ಡಿಜಿಟಲ್ ಪಾವತಿ, ಹಣಕಾಸು ತಂತ್ರಜ್ಞಾನದಲ್ಲಿ ಭಾರತದ ಸಾಧನೆ ಶ್ಲಾಘಿಸಿದ ಯುಎಸ್‌ ರಾಯಭಾರಿ

ನವದೆಹಲಿ: ಭಾರತದಲ್ಲಿನ ಯುಎಸ್ ರಾಯಭಾರಿ ಎರಿಕ್ ಗಾರ್ಸೆಟ್ಟಿ ಅವರು  ಡಿಜಿಟಲ್ ಪಾವತಿ ಮತ್ತು ಹಣಕಾಸು ತಂತ್ರಜ್ಞಾನದಲ್ಲಿ ಭಾರತದ ಸಾಧನೆಗಳನ್ನು ಶ್ಲಾಘಿಸಿದ್ದಾರೆ.

ಎರಿಕ್ ಗಾರ್ಸೆಟ್ಟಿ ಅವರು “ಅಡ್ವಾನ್ಸಿಂಗ್ ಇಂಡಿಯಾ – ಯುಎಸ್ ಇನಿಶಿಯೇಟಿವ್ ಆನ್ ಕ್ರಿಟಿಕಲ್ ಅಂಡ್ ಎಮರ್ಜಿಂಗ್ ಟೆಕ್ನಾಲಜೀಸ್ (ಐಸಿಇಟಿ)” ಕುರಿತು ಸಿಐಐ ದುಂಡುಮೇಜಿನ ಸಭೆಯಲ್ಲಿ ಮಾತನಾಡಿ, “ನಾನು ಭಾರತ ಹೊಂದಿರುವ ಡಿಜಿಟಲ್ ಪಾವತಿ ಮತ್ತು ಹಣಕಾಸು ತಂತ್ರಜ್ಞಾನವನ್ನು ನೋಡಿದಾಗ, ನಿಜಕ್ಕೂ ನಾವು ಜಗತ್ತನ್ನು ಬೆಚ್ಚಿಬೀಳಿಸಿದ್ದೇವೆ” ಎಂದು ಹೇಳಿದರು. ಅಲ್ಲದೇ ಭಾರತದಲ್ಲಿ ಡಿಜಿಟಲ್ ಪಾವತಿ ಸೌಲಭ್ಯಗಳು ದೇಶದ ಅತ್ಯಂತ ದೂರದ ಭಾಗವನ್ನು ತಲುಪಿವೆ ಎಂದು ಅವರು ಹೈಲೈಟ್ ಮಾಡಿದರು.

ಇತ್ತೀಚಿನ ದಿನಗಳಲ್ಲಿ ಭಾರತವು ಡಿಜಿಟಲ್ ಪಾವತಿ ವಹಿವಾಟುಗಳಲ್ಲಿ ಗಮನಾರ್ಹ ಬೆಳವಣಿಗೆಯನ್ನು ತೋರಿಸಿರುವ ಹಿನ್ನೆಲೆಯಲ್ಲಿ ಅವರು ಈ ಹೇಳಿಕೆ ನೀಡಿದ್ದಾರೆ. ಭಾರತವು ವಿತ್ತವರ್ಷ 2017-18 ರಲ್ಲಿ 2,071 ಕೋಟಿ ವಹಿವಾಟುಗಳಿಂದ ವಿತ್ತವರ್ಷ 2021-22 ರಲ್ಲಿ 8,840 ಕೋಟಿ ವಹಿವಾಟುಗಳನ್ನು ಸಾಧಿಸಿದೆ.

ವಿತ್ತವರ್ಷ 2021-22 ರಲ್ಲಿ 8,840 ಕೋಟಿ ವಹಿವಾಟುಗಳು ಮತ್ತು ವಿತ್ತವರ್ಷ 2022-23 ರಲ್ಲಿ 2,050 ಲಕ್ಷ ಕೋಟಿ ಮೌಲ್ಯದ ವಹಿವಾಟುಗಳೊಂದಿಗೆ ಭಾರತವು ಅತಿ ಹೆಚ್ಚು ಡಿಜಿಟಲ್ ಪಾವತಿ ವಹಿವಾಟು ಹೊಂದಿರುವ ಅಗ್ರ ರಾಷ್ಟ್ರಗಳಲ್ಲಿ ಒಂದಾಗಿದೆ.

ಭಾರತವನ್ನು ಡಿಜಿಟಲ್ ಕ್ರಾಂತಿಗಾಗಿ ಶ್ಲಾಘಿಸಿದ ಗಾರ್ಸೆಟ್ಟಿ, ಡಿಜಿಟಲ್ ಪಾವತಿ ಸೌಲಭ್ಯಗಳು ಭಾರತದ ಹಳ್ಳಿಗಳಿಗೂ ತಲುಪಿವೆ ಎಂದು ಉಲ್ಲೇಖಿಸಿದ್ದಾರೆ. “ಒಂದು ಹಳ್ಳಿಯಲ್ಲಿರುವ ಟೀ ಮಾರಾಟಗಾರಳು ಕೂಡ ತನ್ನ ಫೋನ್‌ನಲ್ಲಿ ಸರ್ಕಾರದಿಂದ ಸಿಗುವ  ನೇರ ಪಾವತಿಯ ಶೇ.100ರಷ್ಟು ತನಗೆ ತಲುಪುವುದನ್ನು ಖಚಿತಪಡಿಸಿಕೊಂಡಿದ್ದಾಳೆ” ಎಂದಿದ್ದಾರೆ.