ಮತ್ತಷ್ಟು ವಿಸ್ತರಿಸಲು ಯೋಗವನ್ನು ಅಭ್ಯಾಸ ಮಾಡಲು ಸೈನಿಕರಿಗೆ ಪ್ರೋತ್ಸಾಹಿಸಿದರು.

ಅಂತರಾಷ್ಟ್ರೀಯ ಯೋಗ ದಿನದ ಪ್ರಯುಕ್ತ ಯೋಗ ಶಿಬಿರವನ್ನು ಉಧಂಪುರದಲ್ಲಿ ಆಯೋಜಿಸಲಾಗಿತ್ತು. ಉಧಮ್‌ಪುರ ಮಿಲಿಟರಿ ಠಾಣೆಯ ಅಧಿಕಾರಿಗಳು, ಮಹಿಳೆಯರು ಮತ್ತು ಇತರ ಶ್ರೇಣಿಗಳು ಈ ಕಾರ್ಯಕ್ರಮದಲ್ಲಿ ಉತ್ಸಾಹದಿಂದ ಭಾಗವಹಿಸಿದರು. ಅರ್ಹ ಯೋಗ ತರಬೇತುದಾರರು ಯೋಗ ಕಾರ್ಯಕ್ರಮ ಆಯೋಜಿಸಲು ಸಹಾಯ ಮಾಡಿದರು ಮತ್ತು ಯೋಗದ ಕಲೆ ಮತ್ತು ವಿಜ್ಞಾನದ ಜ್ಞಾನವನ್ನು ನೀಡಿದರು. ಆಸನಗಳು, ಪ್ರಾಣಾಯಾಮ ಮತ್ತು ಧ್ಯಾನ ಮತ್ತು ಅವುಗಳ ಪ್ರಯೋಜನಗಳನ್ನು ತಿಳಿಸಿದರು. ಯೋಗವು ಕೇವಲ ದೈಹಿಕ ವ್ಯಾಯಾಮವಲ್ಲ, ಆರೋಗ್ಯಕರ ಜೀವನಕ್ಕೆ ಜೀವನ ವಿಧಾನವಾಗಿದೆ ಎಂದು ಒತ್ತಿ ಹೇಳಿದರು.