ಮಥುರಾ: ಶಾಹಿ ಈದ್ಗಾ ಮಸೀದಿಯ ಸಮೀಕ್ಷೆ ಆರಂಭ

ನವದೆಹಲಿ: ಮಥುರಾದ ವಿವಾದಿತ ಶಾಹಿ ಈದ್ಗಾ ಮಸೀದಿಯ ಸಮೀಕ್ಷೆಯನ್ನು ಇಂದು ಆರಂಭಿಸಲಾಗಿದ್ದು, ಜನವರಿ 20ರೊಳಗೆ ಸಮೀಕ್ಷೆಯ ವರದಿಯನ್ನು ಸಲ್ಲಿಸಲಾಗುತ್ತಿದೆ.

ಡಿಸೆಂಬರ್ 24 ರಂದು ಆದೇಶ ನೀಡಿದ್ದ ಜಿಲ್ಲಾ ನ್ಯಾಯಾಲಯ, ಮಥುರಾದ ಶ್ರೀ ಕೃಷ್ಣ ಜನ್ಮಭೂಮಿ-ಶಾಹಿ ಈದ್ಗಾ ಮಸೀದಿಯ ಸಮೀಕ್ಷೆಯನ್ನು ಜನವರಿ 2 ರಂದು ಸೋಮವಾರ ಆರಂಭಿಸಬೇಕು ಮತ್ತು ಜನವರಿ 20 ರೊಳಗೆ ಸಮೀಕ್ಷೆಯ ವರದಿಯನ್ನು ಸಲ್ಲಿಸಬೇಕು ಎಂದು ಹೇಳಿತ್ತು. ಶಾಹಿ ಈದ್ಗಾ ಮಸೀದಿಯ ಸಮೀಕ್ಷೆ ನಡೆಸುವಂತೆ ಮತ್ತು ಸ್ಥಳದಲ್ಲಿ ಇರುವ ಹಿಂದೂ ಚಿಹ್ನೆಗಳನ್ನು ಪರಿಶೀಲಿಸುವಂತೆ ಹಿಂದೂ ಸೇನೆ ಸಲ್ಲಿಸಿದ ಮನವಿಯ ಮೇರೆಗೆ ಈ ಆದೇಶವನ್ನು ನೀಡಲಾಗಿದೆ.

1669-70ರಲ್ಲಿ ಮೊಘಲ್ ಚಕ್ರವರ್ತಿ ಔರಂಗಜೇಬನ ಆದೇಶದ ಮೇರೆಗೆ ಈ ಮಸೀದಿಯನ್ನು ಶ್ರೀಕೃಷ್ಣನ ಜನ್ಮಸ್ಥಳದ ಬಳಿಯ ಕತ್ರಾ ಕೇಶವ್ ದೇವ್ ದೇವಸ್ಥಾನದ 13.37 ಎಕರೆ ಆವರಣದಲ್ಲಿ ನಿರ್ಮಿಸಲಾಗಿದೆ ಎಂದು ಹಿಂದೂ ಸೇನೆ ವಾದಿಸಿದೆ.

”ಪ್ರಕರಣದ ಬಗ್ಗೆ ದಾಖಲೆಯ ಸಾಕ್ಷ್ಯಗಳಿವೆ. ಠಾಕೂರ್ ಜೀ ಅವರ ಹೆಸರಿನಲ್ಲಿರುವ 13.73 ಎಕರೆ ಭೂಮಿಗೆ ನಮ್ಮ ಬಳಿ ಪುರಾವೆ ಇದೆ. ಈ ಜಮೀನು ಠಾಕೂರ್‌ಗೆ ಸೇರಿದ್ದು ಎಂಬುದನ್ನು ಸಾಬೀತುಪಡಿಸಲು ನಮ್ಮ ಬಳಿ 400 ವರ್ಷಗಳ ಹಳೆಯ ದಾಖಲೆಗಳಿವೆ. ಇದಲ್ಲದೆ, ಔರಂಗಜೇಬನು ಮಸೀದಿಯನ್ನು ನಿರ್ಮಿಸಿದಾಗ ದೇವಾಲಯದ ಕೆಲವು ರಚನೆಗಳನ್ನು ಮಸೀದಿಯನ್ನು ನಿರ್ಮಿಸಲು ಬಳಸಲಾಯಿತು. ಇದಕ್ಕೆ ಸಂಬಂಧಿಸಿದ ಪುರಾವೆಗಳು ಸಹ ಸ್ಥಳದಲ್ಲಿ ಕಂಡುಬರುತ್ತವೆ ”ಎಂದು ಹಿಂದೂ ಸೇನೆಯನ್ನು ಪ್ರತಿನಿಧಿಸುವ ವಕೀಲ ಶೈಲೇಶ್ ದುಬೆ ತಿಳಿಸಿದ್ದಾರೆ.